Այսօր Քրեական գործերով վերաքննիչ դատարանում սկսվեց Ղարիբյան եղբայրների հակամարտության հերթական դատական նիստը: Նախ նշենք, որ այս գործով Աջափնյակ և Դավթաշեն համայնքների ընդհանուր իրավասության դատարանը արդարացրել է ավագ եղբորը` Մանվել Ղարիբյանին, որին կրտսերը` Վարշամ Ղարիբյանը, մեղադրում է խարդախության մեջ: Ըստ այդ մեղադրանքի` ավագ եղբայրը, եղբայրական կապերի օգտագործմամբ, չարաշահելով վստահությունը, 2005թ. սեպտեմբեր-նոյեմբեր ամիսների ընթացքում `«Շանթ Պլյուս» ՍՊ անունով կատարել է մի շարք գործարքներ և  ձեռք  բերել տրանսպորտային միջոցներ`(Կամազ 5511 մակնիշի և Մերսեդես Բենց 220-S-430)` վերջինիս պատճառելով 16.800.000 ՀՀ դրամ արժողությամբ գույքային վնաս` հափշտակելով  Վարշամ Ղարիբյանի կողմից գնված ավտոմեքենաները:

Նախագահող դատավորը Սերժիկ Ավետիսյանն էր: Նիստին ներկայացել էին դատախազ Նաիրի Ավագյանը, ամբաստանյալ Մանվել Ղարիբյանը, վերջինիս պաշտպաններ  Հայկ Ալումյանն ու Բագրատ Վարդանյանը, տուժող կողմից ներկա էր միայն պաշտպան Գրիգորի Շահվերդյանը, իսկ տուժող Վարշամ Ղարիբյանն ու մյուս պաշտպան Ա. Շահբազյանը ներկա չէին և հարկ էլ չէին համարել զգուշացրել իրենց բացակայության մասին:

Նախ ընդգծվեց փաստը, որ Աջափնյակ և Դավթաշեն ընդհանուր իրավասության դատարանի կողմից սույն թվականի օգոստոսի 22-ին կայացրած դատավճռով Մանվել Արամի Ղարիբյանը ՀՀ օրենսգրքի 178| 3-րդ մասի 1 կետով և 325 հոդվածի 1 մասով ճանաչվել է անպարտելի ու հաստատվել է նրա անմեղությունը:

Սույն դատավճռի դեմ սեպտեմբերի 12-ին  վերաքննիչ բողոք են ներկայացրել մեղադրող Ավագյանն ու տուժողի պաշտպանները` պնդումով, որ դատավճիռը ենթակա է բեկանման  և պետք է ամբաստանյալի նկատմամբ նշանակել պատիժ:

Նշենք, որ 2005 թվականին կատարված գործարքների անօրինական լինելը շահարկվել է հինգ տարի անց` 2010թ, երբ երկու եղբայրների միջև, առաջացան որոշակի տարաձայնություններ:

Մեղադրողի խոսքով` դատարանը պատշաճ քննության չի ենթարկել սույն գործով ձեռք բերված ապացույցները և միջնորդում էր, որպեսզի սույն գործը նոր քննության ուղարկվի: Տուժողի պաշտպան Շահվերդյանը ևս պնդում էր բեկանել առաջին ատյանի կայացրած վճիռը և փոփոխել մեղադրանքի ծավալը: Շահվերդյանն ինչպես նախորդ դատավարության ժամանակ «ինքնատիպ» էր իր որակումներով. խճճվում էր դրանք շարադրելիս, որով դատարանին մի փոքր զվարճացնում էր: Ըստ նրա` դատարանը սխալ դատավճիռ է կայացրել. «Որտեղ եղել է փակուղի, դատարանն այն շրջանցել է և ներքին համոզման հիման վրա որոշումներ է կայացրել, այդպես չի կարելի. ամեն ինչ պիտի օրենքի սահմաններում արվի ու ըստ օրենքի: Դատարանն ասում է, թե եղբայրը չի կարող եղբոր վստահությունը չարաշահել, դատարանն ինչի՞ց ելնելով է դա ասել»:

Նա նաև մի հետաքրքիր ինքնախոստովանություն արեց, որ չէր վրիպել նաև պաշտպան Ալումյանի աչքից. Շահվերդյանը բողոքի ներկայացման ընթացքում նշեց. «Քանի որ իմ  ու դատախազի բողոքները մի շարք հարցերում համընկնում են, դրա համար նրա բերած դրույթները այժմ ես չեմ կրկնի»:

Ալումյանը ներկայացրեց դատախազի ու տուժող կողմի ներկայացրած դիմում –բողոքի` մոտավորապես 7 էջ, որտեղ բառացի կրկնվում են պարբերությունները: Մենք մեղադրող կողմից փորձեցինք ճշտել, թե ինչպես կբացատրեն բառացի կրկնության փաստը, ի վերջո, ո՞վ ումից է արտագրել.  «Ոչ մի բառացի կրկնություն չկա.  գուցե բովանդակային առումով համընկնումներ լինեն, քանի որ երկուսս էլ նույն դրույթների ու նույն սխալների հիման վրա ենք ներկայացրել մեր դիմում- բողոքները»,- ասաց  մեղադրող  Ավագյանը: Սակայն մեզ տրամադրած երկու փաստաթուղթը ուսումնասիրելիս, ակնհայտ է, որ բողոք բերողները գոնե հանուն պատշաճության իրենց նեղություն չեն տվել մի փոքր աշխատել հայցադիմումի վրա:

Դատական նիստը հետաձգվեց, քանի որ դատարանը ծանրաբեռնված գրաֆիկով է աշխատում:

Աննա Ալեքսանյան