Հունիսի 15-ի ժամը 11.39-ի դրությամբ փրկարարները փլատակներում հայտնաբերել են զոհվածի մարմինը, և որոնողական աշխատանքներն ավարտվել են:

Դեպքից երկու օր առաջ Կոտայքի մարզային փրկարարական վարչությունը կաթսայատան ծխնելույզի ապամոնտաժման աշխատանքը ձեռնարկողներին նախազգուշացրել էր դրա փլուզման հնարավոր վտանգի մասին:

Հիշեցնենք՝ հունիսի 14-ին, ժամը 19.59-ին Չարենցավանի ոստիկանական բաժանմունքից տեղեկություն էր ստացվել, որ քաղաքի նախկին լեռնաշինարարական գործարանի մոտակայքում տեղի է ունեցել կիսաքանդ շինության փլուզում և կա մեկ զոհ:

Դեպքի վայր է մեկնել մեկ մարտական հաշվարկ, մարզային փրկարարական ջոկատը, մարզային և ՃԿԿ օպերատիվ խմբերը, ինչպես նաև հատուկ փրկարարական ջոկատի հերթապահ խումբը:

Տեղում պարզվել է, որ փլուզվել է Չարենցավանի արտադրական թաղամասում տեղակայված կաթսայատան բետոնե ծխնելույզը:

Դժբախտ պատահարի հետևանքով փլատակներում մնացել և մահացել է Չարենցավանի 1ա թաղամասի 4-րդ շենքի թիվ 41 բնակարանի բնակիչ, 1989 թ. ծնված Հովհաննես Բաբայանը: Երեկոյան սկսված որոնողական աշխատանքները փրկարարները վերսկսել են այսօր առավոտյան ժամը 08.00-ին:

Դեպքի վայր են մեկնել նաև ՀՀ ԱԻ նախարար Արմեն Երիցյանը, ՓԾ տնօրեն, գեներալ-մայոր Սերգեյ Ազարյանը և ՓԾ ՕԿՎ պետ, փոխգնդապետ Արման Ցոլակյանը:

Կոտայքի մարզից ՓԾ տնօրենի տեղակալ, գնդապետ Նիկոլայ Գրիգորյանը հաղորդել էր, որ փլուզման վայրում որոնողական աշխատանքները շարունակվում են,  ներգրավվել է լրացուցիչ տեխնիկա:

ԱԻ նախարար Արմեն Երիցյանը փրկարարներին հանձնարարել էր շարունակել որոնողական աշխատանքները մինչև զոհի դիակի ամբողջական հայտնաբերումը: