Այսօր լրացավ Սպիտակի ավերիչ երկրաշարժի 22-րդ տարելիցը:
Երկրաշարժի թողած հոգեբանական հետևանքների մասին այսօր խոսեցին հոգեբան Կարինե Նալչաջյանը, երկրաշարժի hետևանքով հաշմանդամ դարձած Գարուշ Դանիելյանն ու Արթուր Գրիգորյանը, «Փյունիկ» հասարակական կազմակերպության ( հիմնվել է 22 տարի առաջ` երկրաշարժից անմիջապես հետո) նախագահ Հակոբ Աբրահամյանը:

«Մեր կազմակերպությունն արդեն 22 տարի օգնում է երկրաշարժից տուժած անձանց հաղթահարել հոգեբանական ծանր կացությունը և ապրել լիարժեք կյանքով։ Մեր աջակցությամբ այստեղ գտնվող Գարուշն ու Արթուրը կարողացան ոչ միայն դուրս գալ հոգեբանական ծանր վիճակից, այլ՝ կարողացան իրենց տեղը գտնել հասարակության մեջ»,- ասաց Աբրահամյանը։

Գարուշ Դանիելյանն իրեն ուժեղ մարդ է համարում, քանի որ կարողացել իր մեջ ուժ գտնել ու շարունակել ապրել: «Ես ունեմ իմ սիրած զբաղմունքը և կարողանում եմ օգնել նաև իմ նման այլ մարդկանց»:

«Տղաները բարձրակարգ սպորտսմեններ են. նրանք մասնակցել են մի շարք պարաօլիմպիական խաղերի ու կարողացել են մեծ հաջողությունների հասնել» — ասաց Աբրահամյանը: Կարինե Նալչաջյանն ասաց, որ հետազոտությունները ցույց են տալիս, որ գերուժեղ ու մեծ աղետներից հետո ազգաբնակչության 3-9 տոկոսն ունենում է հետտրավմատիկ սթրես: «Այսինքն ՝թեև ժամանակի ընթացքում նրանք կարողանում են հաղթահարել բարդույթները, սակայն միևնույն է՝ հոգեբանորեն այդ խնդիրը լիարժեք հաղթահարել չի ստացվում ու այս դեպքում մասնագիտական օգնությունը պարտադիր է: Սակայն, դրա հետ մեկտեղ, բնակչության 80 տոկոսն ունակ է ինքնուրույն հաղթահարել հոգեբանական բարդույթները։ Մարդը բնության ամենափխրուն արարածն է համարվում, դրա հետ մեկտեղ դիմադրողականության մեծ պոտենիցալ ունի »,-նշեց հոգեբանը:

Նրա խոսքերով՝ «աղետի գոտի» տերմինն օգտագործելը ճիշտ չէ, քանի որ տուժած մարդկանց մոտ ծանր հիշողություններ է արթնացնում: «Աղետի հետևանքները հիմնականում հաղթահարված են, սակայն քանի դեռ երկրաշարժի գոտում կան տնակներ, այսինքն՝ երկրաշարժի հետևանքներն անընդհատ մարդկանց աչքի առաջ են, հիշողությունները անընդհատ վառ են մնում ու հոգեբանորեն շարունակվում են»,-ասաց հոգեբանը:

«Երկրաշարժի հետևանքները կարողացել ենք հաղթահարել հասարակական կազմակերպությունների օգնությամբ: Երկրաշարժի վերքը լավացել է, սակայն նրա սպին երբեք չի անցնի: Կարծում եմ, որ պետք է պետությունը մեզ աջակցի: Շատերը ինքնասպան են եղել, քանի որ անուշադրության են մատնվել։ Պետությունը պետք է մշակի մեխանիզմներ, որոնց միջոցով աղետից տուժած մարդիկ կարողանան աշխատանք գտնել»,-նշեց Արթուր Գրիգորյանը:

Ալիսա Շեկոյան