Երեկ երեկոյան Հանրապետության հրապարակից մեկնարկել է ՀՀ պետական խորհրդանշանների օրվան նվիրված տոնական քայլերթը:

2006 թ. հունիսի 15-ին ընդունվել են «ՀՀ դրոշի մասին» և «ՀՀ զինանշանի մասին» օրենքները: Արդեն երկրորդ տարին է, ինչ հունիսի 15-ը նշվում է որպես ՀՀ պետական խորհրդանշանների օր: Ավելի քան 5000 պատանիներ և երիտասարդներ, «Հայաստան» վանկարկելով, անցել են Նալբանդյան և Սայաթ Նովա փողոցներով, Ֆրանսիայի հրապարակով, Մաշտոցի պողոտայով, Ամիրյան փողոցով և դարձյալ վերադարձել Հանրապետության հրապարակ: Տոնական քայլերթին մասնակցել են երիտասարդներ մայրաքաղաքից, մարզերից, սփյուռքից: Սայաթ Նովա-Նալբանդյան փողոցների խաչմերուկում երթին միացել են «Փյունիկ» հաշմանդամների միության անդամները: Սայաթ Նովա-Աբովյան փողոցների խաչմերուկից երթը գլխավորել է ՀՀ ոստիկանության մոտոցիկլավարների խումբը, որոնք էլ առաջնորդել են շարասյունը դեպի Ֆրանսիայի հրապարակ: Մաշտոցի պողոտայից քայլերթին միացել են «Փոքր Մհեր» կրթահամալիրի սաները: Ամբողջ միջոցառումն ուղեկցվել է հայրենասիրական երգերով:

Հայաստանի երիտասարդական հիմնադրամի Հասարակայնության հետ կապերի ծառայությունը տեղեկացրել է, որ տոնական քայլերթը կազմակերպվել էր «Մենք» ազգային արժեքների պահպանման հիմնադրամի նախաձեռնությամբ և Հայաստանի երիտասարդական հիմնադրամի աջակցությամբ:

Ըստ Հայաստանի երիտասարդական հիմնադրամի հոգաբարձուների խորհրդի համակարգող, ԱԺ պատգամավոր Կարեն Ավագյանի՝ միջոցառմանը մասնակցել են մեծ թվով երիտասարդական կառույցներ, անկախ կուսակցական պատկանելությունից, անկախ քաղաքական հայացքներից: «Երիտասարդները համախմբվել են ՀՀ պետական խորհրդանշանների շուրջ: Երիտասարդությունը շատ լավ հասկանում է ՀՀ պետական խորհրդանշանների դերը, նշանակությունը: Մենք ամբողջ տարին պետք է կարողանանք տոն դարձնել` մեծարելով մեր պետական խորհրդանշանները: Նման ակցիաներն են նաև, որ այսօրվա երիտասարդի մեջ սերմանում են սեր և ակնածանք հայրենիքի, պետականության նկատմամբ»,- ասել է Կարեն Ավագյանը՝ հավելելով, որ հաջորդ տարվանից ՀՀ պետական խորհրդանշանները մեծարող նման ակցիաներ նախատեսվում է իրականացնել նաև ՀՀ մարզերում: