Օրեր առաջ գործարար Սիլվա Համբարձումյանը հայտարարել էր, որ հանրապետական պատգամավոր Վարդան Այվազյանն իրեն պարտք է: «Պատմելու եմ ամեն ինչ, հիմա նա ուզում է գնալ` նորից կառավարելու: Տեսնեմ` ոնց է գնալու»,- հոխորտացել էր գործարար կինը եւ նշել, որ առաջիկա մամլո ասուլիսի ժամանակ կասի, թե «պարտքն ինչի համար է եղել, որ հասկանան, թե ովքեր են ՀՀԿ-ն շրջապատում»:

Yerkir.am-ը փորձեց անձամբ Այվազյանից ճշտել, թե ի՞նչ պարտքի մասին է խոսքը: Նախ, լսելով գործարար կնոջ անունը, Այվազյանը փորձեց հիշել նրա ազգանունը. «Սիլվա ի՞նչ ա, Հակոբյա՞ն», հիշելուց հետո էլ նշեց, որ չի հիշում, որ գործարար կնոջը պարտք լինի:

«Սիլվան ա էլի, ինչ ուզի կասի»,- հայտարարեց նա եւ ուշադրություն հրավիրեց այն փաստի վրա, թե այդ Սիլվան ինչու հենց նախընտրական շրջանում հիշեց, որ Այվազյանն իրեն պարտք է:

Հանրապետական պատգամավորը վրդովված է, որ գործարար կինը նման հայտարարություններ անում է հենց մամուլով: «Եթե բան ա ուզում ասի, թող գա կանգնի, ինձ ուղիղ ասի»,- նշեց Այվազյանը եւ հաստատեց, որ պարտքի մասին լուրերին ինքն էլ է մամուլից տեղեկանում, գործարար կինն անձամբ իրեն դեռ չի դիմել:

«Ոնց նայում եմ հանրապետության կեսը Սիլվային պարտք ա, եթե հայտարարում ա, որ ես էլ եմ իրեն պարտք, թող գոնե պարտքը վերցնելու տարեթիվն էլ ասի»,- ասաց Այվազյանը` կատակով հավելելով, որ եթե Քենեդիի սպանության մեջ էլ իրեն չմեղադրեն` էլի գոհ կլինի:

Պարտքի պատմությանն անդրադառնալ պատգամավորը չի ցանկանում, ինչպես նշում է` «կնոջ բազար է», իսկ Համբարձումյանի պնդումները, թե իր սկանդալային հայտարարություններով ՀՀԿ-ն կպայթեցնի, պատգամավորն առավել քան տարօրինակ է համարում:

«Հա’մ ուզում է ՀՀԿ մտնել, հա’մ էլ ՀՀԿ-ին դատի է տալիս: նշեց Այվազյանը: ՀՀԿ-ին Սիլվաները չեն կարող սպառնալ»:

Yerkir.am

Հ.Գ. Ի դեպ, մեր ունեցած տեղեկությամբ, Սիլվա Համբարձումյանին մերժել են ընդունել, ոչ միայն ՀՀկ-ում, այլ նաև ԲՀԿ-ում:Դե ինչ տիկնոջը մնաց ընտրություն կատարել  ընդիմության դաշտում:Բայց նրա համար այնտեղ դժվար կլինի, տիկինը շատ է սիրում իշխանություն ու իշխանամերձ շրջանակները: