Այսօր` ԿԳՆ-ում տեղի ունեցած կոլեգիայի նիստում ԿԳ Նախարար Արմեն Աշոտյանը մտահոգիչ է համարել, այն, որ սոցիոլոգիական հարցումները փաստում են. կրթության ոլորտում կոռուպցիոն ռիսկերը բավարար տեմպով չեն նվազում:
Դժգոհությունը հիմնականում պայմանավորված է դպրոցներում ապօրինի դրամահավաքով: Դա հաստատվել է ԿԳՆ «Թեժ գիծ» հեռախոսակապով ստացված ահազանգերի ուսումնասիրությությամբ: «Մենք պետք է ամեն ինչ անենք, որ ծնողական համայնքի աջակցությունը դպրոցին լինի բացառապես օրինականության սահմաններում: Այսինքն՝ աջակցությունը պետք է լինի բացառապես կամավորության սկզբունքով, փոխանցումը՝ դպրոցի բանկային հաշվին և կուտակված միջոցների օգտագործումը՝ թափանցիկ և նպատակային»,- նշել է ԿԳ նախարարը:
Խորհրդակցության ընթացքում անդրադարձ է եղել նաեւ դպրոցների ֆինանասավորմանը, Այստեղ է թաղված շան գլուխը ու նախարարն էլ շատ լավ գիտե, որ դրամահավաքությունը` որ որոշ դպրոցներում արդեն ուսուցիչներին է հասել, կապված է սուղ ֆինանսավորման հետ: Տնօրենները ստիպված են ինչ –ինչ քայլերի գնալ պահպանելու դպրոցի գոյության իրավունքը:
Նախարարը անդրադարձել է նաև դասագրքերին, ուսուցիչների վերապատրաստմանը և ատեստավորմանը, ՀՀ բուհերի նախորդ տարվա հաշվետվություններին ու համակարգի ֆինանսավորմանը վերաբերող մի շարք խնդիրների: Նիստի ընթացքում քննարկվել են նաև ՀՀ կառավարության հակակոռուպցիոն ռազմավարական ծրագրի կրթության ոլորտի գերակա 2012 թվականի միջոցառումները:
Խոսվել է նաև տնօրենների մրցույթների մասին. 2011 թվականի սեպտեմբերից մինչեւ դեկտեմբերի վերջն ընկած ժամանակահատվածում հանրապետության ավելի քան 900 դպրոցներում տեղի են ունեցել տնօրենների մրցույթներ, որոնցից ընդամենը մեկ տասնյակի` այսինքն մոտ 1 տոկոսի վերաբերյալ են բողոքներ ու դժգոհություններ եղել. «Այնուամենայնիվ որոշ դպրոցներում կա դպրոցի տնօրենի ընտրության գործընթացի հետ կապված խնդիր, որն անհրաժեշտ է կարգավորել տվյալ համայնքի բնակչության եւ մարզպետարանի լիազորությունների, ինչպես նաեւ նախարարության քաղաքականության համատեքստում»:
Աշոտյանը համոզված է, որ տեսչական ստուգումների ընթացքում հայտնաբերված խախտումներն ու թերությունները վերացնելու ուղղությամբ ավելի հետևողական աշխատանքի անհրաժեշտություն կա: