«Հայաստանում ֆրանսիական համալսարան» հիմնադամի ռեկտոր, իրավաբանական գիտությունների դոկտոր Ժոել Լը Մորզելեկն այսօր իր առաքելության ավարտին, պարգևատրվել է ՀՀ կրթության և գիտության նախարարության բարձրագույն պարգևով՝ «Ոսկե հուշամեդալով»: Կրթության և գիտության ոլորտում ներդրած մեծագույն ավանդի և Հայաստանում ֆրանսիական համալսարանի զարգացման գործում ունեցած ավանդի համար պարգևը  հանձնել է նախարար Արմեն Աշոտյանը:

«Ֆրանսիական համալսարանը տիկին ժոել Լը Մորզելեկի ղեկավարման օրոք նույնպես ապրել է Հայաստանի հետ միասին՝ Հայաստանի կրթական համակարգին օգնելով և կիսելով նույն խնդիրները: Այս ընթացքում իրականացվել են մի շարք լավ ծրագրեր, և շարունակելով համալսարանի լավագույն ավանդույթները՝ բուհը թևակոխել է զարգացման նոր փուլ»,- ասել է Աշոտյանը:

Ռեկտորը շնորհակալություն է հայտնել. «Աշխատելով Հայաստանում՝ ես բացահայտել եմ Հայաստանի ողջ մշակույթը և հեռանում եմ մեծ հիշողություններով: Հայաստանն այն երկիրն է, որտեղ մեկ անգամ ոտք ես դնում, այլևս չես կարող չվերադառնալ: Որպես ռեկտոր՝ ես փորձել եմ միշտ ի կատար ածել, հարգել, պաշտպանել ՀՀ օրենսդրության պահանջները»:

Միջոցառմանը ներկա է եղել նաև ՀՀ-ում Ֆրանսիայի արտակարգ և լիազոր դեսպան Անրի Ռենոն: Այս մասին տեղեկացնում է ԿԳՆ: