Դեղերի որակի ժամկետի հետ կապված ուսումնասիրություններ են կատարվում Դեղօգտագործողների գործակալության հետ, այս մասին լրագրողների հետ զրույցում ասաց Առողջապահության նախարար Հարություն Քուշկյանը։

2012թ-ի Առողջապահության նախարարության գերակա խնդիրներից է նշվել դեղորաքային շուկայի վերահսկողությունը՝ հատկապես կապված դեղորայքի գների աճի հետ, իսկ մենաշնորհային դիրքեր ունեցողների նկատմամբ խախտումների բացահայտման դեպքում նախարար Քուշկյանը պատժամիջոցներ է խոստանում:

Նախարարը տեղեկացրեց նաև, որ Առողջապահության նախարարությունը փորձելու է անել հնարավորը դեղերի գինը նվազեցնելու ուղղությամբ. «Ճիշտ է, դա ուղիղ մեր գործառույթը չէ, բայց քանի որ մեզ էլ է վերաբերում, մենք մեր ակտիվ աջակցությունը կունենանք, որպեսզի ոլորտի բոլոր թերությունները վերացվեն»:

Նախարարը չժխտեց, որ դեղերի շուկայում հանդիպում են ժամկետանց կամ անորակ դեղեր, սակայն, ըստ նրա, դրա մեղավորությունը այնքան էլ կապ չունի ներմուծողի հետ, եզրակացնելով. «Գուցե պահպանման մեխանիզմներն են խախտված:

Հարցին, թե` խախտումներ հայտնաբերելու դեպքում արդյո՞ք ոլորտի մոնոպոլիստները չեն խուսափի պատժամիջոցներից, Հարություն Քուշկյանն ասաց. «Բացառվում է։ Բարոյական նորմեր գոյություն ունի: Նախ ներմուծողը պետք է հասկանա, որ ինքը դեղ է ներկրում և ինքը իրավունք չունի անորակ կամ ժամկետնանց դեղ ներմուծել հանրապետություն»,:

Դե ինչ, եթե մեր հույսը բարոյական նորմերն են, ուրեմն հաշվի առնելով ներկրողներից ոմանց բարոյական կերպարը, դեռ վաղ է խոսել ոլորտի կարգավորման, կամ դեղորայքի շուկայի նկատմամաբ վստահության մասին: