ԱԺ պետաիրավական հարցերի մշտական հանձնաժողովում Դավիթ Հարությունյանի նախագահությամբ տեղի է ունեցել ԱԺ պետական-իրավական հարցերի մշտական հանձնաժողովի նիստ, որտեղ քննարկվել են և դրական եզրակացություն ստացել մի խումբ օրինագծեր.

ՀՀ ԱԺ հասարակայնության և տեղեկատվության միջոցների հետ կապերի վարչությունից  տեղեկացնում են, որ առաջին ընթերցմամբ հանձնաժողովը քննարկել է ՀՀ կառավարության հեղինակած «ՀՀ քրեակատարողական օրենսգրքում փոփոխություններ և լրացումներ կատարելու մասին» ՀՀ օրենքի նախագիծը:
ՀՀ արդարադատության նախարար Հրայր Թովմասյանի տեղեկացմամբ` փոփոխություններով առաջարկվում է սահմանել, որ 14-18 տարեկան անչափահաս դատապարտյալներն առանձին պահվեն չափահաս դատապարտյալներից, ինչը կբացառի վերջիններիս վտանգավոր ազդեցությունն անչափահաս դատապարտյալների վրա:

Ըստ հեղինակի` նախագծի ընդունման արդյունքում հնարավորություն կլինի հանցագործություն կատարած անչափահասներին պատիժը կրել միևնույն քրեակատարողական հիմնարկում (չափահաս դառնալուց հետո` անչափահասներից անջատ): Մինչև նշանակված պատժի ավարտը չի ընդհատվի ուղղիչ-դաստիարակչական աշխատանքների կատարումը միևնույն հիմնարկում, ինչն առավել արդյունավետ կլինի:
Սրանից բացի` քրեակատարողական հիմնարկի պետը դատարանի որոշման հիման վրա հնարավորություն կունենա սահմանափակելու դատապարտյալի նամակագրության գաղտնիության իրավունքը, որը, ըստ նախարարի` կնպաստի քրեակատարողական հիմնարկում անվտանգության և ուղղիչ հիմնարկի ներքին կանոնակարգի պահպանմանը, հանրության առողջության և բարոյականության, այլոց սահմանադրական իրավունքների պաշտպանությանը, այդ թվում նաև` այլ դատապարտյալների սոցիալական վերականգնմանը խոչընդոտող անմիջական վտանգի կանխմանը:

Հանձնաժողովի անդամները որոշ մտահոգություններ են ունեցել` կապված դատապարտյալների նամակագրության սահմանափակումների հետ: Համաձայնություն է կայացվել հետագա քննարկումների ընթացքում օրինագիծը լրամշակել և դարձնել երկուստեք ընդունելի: Օրինագիծը հանձնաժողովի դրական եզրակացությամբ ընդգրկվելու է ԱԺ գարնանային և առաջիկա քառօրյա նիստերի օրակարգերի նախագծերում:

Առաջին ընթերցմամբ քննարկվել է ՀՀ կառավարության հեղինակած «Արտակարգ դրության իրավական ռեժիմի մասին» և «Վարչական իրավախախտումների վերաբերյալ ՀՀ օրենսգրքում լրացում կատարելու մասին» օրինագծերի փաթեթը և դրական եզրակացություն է ստացել առաջիկա քառօրյա նիստերի օրակարգում քննարկվելու համար: Երկրորդ և երրորդ ընթերցմամբ քննարկումները ևս նախատեսվում է իրականացնել այս քառօրյա նիստերի ընթացքում:

Երկրորդ ընթերցմամբ հանձնաժողովը քննարկել է պատգամավորներ Դավիթ Հարությունյանի, Վարդան Բոստանջյանի, Հեղինե Բիշարյանի հեղինակած «Ազգային ժողովի կանոնակարգ» ՀՀ օրենքում փոփոխություններ և լրացումներ կատարելու մասին» օրինագիծը` կից օրենսդրական փաթեթով, որը ևս ստացել է հանձնաժողովի դրական եզրակացությունը:

Մինչև 15 օրով հետաձգվել է ՀՀ կառավարության «ՀՀ քաղաքացիական դատավարության օրենսգրքում լրացումներ կատարելու մասին» օրենքի նախագծի քննարկումը: