Ընտրութուններն ավարտվեցին, սկսեցին հետընտրական հիասթափություններն ու խրախճանքները: Սամվել Ալեքսանյանն իր խրախճանքը նշեց Փարվանա ռեստորանում, Մալաթիա- Սեբաստիա համայնքի մանկավարժական , բժշկական ու թաղապետարանի աշխատակազմի հետ: Դիմացը նախագահական ընտրություններ են, ու մարդիկ շարունակում են սկսած գործը. Հիմա հերթը ընտրատարածքների ղեկավարներին է, ում ջանքերի շնորհիվ ինքը նորից մի քանի տարի ևս մանդատ կունենա:

Ու որոշվել է, որ «Շնորհակալությունը » կարելի է կազմակերպել այն մանկապարտեզներում ու դպրոցներում, որտեղ անցկացվել են «արդար ու թափանցիկ» ընտրություններ: Ու պատգամավորը մունետիկներ ուղարկեց թե` սեղանները բացեք, գալիս ենք, համեցեք, կերեք, խմեք, չասեք, թե մենք քնած, Սամոն եկավ, ընտրվեց, գնաց:
Հարավ- Արևմտյան Ա — 2 թաղամասի բնակիչներն, այսօր` հունիսի 2-ին հրավիրված են Երևանի Անդրանիկի 4 հասցեում գտնվող Սիամանթոյի անվան թիվ 162 դպրոց` կերուխումի, որը նախատեսված է անցկացնել դպրոցի սպորտ դահլիճում, ուր հունիսի 2-ից մեկնարկում են 4-րդ դասարանի քննութունները:

Դեռ պարզ չէ` արդեն քննասենյակ դարձած մարզադահլիճում ինչպես կանցկացվի հերթական տոնախմբությունը, արդյո՞ք այն կբավարարի Հարավ- Արևմտյան Ա-2 թաղամասի բոլոր հավատարիմ ընտրողներին, բայց որ դա կխաթարի առաջին քննությունների բնականոն ընթացքը, ակներև է:

Այս դպրոցի տնօրենն արդեն 4 տարի վերացրել է դպրոցի աշակերտական և մանկավարժական կոլեկտիվների փոքրիկ տոնակատարությունները, սկզբունքորեն դեմ լինելով հարազատ հարկի տակ դրանք նշելուց: Նույնիսկ Ամանորի տոնն այս տարի անցկացրեց սրճարանում, զրկելով դպրոցականներին սիրված ու սպասված տոնը սեփական հարկի տակ նշելու հաճույքից: Մինչդեռ հիմա` քննությունների նախաշեմին, դեմ չէ Ալեքսանյանի «Շնորհակալության օրվան»: