Երևանում «DIY» ակումբի պայթյունի շուրջ խմորումները նոր թափ են առնում. Այսօր` լրագրողների հետ հանդիպման ժամանակ ակումբի ղեկավար Արմինե Օգանեզովան (Ծոմակ), հայտարարել է, որ իր ակումբի դեմ պայքարը հովանավորվում է Դաշնակցության կողմից: Մինչ այդ խոսքը գնում էր ազգայանական ուժերի կողմից իրենց հետապնդումների մասին, սակայն ակումբի տերերը կարծես կոնկրետացրել են նրանց:

«Պայթյունի հեղինակներին գրավի դիմաց ազատ են արձակել, իսկ գրավի գումարը տրամադրել են ՀՅԴ պատգամավորներ Արծվիկ Մինասյանն ու Հրայր Կարապետյանը» ասել է Ծոմակը: Նրա խոսքով, իրենք շատ փաստեր ունեն դրա վերաբերյալ, որոնք պատրաստվում են ներկայացնել ոստիկանությանը:

DIY ակումբի պաշտպանությամբ հանդես եկող «Հանրային տեղեկատվություն և գիտելիքի կարիք» ՀԿ ներկայացուցիչ Մարինե Մարգարյանն էլ ակումբի պայթյունը ներկայացրել է որպես ահաբեկչություն. «Վեց-յոթ ամիս նրանք նախապատրաստել են ահաբեկչական գործողությունը, դա ահաբեկչություն է, որովհետև շենքը, որտեղ գտնվում է ակումբը, ապրում են մարդիկ, երեխաներ», -ասել է Մարգարյանը:

Հիշեցնենք, որ մայիսի 8-ին, առավոտյան ժամը 5:30-ի սահմաններում պայթեցրել են Փարպեցի 14/11 հասցեում գտնվող, Ծոմակ Օգանեզովային պատկանող «DIY փաբը»:

Ոստիկանությունը պարզել է, որ հիշյալ օրը, ժամը 05.05-ի սահմաններոմ, եղբայրներ՝ 20-ամյա Արամե և 19-ամյա Համբիկ Մ.-երը, նախնական պայմանավորվածությամբ, գույքը դիտավորությամբ վնասելու նպատակով, կոտրել են «Մեյդ Հենդ Մեյդ» ՍՊԸ «Դիայվայ» ակումբի  պատուհանի ապակին և նախապես իրենց հետ բերված բենզինով լի շիշը նետել են այնտեղ, որից հետո բաց կրակով հրկիզել են շինությունը: Ակումբի սեփականատերը վստահ է, որ դա ատելության նշան է իրենց նկատմամբ:

Մայիսի 9-ին, ժամը 13.00-ին Արամե եւ Համբիկ Մ.-երը Ամիրյան փողոցի և Մաշտոցի պողոտայի խաչմերուկից բերման են ենթարկվել բաժին:

Նախօրեին ակումբը պայթեցնելու մեջ կասկածվող երկու երիտասարդները դատարանի որոշմամբ ազատ են արձակվել: Նրանցից մեկի նկատմամբ որպես խափանման միջոց կիրառվել է ստորագրություն չհեռանալու մասին, իսկ մյուսն ազատվել է գրավի դիմաց: