Թերթի խմբագիրը գրում է. «Եթե թուրքական կամ ադրբեջանական կողմն ունի հավելյալ ձայնագրություն կամ տեսագրություն, որտեղ մեր երկրի ղեկավարն ասում է. «Շուտ արեք՝ վերցրեք թուր ու թվանքը և ազատագրեք մեր պատմական հողերը», ապա հարևանների դժգոհությունն արդարացված կլիներ։ Բայց այն, ինչ հնչել է «պաշտոնապես», իմ ընկալմամբ, հետևյալն է. մեր սերունդը կարողացել է թշնամուց պաշտպանել մեր հայրենիքի մի հատվածը, իսկ դուք՝ երիտասարդներդ, եթե կարող եք, արեք ավելին։ Հայաստանի երեք նախագահները, ինչպես նաև բազմաթիվ այլ պաշտոնյաներ, այս 17 տարում մի քանի տասնյակ անգամ արտահայտվել են այս ոգով, երբեմն` ավելի սուր. այստեղ ոչ մի ագրեսիա կամ «ոչ խաղաղասիրական» դրսևորում չկա։ Ընդհակառակը` ազգայնականը գուցե մեղադրի նախագահին՝ ինչո՞ւ եք Հայ դատի և Սևրի քարտեզի սրբազան գործը թողնում այլ սերունդների վրա։
Պետք է նաև հաշվի առնել, թե ովքեր են այն «խաղաղասերներն» ու «հանդուրժողները», որոնք դժգոհ են մնացել Սերժ Սարգսյանի արտահայտություններից։ Այդ Իլհամ Ալիևն է օրումեջ սպառնում, որ կհարձակվի մեզ վրա, այդ Ադրբեջանի սահմանից են հետ ուղարկում հայկական ազգանունով ցանկացած մարդու՝ անկախ քաղաքացիությունից, այդ թվում՝ սպորտսմեններին ու լրագրողներին։ Այդ Էրդողանն էր սպառնում, որ հայերին կարտաքսի Թուրքիայից, նույն այդ երկրում են երիտասարդին դաստիարակել այնպես, որ նա սպանել է հայ խմբագրին»։