Վարորդը մահացել է

Հուլիսի 1-ին ոստիկանության Սևանի բաժնում հաղորդում է ստացվել, որ ժամը 15.00-ի սահմաններում 68-ամյա Ռաֆիկ Ղազարյանի վարած «ԿրԱԶ-256» մակնիշի ավտոմեքենան Երևան-Իջևան ճանապարհի 56-րդ կմ-ին շրջվել է:

Պատահարի հետևանքով Ղազարյանը տեղում մահացել է:

Երևան-Սևան ճանապարհին

Հուլիսի 1-ին ոստիկանության Չարենցավանի բաժնում հաղորդում է ստացվել, որ Երևան-Սևան ճանապարհին ճանապարհատրանսպորտային պատահար է տեղի ունեցել:

Մեկնած օպերատիվ խումբը պարզել է, որ ժամը 00.05-ի սահմաններում 1954 թ. ծնված Ռաֆիկ Դ.-ի վարած «ԵրԱԶ» մակնիշի ավտոմեքենան Երևան- Սևան ճանապարհի 33-րդ կմ-ին բախվել է 1985 թ. ծնված Արմեն Կ.-ի վարած «ԶԻԼ» մակնիշի ավտոմեքենային, ինչի հետևանքով «ԵրԱԶ»-ը հետընթաց դուրս է եկել հանդիպակած գոտի, որին բախվել են 1960 թ. ծնված Կարեն Գ.-ի վարած «ԳԱԶ-24» և 1960 թ. ծնված Սերոբ Պ.-ի վարած «Սամանդ» մակնիշի ավտոմեքենաները:

Պատահարի հետևանքով «ԵրԱԶ»-ի ուղևորուհին մարմնական վնասվածքներով տեղափոխվել է Չարենցավանի հիվանդանոց:

Բեռնատարը շրջվել է

Հուլիսի 1-ին, ժամը 03.45-ին, ոստիկանության Աշտարակի բաժնում հաղորդում է ստացվել, որ Աշտարակ-Ապարան ճանապարհի 8-րդ կմ-ին՝ Արտաշավան գյուղի մոտ, բեռնատար ավտոմեքենա  է վթարի ենթարկվել:

Պարզվել է, որ նույն օրը, ժամը 03.30-ի սահմաններում, Թուրքիայի Հանրապետության քաղաքացի, 49-ամյա Հուսեին Թ.-ի վարած  «ԴԱՖ» մակնիշի կցորդով բեռնատարը Ապարան-Աշտարակ Ճանապարհի 22-րդ կմ-ին դուրս է եկել ճանապարհի բանուկ հատվածից և շրջվել, ինչի հետևանքով վարորդը  մարմնական վնասվածքներով տեղափոխվել է Աշտարակի հիվանդանոց:

Վրաերթ Խանջյան փողոցում

Հուլիսի 1-ին ոստիկանության Կենտրոնականի բաժնում հաղորդում է ստացվել, որ ժամը 09.00-ին «Մերսեդես Բենց-C180» մակնիշի ավտոմեքենան Խանջյան փողոցում վրաերթի է ենթարկել 57-ամյա մի կնոջ, որը մարմնական վնասվածքներով տեղափոխվել է «Սուրբ Գրիգոր Լուսավորիչ» բժշկական կենտրոն:

Կատարվում է քննություն: