Աղմկոտ պաշտոնանկությունների շքերթը երեկ ստացավ, թերևս, ամենաանսպասելի դրսևորումը. Սերժ Սարգսյանի հրամանագրով ` Միքայել Մինասյանը, նույն ինքը` փեսա Միշիկը, ազատվել է նախագահի աշխատակազմի ղեկավարի տեղակալի պաշտոնից: Որքան էլ անսպասելի, այս պաշտոնանկությունը մտնում է վերջին օրերի զարգացումների տրամաբանության մեջ: Թե Հովիկ Աբրահամյանը, թե ԱԼիկ Սարգսյանը պաշտոնանկ են արվել այն բանի համար, որ իրենց գործողություններով կասկածի տակ են դրել Սերժ Սարգսյանի, որպես վարչախմբի միակ տիրակալի գործառույթը: Նույնը վերաբերում է նաև Միքայել Մինասյանին: Վերջինս արդեն երկար ժամանակ գորշ կարդինալի համարում ունի և շատ դեպքերում ընկալվում է որպես իշխանության ամենաազդեցիկ եռյակի անդամ, որ գրեթե անսահմանափակ ազդեցություն ունի Սերժ Սարգսյանի վրա: Մինասյանի գործողությունների արդյունք են համարվում, մասնավորապես, Երևանի նախկին քաղաքապետ Գագիկ Բեգլարյանի, Սերժ Սարգսյանի աշխատակազմի ղեկավար Կարեն Կարապետյանի պաշտոնանկությունները: Հերթի հիմա, փաստորեն, հասավ նաև իրեն: Ինչ խնդիր է լուծում այս պաշտոնանկությամբ Սերժ Սարգսյանը: Մի քանի. նախ` իր վարչախմբի ներկայացուցիչներին հստակ ուղերձ է հղում, որ ինքն ամբողջությամբ տիրապետումէ իրավիճակին և ամենևին էլ սեփական փեսայի խամաճիկի կարգավիճակում չէ, ինչպես պնդում են ոմանք: Երկրորդ` այսպիսով ժեստ է անում օլիգարխների հասցեին, քանի որ Միքայել Մինասյանը համարվում է օլիգարխիական բիզնեսները խլելու և և դրանք ավելի «ցիվիլ. Գործարարների հանձնելու ջատագով: Սա ակնհայտ դարձավ նաև վիկիլիքսյան բացահայտումներից հետո, երբ Մինասյանը և իր հովանավորյալ, Սերժ Սարգսյանի օգնական Լևոն Մարտիրոսյանը ամերիկացի դիվանագետների հետ հանդիպման ժամանակ ասել էին, որ Սերժ Սարգսյանի իշխանության գալուց հետո օլիգարխները ասպարեզից հեռացվելու են:
Մինասյանի հեռացմամբ` Սերժ Սարգսյանը ամրացնում է նաև իր հանրապետական հենարանները, որովհետև արդեն երկար ժամանակ խոսվում է, որ Միքայել Մինասյանը ուզում է հին հանրապետականներին դուրս մղել ՀՀԿ համամասնական ցուցակից և համալրել նոր հանրապետականներով, կամ ավելի ճիշտ` ՄԻԱԿ-ականներով: Հիմա, փաստորեն, հին հանրապետականներն ավելի հանգիստ կլինեն և դեպի ԲՀԿ խաղեր տալու կարիք չեն ունենա:
Սարգսյանը Մինասյանին, թերևս, պատժել է նաև նրա համար, որ նա որոշակի դերակատարում է ունեցել ՀՀԿ-ԲՀԿ հարաբերությունների լարման գործում և չափից ավելի վաղաժամ ամբիցիաներ է ցուցադրել` շատերին հիմք տալով պնդելու, որ ինքն իրեն տեսնում է Սերժ Սարգսյանի ժառանգորդի դերում: Մինասյանի պաշտոնանկությւոնը նաև գագիկ Ծառւկյանին և նրա շրջապատռին ահաբեկելու ակտ է, որ նրանք հասկանան` եթե փեսայի հետ է այդպես վարվում, բա մեզ հետ ինչ կանի: