Թերթի խմբագիրն անդրադարձել է վարչապետի՝ Թաթայի համերգի ժամանակ ունեցած ելույթին, որի ժամանակ, ըստ որոշ տեսակետների, Տիգրան Սարգսյանը ալկոհոլի ազդեցության տակ էր։

«Այն տղամարդը, որը չի հասել ալկոհոլային այն կոնդիցիային, որին հասել էր վարչապետ Տիգրան Սարգսյանը, իմ մեջ որոշակի կասկածներ է առաջացնում: Ուրեմն, մտածում եմ ես, այդ` երբեք չհարբող մարդը կամ չափազանց հաշվենկատ է, կամ կյանքի ընկալումը նրա համար չափից դուրս «ճիշտ է» և, հետևաբար, տաղտկալի է կամ, վատագույն դեպքում, աղանդավոր: Եթե մարդու «քեֆը լավ է լինում» (իհարկե, որոշակի պարբերականությամբ` ոչ ամեն օր և նույնիսկ` ոչ շաբաթը մեկ), դա, իմ կարծիքով, նրան լավ է բնութագրում: Չկա այստեղ ոչ մի «կոմպրոմատ». եթե այդ վիճակում մարդուն նկարահանում են և ցույց տալիս, տեսնողները իսկապես պետք է զվարճանան` ոչ ավելին: Բորիս Ելցինն ավելի «խորացած» վիճակում Գերմանիայում զինվորական նվագախումբ էր «ղեկավարում», բայց, միևնույն է, նա պատմության մեջ մնաց որպես նշանավոր պետական գործիչ և, ի դեպ, որպես Հայաստանի հավատարիմ բարեկամ: Ուրիշ հարց, որ վարչապետ Սարգսյանը չպիտի հերքեր ակնհայտ իրողությունը, դա էլ մեր իշխանավորների սովորությունն է` հերքել ամեն ինչ, անկախ նրանից` դա իրենց օգուտ է, թե վնաս»,- գրում է թերթի խմբագիրը:

Ըստ նրա՝ այս ամենի արդյունքում ամենազվարճալին կլինի այն, որ վարչապետին գործից հանեն մի երկու բաժակ ավելի խմելու, ոչ թե տնտեսության անմխիթար վիճակի պատճառով: