Այսօր՝ հունիսի 22-ին, ժամը 17։00-ին,  Կենտրոն Նորք–Մարաշ վարչական շրջանների ընդհանուր իրավասության դատարանը, որպես խափանման միջոց երկամսյա կալանք կիրառելու որոշում կայացրեց Դավիթ Ադամյանի, Գարիկ Մարգարյանի, Արթուր Բաբլոյանի և Արման Բաղդասարյանի նկատմամաբ։ Նրանք  տեղափոխվեցին«Նուբարաշեն» քրեակատարողական հիմնարկ։

Արման Խաչատրյանը, Դավիթ Հայրյանը և Նորայր Հայրապետյանը, հավանաբար բաց են թողնվել քաղաքից չբացակայելու ստորագրությամբ:

Հիշեցնենք, որ հունիսի 17-ին, ժամը 23-ի սահմաններում ԱԺ հանրապետական պատգամավոր, ՀՖՖ նախագահ Ռուբեն Հայրապետյանին պատկանող «Հարսնաքար» ռեստորանային համալիրում դաժան ծեծի էին ենթարկվել ռազմական բժիշկներ Էդգար Միկոյանը, Արկադի Աղաջանյանը, Գարիկ Սողոմոնյանը, Արտակ Բայադյանը եւ ՊՆ կենտրոնական կայազորի ռազմական հոսպիտալի ԼՈՌ բաժանմունքի պետ, բուժծառայության մայոր Վահե Ավետյանը: Վերջինիս գլխի ծանր վնասվածքով տեղափոխել էին հոսպիտալ և նյարդավիրաբուժական վիրահատության ենթարկել:  Ավետյանն այժմ ծայրահեղ ծանր վիճակում է գտնվում: «Վահե Ավետյանի մոտ գլխուղեղի դիսլոկացիա է, մի կիսագունդը թեքվել է դեպի մյուս կիսագնդի մեջ»,-ասել էր վիրաբույժը:

Այսդեպքի առնչությամբ և հանրության ակտիվ միջամտությամբ հարուցվեց քրեական գործ ՀՀ քրեական օրենսգրքի  112 հոդվածի 1-ին մասով՝ (Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ, ինչպես նաև կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում):