Սեպտեմբերի 20-ին իր դռները կբացի Մատենադարանի նորակառույց մասնաշենքը: Ներկայումս ավարտին են հասցվում կահավորման եւ հարդարման աշխատանքները:Մատենադարանի նոր մասնաշենքը հագեցած է նորագույն ինժեներական համակարգերով՝ անվտանգության, հակահրդեհային, օդափոխության, ջերմաստիճանի պահպանման և այլ  հնարավորություններով:

Մասնաշենքը նախատեսված է գիտահետազոտական գործունեության, ձեռագրերի, արխիվային փաստաթղթերի եւ գրադարանային ֆոնդերի պահպանության, վերականգնման, թվայնացման աշխատանքների կազմակերպման, գիտաշխատողների սպասարկման, գիտաժողովների անցկացման համար (նոր սարքավորումների օգնությամբ հնարավոր կլինի դահլիճում ֆիլմերի դիտումներ, տարբեր գիտաժողովներ եւ  շնորհանդեսներ կազմակերպել): 200 հոգու համար նախատեսված է դահլիճ` տեսահամակարգերով եւ 4 լեզվով միաժամանակյա  թարգմանություն կատարելու հնարավորությամբ։

Նշենք, որ Մատենադարանի նորակառույց մասնաշենքի շինարարական աշխատանքները սկսվել էին դեռեւս երկու տարի առաջ: Միայն դահլիճի սարքավորումներն արժեն մոտ 40 հազ դոլար, իսկ շենքի ընդհանուր արժեքը կազմում է մոտ 14 մլն դոլար, որը ներդրվել է մի քանի հովանավորների կողմից։