Այսօր լրագրողների հետ հանդիպման ժամանակ ԱԻՆ Սեյսմիկ պաշտպանության ազգային ծառայության պետ Հրաչյա Պետրոսյանը  հայտարարեց, որ  Հայաստանի և նրան հարակից  շրջանների երկրակեղևում 5,5 մագնիտուդ լարվածություն է կուտակվել և սեյսմիկ ակտիվությունը մեր տարածաշրջանում աճել է. «Միայն ամսի 5-ին, 6-ին, 8-ին տարածաշրջանում գրանցվել է 7 երկրաշարժ, դրանցից 2-ը՝ Հայաստանում, 3-ը՝ Իրանում, 1-ը՝ Հայաստան-Վրաստան սահմանային գոտում, և մեկն էլ, որն ամենից ուժեղն էր՝ 5,9 մագնիտուդով՝ Ադրբեջանում»,- ասաց Հրաչյա Պետրոսյանը և նշեց, որ դրանք բոլորը եղել են նույն օջախային կետում:

Հրաչյա Պետրոսյանի խոսքով, եթե այդ լարվածությունը լիցքաթափվի մեկ երկրաշարժով, դրա ուժգնությունը կկազմի 7-8 բալ:

Անդրադառնալով  երեկ Վրաստանի  արևմուտքում տեղի ունեցած 5,8 մագնիտուդով երկրաշարժին Պետրոսյանը նշել է,  որ Հայաստանի հյուսիս-արևմտյան շրջաններում, որոնք ավելի մոտ են էպիկենտրոնին, այն զգացվել է  4 բալ ուժգնությամբ, իսկ  մեծ քաղաքներում` Երևանում և Գյումրիում ` 3 բալ:Երկրաշարժը զգացվել է նաև Ադրբեջանում, իսկ հայկական սահմանից նրա էպիկենտրոնը  գտնվում էր ուղիղ գծով 115 կմ հեռավորության վրա: «Մինչ այդ երկրաշարժը, մայիսի 5-7-ին, տարածաշրջանում  ֆիքսվել էին մի քանի մանր ցնցումներ. 3-ն` Իրանում, 2-ը` Հայաստանում, 1-ը` Ադրբեջանում և 1-ը` Վրաստանի և Հայաստանի սահմանամերձ գոտում:

Սա  վկայում է  Հայաստանում սեյսմիկ ակտիվության որոշակի բարձրացման մասին: Սա պարբերական գործընթաց է, բնական ոչ միայն  տարածաշրջանի, այլև ամբողջ աշխարհի համար: Երկրի կեղևը` կենդանի օրգանիզմ է և տեկտոնական սալերը գտնվում են  անընդհատ շարժման մեջ», — ավելացրել է Պետրոսյանը: