Մայրաքաղաքի բակերի բարեկարգման այս տարվա  ծրագրով 48 բակեր արդեն բարեկարգվել և ժամանակակից խաղահրապարակներով են կահավորվել: Հերթական աշխատանքային խորհրդակցության ժամանակ զեկուցվել է, որ
ծրագիրը շարունակական է և «Փյունիկ» բարեգործական հիմնադրամի հետ համատեղ ընթացիկ տարում ևս 50 բակային տարծք էլ կկահավորվի նոր մարզագույքով:
Բարեկարգման ծրագրերի շրջանակում, քաղաքապետի կողմից հետևողականության պահանջ է դրվել ասֆալտապատման աշխատանքները սահմանված ժամկետներում կատարելու մասով: Կարեն Կարապետյանը հանձնարարել է առավել ակտիվ աշխատել հատկապես ամռան ամիսներին, երբ երթևեկությունը համեմատաբար ավելի պասիվ է:

Զեկուցվել է, որ քաղաքային պանթեոնում արդեն ավարտվել են բարեկարգման աշխատանքները, իսկ Կոմիտասի անվան զբոսայգու պանթեոնում շարունակվում է սալահատակների, ճեմուղիների վերանորոգման և պատվանդանների ու արձանների բարեկարգման գործընթացը:
Սոցիալական բնակարանաշինության ծրագրի շրջանակում զեկուցվել է, որ, ի կատարումն Երևանի քաղաքապետի հանձնարարականի,  որոշ վարչական շրջաններ առաջարկություններ են ներկայացրել մի շարք արտադրական տարածքների վերաբերյալ, որոնք կարող են վերակառուցվել որպես բնակելի շենքեր:
Մայրաքաղաքի վթարային շենքերում բնակվող ընտանիքներին նոր բնակարաններով ապահովելու նպատակով Կարեն Կարապետյանը հանձնարարել է ուսումնասիրել դաշտը, հաշվառել վթարային շենքերը և խնդրի լուծումը ներառել քաղաքապետարանի սոցիալական բնակարանաշինության ծրագրում:

Մայրաքաղաքի հասարակական տրանսպորտի աշխատանքների կազմակերպման իրավիճակն ուսումնասիրելու նպատակով յուրաքանչյուր շաբաթ իրականացվող մոնիտորինգի համաձայն` զգալիորեն կրճատվել է հասարակական տրանսպորտում ծխող վարորդների թիվը:  Քաղաքապետը հանձնարարել է շարունակել մոնիտորինգի աշխատանքները:
Ի կատարումն Երևանի քաղաքապետի հանձնարարականի` զեկուցվել է, որ  հանրային սննդի 30 օբյեկտներ ծխողների և չծխողների համար արդեն առանձնացրել են հատուկ գոտիներ:
Վարչական շրջանների ղեկավարներին հանձնարարվել է, մշտական ստուգայցեր կատարել սննդի օբյեկտներում և տնտեսվարողներին հորդորել, որպեսզի պահպանեն սահմանված անհրաժեշտ նորմը:

Քաղաքապետարանի ենթակայության առողջապահական ընկերությունների և համաբուժարանների վերանորոգումն ու բժշկական սարքավորումների արդիականացումը ներդումային ծրագրերով իրականացնելու համատեքստում զեկուցվել է, որ «Հարավկովկասյան երկաթուղի» ընկերությունն արդեն արձագանքել է քաղաքապետարանի առաջարկին, և  քաղաքապետարանի ենթակայության «Սուրբ Գրիգոր Նարեկացի» ԲԿ-ի «Նոր Արեշ»պոլիկլինիկայում շուտով կմեկնարկի մասնաշենքի վերանորոգման և տեխնիկական վերազինման ներդրումային ծրագիրը:
Անդրադառնալով կանաչ տարածքների ու սիզամարգերի խնամքին` Կարեն Կարապետյանը հանձնարարել է լուրջ ուշադրություն դարձնել ոռոգման աշխատանքներին:
Քաղաքապետը շեշտադրել է գույքահարկի և հողի հարկի գծով հարկային պարտավորությունների մարումն ավելի արդյունավետ կազմակերպելու հարցը:  Գույքահարկի և հողի հարկի բազային տվյալները ճշտելու և գնահատական տալու նպատակով Կարեն Կարապետյանը հանձնարարել է կազմակերպել քննարկում: