Այսօր` քիչ առաջ,  մոտ ժամը 01.14-ին,  «Գոլդեն Պալաս»-ի համալիրի դիմացի ձորակից 25-ամյա երիտասարդի դիակ է հայտնաբերվել: ԱԻՆ լրատվական ծառայություն  «1֊03» ծառայության հերթապահ բժշկից տեղեկություն է ստացվել, որ Երևանի Ազատության պողոտայում` « ԳՈԼԴԵՆ ՊԱԼԱՍ» հյուրանոցի դիմացի բարձրությունից մարդ է ընկել: Սակայն շտապօգնության աշխատակիցներին չի հաջողվել գտնել տուժածին:
Դեպքի վայր են մեկնել հատուկ փրկարարական ջոկատի հերթապահ և ՃԿԿ օպերատիվ խմբերը:
Ժամը 01.24-ին փրկարարները ձորակում մոտ 7 մետր խորությամբ  սելավատարի մեջ, հայտնաբերել են 1987թ. ծնված Սարգիս Հակոբյանի դին: Ժամը 03.29-ին փրկարարները դիակը դուրս են բերել և հանձնել «1-03» ծառայության աշխատակիցներին:

Մահացածը Ոստիկանության պարեկապահակային ծառայության Արաբկիրի բաժնի աշխատակից 25-ամյա Սարգիս Հակոբյանն է, ով իր հարևաններին իր անձնական ավտոմեքենայով տեղափոխելիս է եղել «Զվարթնոց» օդանավակայան։ Ճանապարհին, ըստ ավտոմեքենայում գտնվողների պատմածի, Սարգիս Հակոբյանը կանգնեցրել է ավտոմեքենան և բնական կարիքները հոգալու համար դուրս եկել ավտոմեքենայից։ Ավելի ուշ պարզվել է, որ նա վայր է ընկել 7-8 մետր բարձունքից։