Հայաստանի երիտասարդական հիմնադրամի աջակցությամբ Խ. Աբովյանի անվան հայկական պետական մանկավարժական համալսարանի ուսանողական խորհուրդը կհրատարակի «Ապագա մանկավարժ» ուսանողական ամսաթերթը։ Թերթի հրատարակումը կնպաստի ուսանողական ինքնակառավարման զարգացմանը, ինչպես նաև կլուսաբանվեն ուսանողական հիմնախնդիրներն ու երիտասարդական միջոցառումները։ Պարբերականի հրատարակումը ստեղծագործող ուսանողներին հնարավորություն կտա տպագրել իրենց ստեղծագործություններն ու հոդվածները։

Հայաստանի երիտասարդական հիմնադրամի տարածած հաղորդագրությունում նշվում է, որ «Ապագա մանկավարժը» ՀՀ ուսանողական ինքնակառավարման մարմինների կողմից տպագրվող առաջին պարբերականներից է: Այն հրատարակվել է 2002-2009թթ.: Պարբերականի վերահրատարակումը թերթի շուրջ կհամախմբի բազմաթիվ ակտիվ և ստեղծագործող ուսանողների։ Բացի այդ, համալսարանի Կուլտուրայի ֆակուլտետի Լրագրության բաժնի շնորհալի ուսանողները կընդգրկվեն ամսաթերթի հրատարակման աշխատանքներում՝ կատարելով իրենց մասնագիտական գործունեության առաջին փորձը:

1000 օրինակ տպաքանակով «Ապագա մանկավարժ» ուսանողական ամսաթերթը բաղկացած է 24 էջից, ամբողջությամբ գունավոր է, ունենալու է նաև ռուսերեն և անգլերեն էջեր։ Թերթի հիմնական խորագրերն են` «Մեր մշակույթը», «Մեր հայտնի շրջանավարտները», «Մեր մեծերը», «Մեր ֆակուլտետները», «Ազգային դաստիարակություն», «Ստեղծագործում են ուսանողները»։