ՀՀ ոստիկանության լրատվական ծառայությունը հաստատել է, որ Հյուսիսային պողոտայում գտնվող «Այսբերգ» ակումբի մուտքի մոտ մայիսի 7-ին, կեսգիշերին մի քանի քաղաքացիներ վիճաբանել են ակումբի տնօրենի եւ ծառայություն կատարող ոստիկանության աշխատակիցների հետ, հայհոյել են նրանց եւ խանգարել ակումբի աշխատանքները: Նրանք եղել են անսթափ վիճակում և զինված: Ոստիկանությունը հայտնում է, որ վիճաբանողներից մեկը եղել է 35-ամյա Կարեն Ա-ն:

Դեպքի վայրում ոստիկանության ծառայողներին տեսնելով` վերջինս փորձել է փախչել, նրա մոտից վայր է ընկել «Գլոկ» տիպի ատրճանակ: Կարեն Ա-ն բերման է ենթարկվել ոստիկանության կենտրոնական բաժին:Ատրճանակն առգրավել են:

Խուլիգանություն կատարելու կասկածանքով բեման են ենթարկվել նաեւ 35-ամյա Հովիկ Է-ն եւ 30-ամյա Անդրանիկ Գ-ն:

Ըստ շրջանառվող տեղեկությունների` վիճաբանության մասնակիցներից մեկը` Անդրանիկ Գ-ն,  Շիրակի մարզպետ Աշոտ Գիզիրյանի եղբոր որդին է: Հենց նա է  վերընշված անձանց հետ անսթափ վիճակում փորձել մտնել «Այսբերգ», սակայն ակումբի անվտանգության աշխատողների հետ վեճի է բռնվել, ինչի հետեւանքով եղել է վեճ ու ծեծկռտուք: Ականատեսների պնդմամբ դեպքի վայրում հնչել են կրակոցներ, եղել են վիրավորներ: