Ֆրանսիայի նախագահ Նիկոլա Սարկոզին իր խորհրդականների հետ քննարկման ժամանակ որևէ ափսոսանք չի հայտնել օրեր առաջ Երևանում Հայոց ցեղասպանության վերաբերյալ արած հայտարարության համար։

Թուրքական լրատվամիջոցները, վկայակոչելով ֆրանսիական մամուլը, տեղեկացնում են, թե Սարկոզիի խորհրդականները զգուշացրել են Անկարայի կողմից սպասվելիք լուրջ հակազդեցության մասին, որին ի պատասխան Ֆրանսիայի նախագահն ասել է. «Ըստ էության, թուրքերն ինձ ատում են, այնպես որ, խնդիր չէ»։

Հիշեցնենք, որ օրեր առաջ Ֆրանսիայի նախագահ Նիկոլա Սարկոզին Երևանում այցելել էր Ծիծեռնակաբերդի հուշահամալիր, որտեղ հայտարարել էր, որ եթե Թուրքիան չճանաչի Հայոց ցեղասպանությունը, Ֆրանսիան կընդունի ժխտումը քրեականացնող օրենքը։
Ֆրանսիայի նախագահի այդ հայտարարությունը քննադատել էր Անկարան։

«Սարկոզին Թուրքիային սեփական անցյալի հետ առերեսման խորհուրդ տալուց առաջ լավ կլինի՝ նայի հայելու մեջ»,– ասել էր Թուրքիայի արտգործնախարար Ահմեթ Դավութօղլուն։