ՀՀԿ խմբակցության պատգամավոր Մհեր Սեդրակյանին («Թոխմախի Մհեր») չի հետաքրքրում, որ իր քրոջ որդուն ձերբակալել են, քանի որ ինքը նրանց հետ չի շփվում:

«Ես իրենց հետ չեմ շփվում, ճիշտ է իմ քրոջ որդին է, բայց ես իրենց հետ չեմ շփվում, լսել եմ, որ զենք է հայտնաբերվել իր մոտ: Ոնց օրենքը ճիշտ է համարում, թող այդպես էլ անի, դա ինչ չի հետաքրքրում», — «Ազատություն» ռադիոկայանին ասել է նա:

Դիտարկմանը, թե իր քրոջ որդու անունը պարբերաբար շրջանառվում է տարբեր հանցագործությունների հետ կապված, Սեդրակյանն արձագանքել է. «Պարբերաբար չի շրջանառվում, դե, մեկ-երկու դեպքը չի նշանակում, որ… 37-40 տարեկան մարդ է, երկու անգամ եղել է, ինչքան մարդիկ կան, որ տարին մեկ ինչ-որ բանի մեջ ընկնում են: Սա երկրորդ դեպքն է, և եթե օրենքը գտնում է, որ ինքը մեղավոր է, ուրեմն թող դատվի, դա ինձ չհետաքրքրող հարց է, ինքը ունի իր ընտանիքը, ես հո չե՞մ կարա… ու ամբողջ թաղը ինձ քրոջ որդի և եղբոր որդի է… ես չեմ կարա բոլորի համար պատասխան տալ»:

Հարցին, թե որևէ քաղաքական ենթատեքստ տեսնո՞ւմ է այս ամենում` կապված իր անձի հետ, Սեդրակյանը պատասխանել է. «Շատ բաներ կարելի է մտածել, բայց հիմա հլը արտահայտվելու ժամանակը չէ, երբ որ պետք եղավ, ես կարտահայտվեմ: Չեմ կարա բոլորին կանտրոլ անել, ով ոնց ուզում է, ով ինչ կյանքով ուզում է, էդ կյանքով էլ ապրում է»:

Հիշեցնենք, որ հուլիսի 4-ի երեկոյան ձերբակալվել է Աժ պատգամավոր Մհեր Սեդրակյանի («Թոխմախի Մհեր») քրոջ որդին` Արման Բադալյանը: Նրան բերման են ենթարկել Կայարանի սրճարաններից մեկից, որի մերձակայքում էլ ապրում է:

Նշենք, որ մամուլում Մհեր Սեդրակյանի քրոջ որդու անունը հաճախ շրջանառվում է հնչեղություն ստացած մի քանի հանցագործությունների հետ կապված: Մասնավորապես, ըստ շրջանառվող տեղեկությունների, նա ակտիվ մասնակցություն է ունեցել 2008 թվականի մարտի 4-ին Կայարանի հրապարակում տեղի ունեցած ծեծկռտուքին, որը շարունակվել էր հացի փռի մոտ և հնչած կրակոցներից սպանվել էր Արսեն Գալստյանը:

Ըստ մամուլի տեղեկությունների, հունիսի 22-ին նույն համայնքում երկաթուղայինների 9-րդ փողոցում, գտնվող Հացի արտադրամասի մոտ, Սուրեն Զորոյանի սպանության գործում, ով հանցագործ աշխարհի ներկայացուցիչ է և հայտնի է «բիճ» մականունով, ևս շրջանառվում է Արման Բադալյանի անունը: