Այսօր լրագրողների հետ հանդիպման ժամանակ  ՀՀ նախագահին առընթեր Սևանա լճի հիմնահարցերի հանձնաժողովի նախագահ Վլադիմիր Մովսիսյանը հայտնեց,  որ  Սևանի մակարդակը ներկայումս  գտնվում է 1900.19 մետրի վրա:

2001 թ. ընդունված օրենքների համաձայն` Սևանա լճի մակարդակը 10 տարում պետք է բարձրանար 216 սմ, սակայն բարձրացել է 380 սմ-ով, որից 126 սմ` վերջին 3 տարում; Այսինքն` տարեկան միջին հաշվով Սևանը բարձրանում է  30 սմ-ով, իսկ վերջին 3 տարում` 42 սմ-ով:

Զուգահեռ` նվազել է Սևան լճից ջրի բացթողումը: Ըստ օրենքի` այն չի կարող գերազանցել տարեկան 170 մլն խոր. մետր ծավալը, փաստացի միջինը կազմում  է 158 մլն խոր. մետր:

Ներկայումս, ըստ Վլ. Մովսիսյանի, Սևանա լճի մակարդակը հավասարվել է 1963 թ. մակարդակին:

«Վերջին 10 տարվա ընթացքում երբևէ չի եղել Սևանի ջրի բացթողնման ու ներհոսքի բացասական հաշվեկշիռ»,- ասաց Վլադիմիր  Մովսիսյանը:

Չնայած այս ոգևորող ցուցանիշներին,   պետք  է փաստել,  որ դեռևս անլուծելի են մնում ջրի  բարձրացման հետևանքով առաջացած խնդիրները: Մենք   նախորդ հրապարակումներում անդրադարձել էինք  այս խնդիրներին.  երբ առափնյա մի շարք գյուղերի բնակիչներ բողոքում էին բնակարանների խոնավ լինելուց,  պադվալային հարկերում  ջրի առկայությունից, որն էլ իր հերթին ծնում է մի շարք հիվանդություններ: Մինչդեռ,  մինչ  օրս պարզ չէ,  թե ինչպես է փոխհատուցվելու այդ վնասները: Կամ մի քանի տարի հետո ի՞նչ ճակատագիր է սպասվում  «Հայկական Վենետիկի» բնակիչներին: