Երևանի և Ռիգայի միջև փոխգործակցությանն առնչվող հարցեր են քննարկվել Երևանի քաղաքապետ Կարեն Կարապետյանի Լատվիայի մայրաքաղաքի պատվիրակության հետ հանդիպման ժամանակ։

Հայտնում է քաղաքապետարանի տեղեկատվության և հասարակայնության
հետ կապերի վարչությունը:

Երևանի քաղաքապետին ներկայացնելով Ռիգայի քաղաքային կառավարման մոդելը և առանձացնելով այն ուղղությունները, որոնք առաջնային են դիտարկվում քաղաքային իշխանությունների տեսանկյունից, հյուրերը մատնանշել են լատվիական կողմի համար գործակցային հետաքրքրություն ներկայացնող հիմնական ոլորտները։ Լատիշ գործարարներն, ըստ պատվիրակության անդամների, հետաքրքրված են հատկապես շինարարության, բնակֆոնդի վերականգնման, փողոցների և շենքերի դեկորատիվ լուսավորման, զբոսաշրջային և միշարք այլ ոլորտներում հնարավոր ներդրումային ծրագրերով։

Լատվիական կողմը Երևանի քաղաքապետին է փոխանցել Ռիգա այցելելու Լատվիայի մայրաքաղաքի քաղաքապետի պաշտոնական հրավերը։

Լատվիական պատվիրակությունը այցելել է նաև մայրաքաղաքի Կենտրոն վարչական շրջանի աշխատակազմ, ուր համաձայնագիր է ստորագրվել կրթական, մշակութային, զբոսաշրջային ոլորտներում, ինչպես նաև փողոցների և մշակութային արժեք ներկայացնող շենքերի դեկորատիվ լուսավորության և մի շարք այլ բնագավառներում փոխգործակցության վերաբերյալ։