ՀՀ փոխվարչապետ, «Սևան ազգային պարկ» ՊՈԱԿ-ի խորհրդի նախագահ Արմեն Գևորգյանն այսօր ծանոթացավ Սևանա լճի ափամերձ հատվածներում հանրային լողափերի կահավորման և բարեկարգման աշխատանքների ընթացքին:

Փոխվարչապետին ուղեկցում էին ՀՀ բնապահպանության նախարար Արամ Հարությունյանը, ՀՀ նախագահին առընթեր Սևանա լճի հիմնահարցերի հանձնաժողովի նախագահ  Վլ. Մովսիսյանը, Գեղարքունիքի մարզպետ Ն.  Պողոսյանը, «Սևան ազգային պարկ» ՊՈԱԿ-ի տնօրեն Ա. Գնդոյանը:

Բնապահպանության նախարարը զեկուցեց, որ աշխատանքներն ընթանում են սահմանված ժամկետներում, և մինչև հունիսի 15-ը  լողափերը կարող են ընդունել այցելուներին: Ծրագրի իրականացմանը մասնակցում են  նաև մասնավոր ընկերություններ: Փոխվարչապետը ողջունելի համարեց մասնավոր ընկերությունների ներգրավվածությունը: Նա նաև հորդորեց, որ հատկացվող միջոցներն օգտագործվեն արդյունավետ ու նպատակային:

Ա. Հարությունյանն անդրադարձավ նաև քաղաքացի Ա. Թարխանյանի բաց նամակին` նշելով, որ նամակում բերված փաստերն իրականությանը չեն համապատասխանում: Ըստ նրա` «Սևան ազգային պարկ» -ի կողմից լողափերի կազմակերպման համար ընտրվել է պետական սեփականություն հանդիսացող տարածք, որի վերաբերյալ իրավունքների նոտարական վավերացում և կադաստրային գրանցում ունեցող պայմանագրեր չկան,  հողօգտագործումն ապօրինի է իրականացվել,  հետևաբար կառավարության որոշումը միանգամայն օրինական է:

Փոխվարչապետին ներկայացվեց նաև  1900.25 բացարձակ նիշից  ներքև իրականացվող մաքրման աշխատանքների ընթացքը:  Բնապահպանության նախարարը տեղեկացրեց, որ աշխատանքներն իրականացվում են համաձայն ժամանակացույցի,  ընթացքում լինում են նաև տեխնիկայի շահագործման  հետ կապված խնդիրներ, որոնք օպերատիվ կերպով լուծվում են:

Տեղում քննարկվեցին նաև 1900.25մ բացարձակ նիշից ներքև գտնվող  շենք-շինությունների ապամոնտաժման ընթացքի հետ կապված հարցեր: Տեղեկացվեց, որ կան մոտ 150 շինություններ, որոնց սեփականատերերը  կամ վարձակալները թեև տեղեկացվել են ապամոնտաժման պահանջի մասին, սակայն քայլեր չեն ձեռնարկել: Փոխվարչապետը «Սևան ազգային պարկ» ՊՈԱԿ-ի տնօրինությանը հանձնարարեց  մայիսի 15-ի դրությամբ գույքագրել նմանատիպ դեպքերը  և տվյալները ներկայացնել ՊՈԱԿ-ի խորհրդին:

Անդրադարձ եղավ նաև Սոթքում հանքաքարի մանրացման գործընթացին, որի վերաբերյալ վերջերս մտահոգություն էին հայտնել բնապահպանական ՀԿ-ները: Փորձագետների պարզաբանմամբ, այն հանքանյութի մշակման արտադրական գործընթաց չէ և չի հակասում «Սևանա լճի մասին» ՀՀ օրենքի պահանջներին: Սակայն նպատակահարմար է գտնվել առաջարկել հանքավայրը շահագործող ընկերությանը համապատասխան փաստաղթղթեր ներկայացնել իրավասու մարմիններին:

«Սևան ազգային պարկ» ՊՈԱԿ-ի տնօրենը տեղեկություններ ներկայացրեց ՊՈԱԿ-ի ընթացիկ ֆինանսատնտեսական իրավիճակի մասին:

Ըստ ՏԿՆ հասարակայնության հետ կապերի բաժնի մամլո հաղորդագրության, քննարկվեցին նաև ճանապարհաշինական խնդիրներին վերաբերող հարցեր:  Փոխվարչապետը մարզպետին հանձնարարեց դրանք պահել ուշադրության կենտրոնում, իսկ Լճաշենի հատվածում 2 կմ ճանապարհի վերանորոգման հարցում համագործակցել Տրանսպորտի և կապի նախարարության հետ: