ԱՄՆ հետախուզության գործակալները Պակիստանում հարցաքննել են «Ալ Ղաիդա»-ի սպանված ղեկավար Ուսամա բեն Լադենի երեք կանանց: CNN հեռուստաընկերության  տվյալներով՝ հարցաքննությանը հետևել են Պակիստանի գաղտնի ծառայության գործակալները: Ի դեպ, ըստ տեղեկությունների, ահաբեկչի այրիներն իրենց բավականին ագրեսիվ են պահել և ընդամենը մի քանի հարցի են պատասխանել: Երեքն էլ ապրում էին բեն Լադենի հետ Աբեթաբադում, որտեղ էլ մայիսի 2-ին սպանվեց «Ալ Ղաիդա»-ի ղեկավարը: Կանանցից մեկը Եմենից է, երկուսը՝ Սաուդյան Արաբիայից են: Ինչպես հայտնի է՝ Ուսամա բեն Լադենը 5 կին ուներ, որոնցից 2-ը բաժանվել էին նրանից:

Պակիստանի իշխանություններին, մեղմ ասած, չի ոգևորել բեն Լադենի կանանց հարցաքննելու ամերիկացիների ցանկությունը: Պակիստանի պաշտոնատար անձանց մեծամասնությունը նաև դժգոհ է, որ բեն Լադենի սպանությունը ամերիկացիներն իրականացրել են առանց պաշտոնական Իսլամաբադին տեղյակ պահելու:

Սակայն, այս նույն Պակիստանի դժգոհ ղեկավարությունը պարտավոր է բացատրություններ տալ նաև, թե ինչու էր աշխարհի թիվ մեկ ահաբեկիչը հենց իր երկրի տարածքում հանգրվանել: