Ինչպես հաղորդում է Daily News Los Angeles թերթը,Գլենդելի ոստիկանության կողմից սպանվել է 30-ամյա Գառնիկ Կիրակոսյանը, երբ գողություն կատարելուց հետո փախուստի է դիմել:   Նա  չորեքշաբթի Գլենդելում մտել է ծխախոտի խանութ, կրակել վաճառողի ոտքին և թալանել խանութը: Այնուհետև Կիրակոսյանը փախչելով ոստիկանությունից առևանգել է մի կնոջ Mercedes մակնիշի ավտոմեքենան: Ոստիկանության տվյալներով՝ մեքենան բախվել է պատին, որից հետո հանցագործը դուրս է եկել և վազել: Ոստիկանության կանգնելու հրամանին չենթարկվելուց հետո իրավապահները կրակել են նրա վրա և սպանել:
Պարզվել է, որ Կիրակոսյանը 2002թ. հուլիսին մեկ անգամ արդեն ձերբակալվել էր նույնպիսի գողություն կատարելու համար: Դրա համար նա բանտում անցկացրել է մինչև 2005թ. հոկտեմբերը, որից հետո պայմանական ազատ է արձակվել:
Եվս մեկ անգամ Կիրակոսյանը ձերբակալվել էր 2011թ. հունվարին՝ անօրինական զենք պահելու և դրա վաճառքով զբաղվելու, թմրանյութ պահելու համար: Վերջին անգամ նա ձերբակալվել է փետրվարի 2-ին, սակայն հենց նույն օրն ազատ է արձակվել 50 հազար դոլար գրավի դիմաց: