Ներկայիս գործող ԿԸՀ-ի լիազորությունները կավարտվեն հուլիսի 14 –ին:

ՀՀ Մարդու իրավունքների պաշտպանը ամփոփել է Կենտրոնական ընտրական հանձնաժողովի իրեն վերապահված 3 անդամների համար հայտարարված մրցույթն ու հայտարարել իր թեկնածուներին: Ըստ կանոնակարգի նրանց հաստատելու համար ներկայացվելու են նախագահ Սարգսյանին:

Նշենք, որ Ընտրական օրենսգրքի փոփոխությունների համաձայն, ԿԸՀ երեքական անդամի նշանակում է օմբուդսմենը, 2-ին` Փաստաբանների պալատը, 2-ին` Վճռաբեկ դատարանը:

Ընտրությունը հաղթահարած թեկնածուների վերաբերյալ պաշտպանի գրասենյակը հաղորդագրություն է տարածել. Արտակ Մելիքսեթյան, Աիդա Մուրադյան եւ Ռոզա Ստեփանյան:

Արտակ Մելիքսեթյանը (35տարեկան) էկոնոմիկայի նախարարության Լիցենզավորման եւ թույլտվությունների գործակալության պետն է: Մյուս երկուսը 2008 — 2011 Անդրեասյանի տնօրինությամբ գործող«Դիֆենս»  ընկերության աշխատակիցներ են. Աիդա Մուրադյանը (23 տարեկան) 2007-2009 թվականներին աշխատել է «Դիֆենս» իրավաբանական ընկերությունում որպես իրավաբան: Ռոզա Ստեփանյանը (25տարեկան) 2009ից մինչ օրս է աշխատում նույն ընկերությունում` որպես իրավաբան:

Մարդու իրավունքների պաշտպանի գրասենյակը հաղորդագրություն է տարածել. «Մրցութային հանձնաժողովը ստացել է 22 հայտ, որից 18-ը, ըստ ներկայացրած փաստաթղթերի, անցել են երկրորդ փուլ եւ հրավիրվել են հարցազրույցի:  Հարցազրույցի փուլ չեն անցել միայն այն 4 հայտատուները, որոնց աշխատանքային փորձը չի համապատասխանել օրենքով սահմանված պահանջներին կամ հայտում չեն ներկայացվել համապատասխան տվյալներ այդ մասին:18 թեկնածուներից  2-ը հարցազրույցի փուլը չեն հաղթահարել ՀՀ օրենսդրության եւ ներկայիս ընտրական մեխանիզմների ոչ լիարժեք գիտելիքների պատճառով:  Ըստ փաստաթղթերի տվյալների,  ընտրվելու լուրջ  հավակնություն ներկայացնող  5 հայտատու ինքնակամ հրաժարվել են: 4 թեկնածու պատշաճ չեն հիմնավորել իրենց քաղաքական չեզոքությունը: Հարցազրույցի փուլը չեն հաղթահարել նաեւ  մարդու իրավունքների պաշտպանության ոլորտի հետ առնչություն չունեցած  կամ արժանահավատ նվիրվածություն չդրսեւորած  4 հայտատու»:

Ի դեպ, հաղորդագրության մեջ նշվում է, որ Ընտրության հնարավորությունները  սահմանափակ են եղել: Չնայած դրան Անդրեասյանի քննությունը չբռնած թեկնածուների ցանկում են ԿԸՀ ներկայիս նախագահ Գարեգին Ազարյանը, քարտուղար Աբրամ Բախչագուլյանը, փաստաբան Վարդան Զուռնաչյանը:

Ի դեպ, երեք թեկնածուներից միայն Ռոզա Ստեփանյանը որոշակի փորձ ունի ընտրությունների անցկացման ոլորտում` 2007թ. մայիսին տեղի ունեցած ՀՀ խորհրդարանական եւ 2008թ. փետրվարին տեղի ունեցած ՀՀ նախագահական ընտրությունների ժամանակ գործարքային հիմունքներով աշխատել է որպես ԵԱՀԿ կարճաժամկետ դիտորդների թարգմանիչ: Այս մասին տեղեկացվում է հաղորդագրության մեջ: