«Օրինաց երկիր» կուսակցությունը 4-րդ անգամ է, որ մասնակցում է խորհրդարանական ընտրություններին և ՕԵԿ խմբակցության ղեկավար Հեղինե Բիշարյանը համոզված է որ իրենց մոտ ոչինչ չի փոխվել:

Նա՝ այսօր կայացած մամուլի ասուլիսում ասաց. «1999-ին մենք սկսնակ կուսակցություն էինք և մեծ փորձ չունեինք: Այսօր մենք բոլոր առումներով մարտունակ ենք և մեծ հնարավորություն ունենք հաղթանակ տանելու»:Սակայն Տիկին Բիշարյանը այնքան անկեղծ չեղավ հիշելու, որ նախորդ ընտրություններին ՕԵԿ առաջնորդ Արթուր Բաղդասարյանը, որպես երիտասարդ ու խոստումնալից լիդեր հանդես էր գալիս ընդդիմադիր դիրքերից և մարդիկ հույս էին կապում նրա հետ: Սակայն վերջինս, ոչ միայն չարդարացրեց իր ընտրողների հույսերը այլև դավաճանեց իր իսկ գաղափարախոսությանը, դառնալով ԱԽՔ և քաղաքական դիակ:

Տիկին Բիշարյանը հայտարարեց, որ նախընտրական պայքարը սկսելու են հանրահավաքով, որը տեղի կունենա Ազատության հրապարակում ապրիլի 7-ին: Այդ օրը կուսակցությունը նախատեսել է ներկայացնել ՕԵԿ նախընտրական ծրագիրը, որից հետո՝ հենց հաջորդ օրվանից կսկսեն քարոզարշավը:  Բիշարյանը չբացառեց, որ քարոզարշավի ընթացքում քիչ չեն լինի այն քաղաքական ուժերը, որոնք կզբաղվեն սև PR-ով: Երևի այդ է  պատճառը, որ ՕԵԿ-ը որոշել է դրանից առաջ քաղցրացնել ընտրողների բերանը:

«Արդեն ունենք հստակ ծրագրեր, պլանավորված է այցելությունները դեպի մարզեր: Պետք է նշեմ, որ այսօր մենք չունենք ավելի քիչ հնարավորոթյուններ խորհրդարանում հայտնվելու, քան այսօր կանք այնտեղ»,- տեղեկացրեց ՕԵԿ-ական տիկինը:

Նա հույս հայտնեց, որ քարոզարշավը կլինի ոչ թե իրար վրա ցեխ շպրտելու առիթ, այլ` գաղափարների պայքար. «Բոլոր այն կուսակցությունները, որոնք եղել են քաղաքական դաշտում, պետք է ներկայացնեն հանրությանը, թե իրենք ինչ են արել, ինչ օրենսդրական ծրագրեր են մշակել, ինչ փոփոխություններ են իրականացրել: Եվ պետք է անդրադառնան տնտեսական խնդիրներին»,-ասաց նա՝ ավելացնելով, որ միայն դրանից հետո հանրությունը կկարողանա որոշել, թե ում իր ձայնը տալ, իսկ միմյանց վրա ցեխ շպրտելը, ըստ նրա, ՕԵԿ-ի աշխատելաոճի մեջ չի եղել և չի էլ լինի»: