Երևանի քաղաքապետարանի հետ համագործակցության ընդլայնմանն առնչվող հարցեր են քննարկվել Երևանի քաղաքապետ Կարեն Կարապետյանի ու ԱՄՆ Կալիֆորնիա նահանգի Սոլանա Բիչ քաղաքի փոխքաղաքապետ Ջոյ Քելլեջյանի և «ԱՌԴԱ» բարեգործական հիմնադրամի ներկայացուցիչների հետ հանդիպման ժամանակ:

Ներկայացնելով «ԱՌԴԱ» բարեգործական հիմնադրամի կողմից Երևանում և հանրապետության մարզերում իրականացվող ծրագրերը, հիմնադրամի նախագահ Սթենլի Լազարյանը նշել է, որ դրանք իրականացվում են մանկապարտեզների հովանավորման, կարիքավոր ընտանիքների աջակցման, տնակներում բնակվող ընտանիքների համար փրփրապլաստե տների կառուցման, բժշկական ծրագրերի իրականացման և մի շարք այլ ոլորտների շրջանակում:

Բարձր գնահատելով իրականացվող բարեգործական նախաձեռնությունները, քաղաքապետը նշել է, որ նման կամավոր ներդրումներն իսկապես խրախուսելի են ու անհրաժեշտ և առաջարկել է մասնակցել նաև քաղաքային տնտեսության բնագավառում քաղաքապետարանի կողմից իրականացվող գործարար հետաքրքրություն ներկայացնող ծրագրերին:

Անդրադառնալով քաղաքապետարանի ենթակայության մանկապարտեզներում իրակակացվող ծրագրերին, մասնավորապես «Օգնիր մանկապարտեզիդ» էլեկտրոնային կայքին, որը կգործարկվի առաջիկայում, Կարեն Կարապետյանը նշել է, որ մանկապարտեզներն այսօր յուրաքանչյուրի հոգածության կարիքն ունեն և մանկապարտեզներին ուղղված ցանկացած կամավոր ներդրում կարող է զգալի արդյունք տալ:

Երևանի քաղաքապետարանի տեղեկատվության և հասարակայնության հետ կապերի վարչություն