Այսօր կառավարությունում լրագրողների հետ ճեպազրույցի ընթացքում ոստիկանապետ Ալիկ Սարգսյանն ասել է, որ հնարավորինս պարզեցվում է տրանսպորտային միջոցների գրանցման և հաշվառման ընթացակարգը: «Քաղաքացու մեքենան հաշվառման կանգնեցնելու պահից նույնիսկ պետական գրանցման վկայականը չենք պահանջում: Այդ գործառույթը ևս ոստիկանությունը վերցնում է իր վրա: Արագ կարգով կստուգի, տեղեկանք կտրամադրի, որպեսզի հերթեր չկուտակվեն»,- ասել է ՀՀ ոստիկանապետը:

Ալիկ Սարգսյանի խոսքով՝ այսուհետ, նույնիսկ առանց վարորդի մեքենայից դուրս գալու, ճանապարհային ոստիկանությունն անմիջապես զննման է ենթարկում թափքի համարը:

Ընթացակարգից, փաստորեն, հանվում է շարժիչի համարի ստուգումը, քանի որ, ըստ ոստիկանապետի, դա բավական ժամանակ է խլում: Նա նշել է նաև, որ այսուհետ քաղաքացին հնարավորություն է ունենալու առանց դիմում գրելու ընտրել իր նախընտրած համարանիշը: «Ի դեպ, որպես այդպիսին, աճուրդային համար այլևս չի լինելու: Թեև գնային քաղաքականությունը կպահպանվի, բայց քաղաքացին հնարավորություն կունենա տեսնել իր նախընտրած համարը, որը, նշելուց հետո, տպագրվում է և տրվում: Քաղաքացին ստանում է մեքենայի տեխնիկական անձնագիրը և իր համարանիշը»,- ասել է Սարգսյանը:

Ոստիկանապետի հավաստմամբ, տեղի հետ կապված  խնդիրը  նույնպես լուծվել է. «Օրինակ, երբ սյունիքցին երևանցուն էր վաճառում մեքենան, նա պետք է հասներ Սյունիք ու հաշվառումից հաներ մեքենան, 3 հազար դրամ էլ մուծեր համարանիշ ունենալու համար: Հիմա հեշտացել է ընթացակարգը, և կարելի է դա անելու համար դիմել Երևանի կամ Սյունիքի հաշվառման կենտրոն: Սրանով կոռուպցիոն ռիսկերն ենք նվազեցնում` ոստիկան-քաղաքացի կապը հասցնելով նվազագույնի: Նույնիսկ աշխատելու ենք, որ մաքսավորը մեզ մոտ լինի, որպեսզի ողջ գործընթացը հաշված րոպեների ընթացքում լինի»,- ասել է Ալիկ Սարգսյանը: