Այսօր փետրվարի 29-ի առավոտյան ՊԲ հյուսիսային ուղղությամբ տեղակայված զորամասերից մեկի դիտակետում սպանված 19-ամյա Տիգրան Վարյանի վերաբերյալ տեղեկություններ է հաղորդել դիահերձմանը մասնակցած Հելսինկյան ասոցիացիայի փորձագետ Ռուբեն Մարտիրոսյանը:

Նա «Ա1+»-ի լրագրողին հայտնել է, որ Տիգրան Վարյանի դիակի վրա առկա են բռնության, խոշտանգման հետքեր՝  քթարմատին, բերանի շրջանում սալջարդեր և քերծվածքներ, ծնոտի դիմային գծի ներքևի հատվածում, հրազենային վերքից մի քանի սանտիմետր ներքև՝ երկարավուն կապտուկ։

Փորձագետի կարծիքով` տղան, ըստ երևույթին, դիմադրել է մի քանի հոգու, և մարդասպաններից մի քանիսը պահել են նրան, մեկը կրակել է։

Ռուբեն Մարտիրոսյանը, զինվորի դիակի զննությունից ստացած տպավորությունից ելնելով, նրա մահը գնահատել է որպես դիտավորյալ սպանություն։ Նա նաև նշել է, որ վերքերը երեխան ստացել է մահվանից մի քանի րոպե առաջ։

Տիգրան Վարյանի մահվան առիթով Քրեական օրենսգրքի 110 հոդվածի 1-ին մասով գործ հարուցելը (ինքնասպանության հասցնելը) Հելսինկյան ասոցիացիայի փորձագետը համարում է ապօրինի և համարում է, որ պետք է այն որակել որպես առանձնակի դաժանությամբ դիտավորյալ սպանություն։

Նա ՊՆ քննչական ծառայության աշխատակից Յուրա Բադալյանին հայտնել է իր կարծիքը։ Ըստ պարոն Մարտիրոսյանի՝ Յուրա Բադալյանն ասել է, որ մի անգամ էլ կնայեն, եթե կարողանան, հոդվածը կփոխեն։