Այսօր` հուլիսի 10-ին ՀՀ Գլխավոր հարկադիր կատարող, արդարադատության գեներալ-մայոր Միհրան Պողոսյանն ամփոփեց իր ղեկավարած կառույցի 2012 թ. առաջին կիսամյակը: ԴԱՀԿ ծառայության ղեկավարը  լրագրողներին տեղեկացրեց, որ 2012 թ. առաջին կիսամյակի բռնագանձումները գերազանցել են 7,123 մլրդ դրամի սահմանագիծը, որը նախորդ տարվանից 250 մլն դրամով ավելին է, հարուցվել է 51.447 կատարողական վարույթ՝ նախորդ տարվա 42.761-ի դիմաց:

Ըստ Պողոսյանի վեց ամսվա հաշվետվությունը փաստում է, որ դատական ակտերի հարկադիր կատարման ծառայությունում աշխատանքների ծավալը շարունակում է մնալ գերծանր: Կարևոր խնդիրներից մեկը, որն այսօր հուզում է ոչ միայն հասարակությանն, այլև իրենց կառույցին, ֆիզիկական անձանց սնանկացումից հետո, վերջին կացարանից չզրկելու հարցն է: «Օրինակ, եթե բանկը քաղաքացուն տալիս է վարկ, բանկը իր բիզնեսն է անում, և ինչ-որ տեղ վերջինս ամբողջությամբ ապահովագրված է, մինչդեռ քաղաքացին իր վերջին կացարանը գրավ է դնում»,- ասաց նա հավաստիացնելով, որ իրենք մարդուն իր միակ բնակելի տարածքից չզրկելու ուղղությամբ քայլեր են կատարում. «Այս տարի ԴԱՀԿ-ը նպատակ ունի Կառավարությանը կոնկրետ նախագիծ ներկայացնել, որը շատ երկրներ արդեն ընդունել են: Շատ դեպքերում մենք տնից հանել ենք մարդկանց և հանրակացարանում տեղավորել, որպեսզի անձը, գոնե, ապրելու տեղ ունենա»:

Ըստ ԴԱՀԿ պետի, առաջին կիսամյակում նկատելի են ֆիզիկական անձանց օգտին բռնագանձումների ավելացելում, իսկ իրավաբանական անձանց առումով նվազում:

«Այսօր մենք գրեթե չունենք ուշացած կատարողական վարույթ, այսինքն՝ տարիներով մնացած կատարողական վարույթ չկա», -հավատացրեց Պողոսյանը, նշելով, որ ծառայությունն իր վրա դրված պարտականությունները կատարում է հաջողությամբ շարունակելով աշխատանքները Գլխավոր դատախազության հետ. «Դատախազություն է ուղարկվել 14 գործ, որոնք, ըստ էության, նույնն են՝ տեսակների չարաշահում, կեղծ մաքսազերծում, դատական ակտի դիտավորյալ չկատարում: Դրանցից վեցի կապակցությամբ հարուցվել է քրեական գործ»:

Միհրան Պողոսյանն անդրադարձավ նաև խարդախությունների հետ կապված հարցերին. «Մեր հասարակությունը դեռ չի ընդունել այն փաստը, որ ԴԱՀԿ-ն աճուրդն իրականացնում է էլեկտրոնային կայքի միջոցով, և ինչ-ինչ մարդիկ դրանից օգտվում են, որն էլ առաջ է բերում նման թյուրիմացություն»:

Պողոսյանը խոսեց կոնկրետ դեպքի մասին, ներկայացնելով վերջին միջադեպը. «Մարդը, պարզապես, ներկայացրել է, որ ցանկացած գույք (ավտոմեքենա և այլն) կկարողանա հարկադիրից ավելի էժան տալ, ինչին էլ բազմաթիվ մարդիկ հավատացել են: Այսօր մեր ջանքերով գտել ենք այդ երիտասարդին՝ որը կանգնած է դատարանի առաջ: Քրեական գործ է հարուցվել»։

Ըստ նրա, այդ անձը ոչ թե համակարգի աշխատող է, այլ ուղղակի իրավաբան է, որն օգտվել է մեր ժողովրդի տեղեկացված չլինելու հանգամանքից և բազմաթիվ մարդիկ խաբեության զոհ են դարձել:

Մինչդեռ ԴԱՀԿ- ում 2006-ից էլեկտրոնային տարբերակով է վաճառք իրականացվում:

Ինչ վերաբերվում է հարցին, թե ինչ ընթացքում է գտնվում «Ալեքս Գրուպ» ընկերության տուգանքի վարույթը, Միհրան Պողոսյանը տեղեկացրեց. «Ալեքս Գրիգ» ընկերության տուգանքն արդեն վճարված է, այս պահին վարույթը կարճված չէ»:

Խոսքը վերաբերվում է ՀՀ տնտեսական մրցակցության պաշտպանության պետական հանձնաժողովի տարբեր ժամանակահատվածներում մի քանի անգամ տուգանված պատգամավոր Սամվել Ալեքսանյանին պատկանող «Ալեքս Գրիգ» ընկերությանը` ռուսական և ուկրաինական օղիների վրա զետեղված ապրանքային նշանները, մասնավորապես` «Խլոպցի», «Ռուսկի բրիլիանտ», «Ուկրաինկա» ապօրինաբար ընդօրինակելու և սպառողներին շփոթության մեջ գցելուն:

Հիշեցնենք որ  միայն 2010թ. «Ալեքս Գրիգ» ընկերության հանդեպ հարուցվել է 7 վարչական վարույթ և կիրառվել է ընդհանուր առմամբ 3,5 մլն դրամ տուգանք՝ այլ ընկերությանը պատկանող ապրանքային նշանին շփոթության աստիճան նման արտադրատեսակներ շուկա հանելու, այլ կերպ ասած՝ անբարեխիղճ մրցակցության դրսևորման համար:

«Առգրավված են ոչ միայն օղիները, այլ նաև բոլոր ռեսուրսները` խցաններ, շշեր, պիտակներ, որոնք հայտնաբերվել են: Եթե ընկերությունը հնարավորություն ունենա շարունակել այդ գործունեությունը, նորից եմ հավաստիացնում, ԴԱՀԿ-ը, կարձագանքի»,-ասաց Միհրան Պողոսյանը, շեշտելով, որ օղիների ամբողջ խմբաքանակն է առգրավված: