ՀՀ Ազգային ժողովի նախագահ Հովիկ Աբրահամյանը հունիսի 2-ին այցելեց Երևանի Հովհաննես Շիրազի անվան թիվ 169  դպրոց, որտեղ ներկա  գտնվեց իր նախաձեռնությամբ և հովանու ներքո անցկացվող արդեն ավանդական դարձած ասմունքի հանրապետական մանկապատանեկան երրորդ  մրցույթ-փառատոնի  Երևանի քաղաքային փուլին: Մրցույթ-փառատոնն այս տարի նվիրված է մեծ բանաստեղծ Հովհաննես Շիրազի  ծննդյան 95-ամյակին: Խորհրդարանի ղեկավարին ուցեկցում էին Ազգային ժողովի մի խումբ պատգամավորներ:

Ազգային ժողովի նախագահը ծաղիկներ դրեց դպրոցի բակում գտնվող Հովհաննես Շիրազի հուշարձանին, զրուցեց երեխաների հետ, ովքեր ասմունքեցին մեծ բանաստեղծի ստեղծագործություններից:

Ի պատիվ ԱԺ նախագահի այցի կազմակերպվել էր իսկական հանդիսավոր դիմավորում` բարձրացվեց Հայաստանի Հանրապետության ազգային դրոշը, հնչեց երկրի օրհներգը, աղուհաց մատուցվեց: Դպրոցի կողմից Ազգային ժողովի նախագահին նվիրեցին  Հայաստանի Հանրապետության ազգային ատլասը, իսկ դպրոցի աշակերտները Հովիկ Աբրահամյանին ողջունեցին իրենց երգ ու պարով:

ԱԺ նախագահը ծանոթացավ դպրոցին, մասնավորապես, նրա սաների աշխատանքների ցուցահանդեսին: Այնուհետև հյուրերն այցելեցին դպրոցի փառքի սրահ, որտեղ մեկ րոպե լռությամբ հարգանքի տուրք մատուցեցին արցախյան ազատամարտում զոհված կրթօջախի սաների հիշատակին:

Դպրոցի դահլիճւմ ազդարարելով ասմունքի հանրապետական մանկապատանեկան մրցույթ-փառատոնի քաղաքային փուլի մեկնարկը` Երևանի քաղաքապետարանի կրթության վարչության պետ Գայանե Սողոմոնյանը շնորհակալություն հայտնեց Ազգային ժողովի նախագահ Հովիկ Աբրահամյանին` փառատոնը նախաձեռնելու համար, նշեց, որ փառատոնի շնորհիվ հանրապետության անգամ ամենահեռավոր գյուղի դպրոցում աշակերտներն ու ուսուցիչները ոչ միայն կարդում, այլև անգիր են սովորում մեր մեծ բանաստեղծների ստեղծագործությունները: Կրթության վարչության պետի խոսքերով` այն ծրագրերը, որ կազմակերպվում են ԱԺ-ում`«Բաց դաս» դպրոցների աշակերտների համար, ասմունքի փառատոն և այլն, նպաստում են Հայաստանի վաղվա քաղաքացու ձևավորմանը: Նա նաև շնորհակալություն հայտնեց ԱԺ նախագահին` կրթական բարեփոխումներին աջակցելու, դրանց վերաբերյալ իրենց տեսակետները լսելու և բարձրացրած հարցերին լուծում տալու համար:

Փառատոնի կազմակերպման համար դպրոցի մանկավարժական, աշակերտական և ծնողական կոլեկտիվի կողմից Հովիկ Աբրահամյանին իրենց շնորհակալությունը հայտնեց տնօրեն Սուսաննա Կիրակոսյանը: «Յուրաքանչյուր մարդ պետք է հետք թողնի: Դուք թողնում եք այդ հետքը»,- դիմելով ԱԺ նախագահին` ասաց նա:

Ասմունքի փառատոնի մասնակիցներին և ներկաներին ողջունելով` Ազգային ժողովի նախագահ Հովիկ Աբրահամյանը նախ բոլորին շնորհավորեց Երեխաների պաշտպանության միջազգային օրվա առթիվ:  ԱԺ նախագահն  ասաց, որ ուրախ է գտնվել մանկավարժների միջավայրում և շատ բարձր գնահատեց մանկավարժների աշխատանքը, նշելով, որ նրանք միակ խավն են, որ անցած ցուրտ ու մութ տարիներին հավատարիմ մնացին իրենց կոչմանը և շարունակեցին, անկախ դժվարություններից, զբաղվել կրթության ու դաստիարակության գործով: «Մենք միշտ պարտական ենք նրանց,- ասաց ԱԺ նախագահը:- Սա ինձ համար աշխատանքային օրվա ամենահաճելի ժամն է` լինել մանկավարժների, աշակերտների, կրթության ոլորտի հարգելի մարդկանց հետ»: Նրա խոսքերով` մեր նման երկրների համար կրթությունը, գիտությունը, մշակույթը պետք է լինեն գլխավոր ուղղությունները:

Անդրադառնալով ասմունքի հանրապետական մանկապատանեկան մրցույթ-փառատոնին` ԱԺ նախագահն ասաց, որ այն կազմակերպելով հնարավոր է դարձել ապագա սերնդի մեջ վերարթնացնել սերը հայ պոեզիայի, հայ գրականության նկատմամբ: և մասնակիցների թվի հետզհետե մեծանալը վկայում է որ մեծանում է նաև հետաքրքրությունը պոեզիայի և գրականության հանդեպ: «Դա մեր բոլորի հաղթանակն է»,- ասաց ԱԺ նախագահը, ավելացնելով, որ մրցույթ-փառատոնն ավելի է արժևորվել` նվիրված լինելովՀովհաննես Շիրազի  ծննդյան 95-ամյակին:

ԱԺ նախագահը տեղեկացրեց, որ արդեն գործում է նաև Երիտասարդական խորհրդարանը, որն արդեն գումարել է առաջին նիստը: Համոզմունք հայտնելով, որ այնտեղ արդյունավետ գաղափարներ են առաջարկվելու, Հովիկ Աբրահամյանը նշեց, որ  այդ կառույցը, որը կարող է դառնալ կադրային դարբնոց, ևս մեկ քայլ է երիտասարդությանը մասնակից դարձնել Հայաստանի քաղաքական ու տնտեսական գործընթացներին: Ի դեպ, քիչ անց, Հովհաննես Շիրազի անվան հուշասրահում դպրոցի մանկավարժական կոլեկտիվի հետ հանդիպման ժամանակ, խոսելով ԱԺ «Բաց դաս » ծրագրի մասին (որի շրջանակներում խորհրդարան էին այցելել նաև այս դպրոցի աշակերտներ), տնօրեն Սուսաննա Կիրակոսյանն ԱԺ նախագահին ասաց, որ այդ ծրագրի շնորհիվ, ըստ էության, ստեղծվել է նաև աշակերտական խորհրդարան. այցելելով Ազգային ժողով` աշակերտները ծանոթանում են օրենսդիր բարձրագույն մարմնին, հանդիպում ղեկավարության հետ, ապա, հանդիպումից հետո պատմում իրենց տեսածի ու տպավորությունների մասին:

Ազգային ժողովի և մանկավարժների հանդիպումը շատ անմիջական ու ջերմ էր. խորհրդարանի ղեկավարն ինքը մասնակիցներին տրամադրեց նման շփումների` պատրաստակամ լսելով ուսուցիչների կարծիքներն ու առաջարկները:  Իսկ թեմաները բազմազան էին` սոցիալ -տնտեսական, կրթության հարցեր, և, իհարկե, կոնկրետ դպրոցին վերաբերող խնդիրներ: Կարևորելով կրթության և գիտելիքի դերը` Աժ նախագահն ասաց, որ հարկավոր են հողի վրա քայլող մարդիկ, որովհետև գեղեցիկ խոսքերով ու ճառ ասելով երկիր չես կառուցի: Հովիկ Աբրահամյանը նշեց, որ  կրթության խնդիրներն իշխանության ուշադրության կենտրոնում են, բայց կախարդական փայտիկ չունեն, որ բոլոր հարցերը միանգամից լուծեն:

Ուսուցիչները մասնավորապես բարձրացրին դպրոցի ջեռուցման հարցը, ԱԺ նախագահը խոստացավ խնդրին ծանոթանալուց հետո անդրադառնալ դրա լուծման հնարավորությանը:

Հովիկ Աբրահամյանը գրառում կատարեց դպրոցի հյուրերի գրքում և շնորհակալություն հայտնեց մանկավարժներին ջերմ ընդունելության ու անկեղծ զրույցի համար: