Այսօր՝ մայիսի 8–ին, նշվում է Երկրապահի օրը։ Երկրապահի օրը նշելու որոշում ընդունել է Երկրապահ կամավորական միության 3–րդ համագումարը՝ 1997թ. նոյեմբերին։ 2002թ.–ից այս տոնն ընդգրկվել է ՀՀ պետական տոնացույցում։ ԵԿՄ վարչությունը ամեն տարի այս օրը տարբեր միջոցառումներ է անցկացնում։

Երկրապահ կամավորականների միության ղեկավար, Արցախի հերոս Մանվել Գրիգորյանը շնորհավորական ուղերձ է հղել Երկրապահի օրվա կապակցությամբ:

Ուղերձում ասվում է.

«Երկրապահի օրվա, Լեռնային Ղարաբաղի Հանրապետության պաշտպանական բանակի կազմավորման և Շուշիի ազատագրման 20-րդ, Հայրենական մեծ պատերազմում տարած հաղթանակի 67-րդ տարեդարձերի, ինչպես նաև մայիսյան բոլոր տոների կապակցությամբ` Երկրապահ Կամավորականների միության անունից շնորհավորում եմ ողջ հայ ժողովրդին, աշխարհասփյուռ հայությանը, Արցախի հերոսական ժողովրդին, սահմանում կանգնած հայ զինվորին, արցախյան պատերազմի բոլոր մասնակիցներին, 5-րդ բրիգադի մարտիկներին, հերոս զավակներ ծնած հերոս մայրերին, Հայրենական Մեծ պատերազմի վետերաններին, երիտասարդ ու պատանի երկրապահներին:

Երկրապահի օրը հայ ժողովրդի տոնացույցի ամենահպարտ օրն է: Այսօր մենք մեծարում ենք հայի ուժեղ, մարտնչող տեսակին, իր արժանապատվությունը, ընտանիքը, հայրենիքը ազատագրող ու պաշտպանող տեսակին:

Երկրապահը եղել է, կա ու կմնա անկախ Արցախի հանրապետության և նրա հերոսական ժողովրդի կողքին:

Հայ ժողովուրդը միշտ էլ իր զավակների կյանքի ու արյան գնով պահպանել է իր արժանապատվությունը:

Մենք պարտավոր ենք ամեն գնով պահպանել այն, ինչ ձեռք է բերվել մեր հերոս տղաների կյանքի ու արյան գնով:

Հայաստանի անկախ Հանրապետությունն արդեն թևակոխում է իր գոյության երրորդ տասնամյակը: Բազում խնդիրներ արդեն լուծվել են և առջևում էլ կան խնդիրներ, որոնք անպայման կլուծվեն մեր բոլորիս ջանքերի ու միասնության շնորհիվ:

ԵԿՄ հավերժ նախագահ Սպարապետ Վազգեն Սարգսյանը ասում էր. «Միասնականությունը սարեր շուռ կտա»: Մեր ժողովրդի բոլոր հաղթանակները միասնականության արդյունք են: Եթե մենք միասնական լինենք, օտարը չի կարող մեր հետ հաշվի չնստել:

Հավատանք ինքներս մեզ, մեր նոր սերնդին, մեր երիտասարդ և պատանի երկրապահներին: Կարևորը ունենալը չի, կարևորը եղածը պահպանելն ու այն եկող սերունդներին հանձնելն է:

Եվս մեկ անգամ շնորհավորում եմ ողջ հայությանը` Երկրապահի օրվա և մայիսյան բոլոր տոների առթիվ, մաղթում խաղաղություն և միասնականություն:

Փառք Սպարապետին

Փառք նահատակված հերոսներին

Փառք Ձեզ սիրելի երկրապահ ժողովուրդ»:

Հիշեցնենք, որ Երկրապահի օրը նշվում է մայիսի 8-ին` 1992-ին Շուշիի ազատագրման տոնական օրերի շրջանակում: