Այսօր ՀՀ Վերաքննիչ քրեական դատարանում Եվա Դարբինյանի նախագահությամբ շարունակվեց ամբաստանյալ Մելինե Մարգարյանի գործը, որը մեղադրվում է Տաշիր առևտրի կենտրոնի մի խումբ ոսկեվաճառների վստահությունը չարաշահելու  «քցելու» մեջ: Հիշեցնենք, որ նրանցից միայն  11 –ն է բողոքել իրավապահներին: Այս գործին մենք արդեն անդրադարձել ենք:

Նախաքննությամբ ու դատաքննությամբ պարզվել է, որ իրեն վերագրվող ինը դրվագներից հինգով միանձնյա, իսկ չորս դրվագներով` հանցավոր համաձայնության գալով նախաքննության մարմնի կողմից որպես տուժող ներգրավված Իրինա Բաբաջանյանի հետ, 2009թ. հունիսից մինչև 2010թ. ապրիլն ընկած ժամանակահատվածում, «Տաշիր» առևտրի կենտրոնի ոսկու շուկայի մի խումբ աշխատակիցներից խարդախությամբ առանձնապես խոշոր չափերի հասնող գույք է հափշտակել և վերավաճառելու և նույն ժամանակահատվածում գումարները վերադարձնելու, ինչպես նաև կարճ ժամանակով գրավադնելու և վերադարձնելու պատրվակներով վերցրել տարբեր տեսակի ոսկյա զարդեր:

Սակայն վերավաճառելու պատրվակով վերցրած ոսկեղենը, ինչպես նաև գրավատներում գրավադրված ոսկյա զարդերի դիմաց ստացված գումարները չեն վերադարձրել, որպես վստահության երաշխիք` 100-ական ԱՄՆ դոլար գումարներ են վերադարձրել և բերելով տարբեր պատճառաբանություններ` հուսադրել են, իբրև թե կվերադարձնեն գումարներն ու ոսկեղենը, սակայն խաբեությամբ հափշտակել են դրանք։

Այսօրվա նիստին ամբաստանյալ Մելինե Մարգարյանը շարունակեց ներկայացնել իր վերաքննիչ – բողոքը: Ամբաստանյալ Մարգարյանն իր բողոքի մեջ ներառել է 5 դրվագներ`  ընդ որում մեկը միանձնյա, իսկ  չորս դրվագները  տուժող Իրինա Բաբաջանյանի միջնորդությամբ կատարված:  Ըստ ամբաստանյալի ներկայացրած հիմնավորումների`4 տուժողներն իրենց ցուցմունքներում նշել են, որ իրենք տուժել են Իրինա Բաբաջանյանից,  ոչ թե Մելինե Մարգարյանից, և ոչ մի բողոք չունեն վերջինից:

Իրինա Բաբաջանյանի ներկայացուցիչ Խաչատրյանը միջամտեց` նշելով,  որ ամբաստանյալի հիմնավորումները կեղծ են, միտում ունեն պատժից խուսափել և դրանք Բաբաջանյանի վրա բարդել:

Ամբաստանյալը շարունակեց իր ճառը. նա պնդում է, որ իր հանդեպ արդարացի որոշում չի կայացվել` որպես հիմնավորում նշում է, որ դատախազ Սամվել Հարությունյանը Գոհար Մկրտչյանի փեսան է, վերջինս էլ համոզել է մյուս տուժողներին, որ ցուցմունք տան Մելինեի դեմ. իբր  Գ. Մկրտչյանը կերաշխավորի, որ գործը շահեն: Ինչպես նաև ամբաստանյալը պնդեց, որ ստացականները կեղծ են եղել և դատարանը աչք է փակել այդ հանգամանքի վրա: Այնուհանդերձ ինքը շնորհակալ է առաջին ատյանի դատարանից, որ հաստատել է իր` Իրինա Բաբաջանյանի հանդեպ հանցանք չգործելը:

Ամբաստանյալը միջնորդություն ուներ նաև Իրինա Բաբաջանյանի վերաքննիչ- բողոքի վերաբերյալ: Հիշեցնենք, վերջինս պահանջում է ամբաստանյալ Մարգարյանից հօգուտ իրեն բռնագանձել 16.000 ԱՄՆ դոլարին համարժեք 5.867.360  ՀՀ դրամ գումար` որպես հանցագործության հետևանքով պատճառված վնասի հատուցում։

Ի դեպ, և՛ վերաքննիչ-բողոքը, և՛ միջնորդությունը գրել էր ամբաստանյալը` առանց որևէ մեկի օգնության, ինչը զարմացրեց  դատավոր Դարբինյանին, սակայն պետք է հաշվի առնել, թե ինքան մարդու գլուխ է պտտացրել հնարամիտ ու ճարպիկ Մելինեն:

Պաշտպան Վարդան Գրիգորյանի ճառը պատրաստ կլինի հաջորդ  դատական նիստին:

Իսկ մեղադրող Հակոբյանը հավաստեց, որ դատական հաջորդ նիստին կողմը հանդես կգա Բաբաջանյանի կողմից  նոր ի հայտ եկած հանգամանքներով: