Հայկական շուկայում մարտի 29-ին հայտնաբերված չմակնշված ձուն եղել է ժամկետանց, որը Հայաստան է ներմուծվել «Աշոցք» ՍՊԸ-ի կողմից. Տեղեկացնում է Գյուղատնտեսության նախարարության սննդամթերքի անվտանգության պետական ծառայությունը:

Այսօր վերը նշված գերատեսչության հասարակայնության հետ կապերի բաժնի պետ Բաբկեն Պիպոյանը հաղորդագրություն է տարածել, որում մասնավորապես ասվում  է.Սույն թվականի մարտի 29-ին ՀՀ ԳՆ սննդամթերքի անվտանգության պետական ծառայությունը հաղորդագրություն էր տարածել, որով տեղեկացնում էր, որ  շուկայում հայտնաբերվել է չմակնշված և ժամկետանց  ձու:

Խնդրի վերաբերյալ իրականացված ուսումնասիրությունների արդյունքում պարզվել է, որ չմակնշված ձուն եղել է ժամկետն անցած և Հայաստանի Հանրապետություն է ներմուծվել ”Աշոցք” ՍՊԸ-ի կողմից: Այժմ Ծառայության կողմից  աշխատանքներ են կատարվում ձվի ամբողջ խմբաքանակի հայտնաբերման և  համապատասխան քայլեր իրականացնելու ուղղությամբ»:

Մեզ հետ զրույցում Բաբկեն Պիպոյանը տեղեկացրեց, որ չմակնշված ձվի առկայության առաջին ահազանգը ստացվել է Գյումրիից, ապա իրենց որոնման արդյունքում մի խմբաքանակ էլ հայտնաբերվել է նաև Երևանում: Այժմ աշխատանքները նոր խմբաքանակ գտնելու ուղղությամբ շարունակվում են:

ՍԱՊ ծառայությունը, ըստ Պիպոյանի չի տիրապետում  Աշոցք ՍՊԸ-ի մասին այլ տվյալների, քանի որ դա չի մտնում իրենց իրավասությունների շրջանակ. «Մենք չունենք պետռեգիստի տվյալները», — մեր հարցին, թե ո՞վ է ՍՊԸ-ի ղեկավարը, կամ ի՞նչ ընկերություն է այն, ասաց  Պիպոյանը:

Ասել է, թե` չգիտեն, ինչ գործառույթ ունի ձու ներկրած իրավախախտ ընկերությունը:

Մենք փորձեցինք հասկանալ, թե ինչ է իրենից ներկայացնում «Աշոցք» ՍՊԸ-ն, քանի որ ձու ներկրող ընկերությունները Հայաստանում մի քանիսն են և հայտնի են դաշտին քիչ թե շատ ծանոթներին:

Ըստ մեր հայտնաբերած  տեղեկության «ԱՇՈՑՔ» ՍՊԸ-ն  շինարարական ընկերություն է, որը հիմնադրվել է 2002 թվականին: Ընկերության տնօրենը Պետրոս Սահակյանն է: «ԱՇՈՑՔ» ՍՊԸ-ն իրականացնում է լայնածավալ գործունեություն Հայաստանի ամբողջ տարածքում, ինչպես նաև Լեռնային Ղարաբաղի Հանրապետությունում: Ընկերության գործունեության հիմնական ոլորտը կապիտալ շինարարությունն է: Որակյալ մասնագետներով համալրված աշխատակազմը կատարում է որակյալ, միջազգային չափանիշներին համապատասխան կառուցման, ջրամատակարարման համակարգերի բարելավման, հիմնանորոգման, էլեկտրամոնտաժային, ջեռուցման համակարգերի տեղադրման աշխատանքներ: Ընկերությունը համագործակցում է և կապեր ունի նաև արտերկրում, զբաղվում է տարբեր շինանյութերի, էլեկտրական գործիքների, սարքերի, սարքավորումների, ինչպես նաև շին. աշխատանքներն առավել արդյունավետ և բարձրորակ դարձնող այլ նյութերի ներմուծմամբ և հանդիսանում է մատակարար Հայաստանում:

Այս ընկերությունը գրանցված է Լեռնային Ղարաբաղում, սակայն գրասենյակ  ունի նաև Երևանում: Այն, դատելով համացանցում եղած տեղեկություններից , գտնվում է բավականին արտոնյալ դիրքերում. 2010-ին ՀՀ կառավարությունը հաստատել է Ասիական զարգացման բանկի ջրամատակարարման և ջրահեռացման ծրագրի շրջանակում անցկացված և ծրագրի կառավարման խորհրդի հավանությանն արժանացած «Ուջան, Արագածոտն, Նոր Եդեսիա, Կոշ, Դպրեւանք, Շամիրամ և Նոր Ամանոս գյուղերի ջրամատակարարման համակարգերի բարելավում» մրցույթի արդյունքները` հաղթող ճանաչելով «Աշոցք» և «Կապավոր» ՍՊԸ-ների կոնսորցիումը։

Ընկերության անունը շրջանառվել է նաև 2009 -2010 թվականին, Մասիսի խմելու ջրի խողովակների աշխատանքների հետ կապված, երբ  «Հայջրմուղկոյուղի» ՓԲԸ-ի հետ կասկածելի գործարքների արդյունքում ՍՊԸ-ն հայտնվել էր մամուլի էջերում:

Ինչևէ, մենք զանգահարեցինք  «Աշոցք ՍՊԸ»-ը փորձելով պարզել  ժամկետանց ձու ներկրող և շինմոնտաժային աշխատանքներ իրականացնող ընկերության կապը: Փոխտնօրենը,  որը ներկայացավ Սերգեյ անունով,  ասաց, թե Սննդի անվտանգության ծառայությունը գլուխը քարին է տալիս, իրենց մեղադրելով. «Ես հենց հիմա գնում են էնտեղ տեսնեմ էդ ինչեր են ասում»: Իսկ իրենց`բոլորովին այլ ոլորտում գործող ընկերության ձվի ներկրումով զբաղվելը, այսպես բացատրեց. «Մենք ձու ենք ներկրել բնակչության մասին մտածելով, ձուն ներկրվել է դեռևս Նոր տարուց առաջ, բաժանել ենք խանութներին, որ Նոր տարուն ձվի դեֆիցիտ չլինի , ինչպես նախորդ տարի, երբ ազգաբնակչությանը150 դրամով ձու էին վաճառում»: Պարզվում է «Աշոցքը» ձուն հանձնել է 30 դրամով, որը ըստ փոխտնօրենի վաճառվել վերջացել է վաղուց:

Իսկ Սննդի անվտանգության ծառայությունից վստահեցնում են, որ ժամկետանց և չմակնշված ձվեր իրենք հայտնաբերել են օրերս` վաճառքում: