Այսօր Ճանապարհային ոստիկանության նախկին պետ Մարգար Օհանյանի գործով հերթական դատական նիստին` վկա, ՃՈ առաջին սպայական գումարտակի հրամանատար Եղիշե Ենգիբարյանը փոխել է ցուցմունքը:

Մենք դատավարության սկզբում գրել էինք, որ կայացվել է որոշում Մարգար Օհանյանին հնարավորինս մեղմ պատժելու  մասին. Այսինքն շատ հնարավոր է, որ ՃՈ նախկին պետը տուն գնա դատարանի դահլիճից, պայմանական պատժաչափով: Արդյո՞ք այս սցենարով է պայմանավորված վկայի այսօրվա պահվածքը, թե նա ակամա է բացահայտել քննչկան խայտառակ մոտեցումը, որ արմատացած է նախաքննության պրակտիկայում, պարզ չէ.

Դատավորի հարցին, թե վկան ինչու է մի բան գրել,  այլ բան ասում, Ենգիբարյանն ասաց, որ քննիչն ասել է գրի, ինքն էլ գրել է.«Քննիչին ասել եմ, լսել եմ, ասել ա դե գրի, որ եղել ա, տենց էլ գրել եմ, բայց իմ վաշտի հետ կապված բենզինի դեպք չի եղել»,- պատմել է Ենգիբարյանը:

Գնդապետ Եղիշե Ենգիբարյանը նաև ասել է, որ իր` վաշտի հրամանատար եղած ժամանակ երբեք խնդիր չի եղել բենզինի հետ, սակայն մեղադրող դատախազը հակասություն գտնելով վկայի նախաքննական և դատաքննական ցուցմունքների մեջ, հրապարակել է վկայի նախնական ցուցմունքները:

Մեղադրողը նաև վկային հարցրել է, թե արդյո՞ք ինչ-որ մեկն իրեն խնդրել է, փոխելու ցուցմունքը, վերջինս ասել է`ոչ:

Մարգար Օհանյանն էլ իր հերթին վկայից հարցրել է, թե որ ցուցմունքն է ճիշտ, սա՞, թե` նախաքննության ժամանակ տվածը, վկան` թե. «Այսօրվա ասածս, պարոն Օհանյան»:

Հաջորդ վկան` Հենրիկ Հովհաննիսյանը հայտարարել է, թե գումարտակի հրամանատար Ստեփան Կարախանյանից ստացել է 6 հազար լիտր բենզին, սակայն հաշվետվություններում ներկայացրել է 15 հազար: Հարցին, թե հարցրել է արդյո՞ք իր գումարտակի ղեկավարին, թե ինչու է պակաս քանակությամբ բենզին տրվում, վկան ասել է, թե իրեն պատճառաբանել են, որ անվադողեր ու պահեստամասեր են գնելու:

Մյուս վկան` 2-րդ գումարտակի 4-րդ վաշտի հրամանատար Սերյոժա Հակոբյանը դատարանում նկատել է, թե ամսական ստացել է 4-4.5 տոննա  բենզին, սակայն տարբեր ամիսների ստորագրել է այլ թվերի տակ: Օրինակ, 2011թ-ի հունվարից հետո 8-12 տոննայի տակ է ստորագրել: Ի դեպ, այս վկան բավականին լավատեղյակ էր հաշվետվության թվերից, դատարանում պարզվեց, որ քննիչները հարցաքննության ընթացքում ցույց են տվել հաշվետվությունը և ասել են գրի:

Ցուցմունք է տվել նաև 2-րդ սպայական գումարտակի 5-րդ վաշտի հրամանատարի տեղակալ Կարո Կարապետյանը, ով ևս պնդել է, թե վաշտը քիչ բենզին է ստացել, սակայն ստորագրել են ավելի մեծ թվի տակ:

Հարցաքննվածները Մարգար Օհանյանի հետ անմիջական կապ չեն ունեցել, այլ բենզինի կտրոնները ստացել են Ստեփան Կարախանյանից:

Մյուս վկան` Երևանի ՃՈ նախկին պետ Արսեն Արշակյանը դատական նիստին չի ներկայացել, և դատավոր Պապոյանը դատավարությունը հետաձգել է մինչեւ փետրվարի 2-ը, ժամը 11:30-ը: