Վարչապետ Տիգրան Սարգսյանը Հայաստանում հերթական «գերազանցության կենտրոնն» է հիմնել: Հայտնի է, որ ՀՀ վարչապետը հատուկ հակում ունի «գերազանցության կենտրոնների» նկատմամբ և դրանցից պակաս կառույցի հետ գործ ունենալ չի սիրում. Տիգրան Սարգսյանը ոչ մի կերպ չի կարող, ասենք, ինչ-որ կենտրոն հիմնել, այն անպայման պետք է «գերազանցության կենտրոն» լինի: Վարչապետի այս անգամվա «գերազանցության կենտրոնը» վերաբերում է ուռուցքաբանությանը:

Կառավարությունում Տիգրան Սարգսյանի ներկայությամբ Հայաստանի Հանրապետության կառավարության և «Այ Բի Էյ մոլեկուլյար» ընկերության միջև ստորագրվել է պայմանագիր Ուռուցքաբանության գերազանցության հայկական կենտրոնի պրոտոնային արագացուցչի ձեռքբերման վերաբերյալ։ Պայմանագիրը Հայաստանի Հանրապետության կառավարության անունից ստորագրել է ՀՀ Էկոնոմիկայի նախարար Ներսես Երիցյանը, ով վարչապետի համախոհն է և գերհզոր գաղափարների ոչ պակաս գեներատոր, իսկ «Այ Բի Էյ մոլեկուլյար» ընկերության անունից` «Այ Բի Էյ մոլեկուլյար» ընկերության մարքեթինգի և վաճառքի տնօրեն Փիթեր Լեիթները։

Միաժամանակ ստորագրվել է նաև վարկային համաձայնագիր Հայաստանի Հանրապետության կառավարության և «Քեյ Բի Սի Են Վի» բելգիական բանկի միջև, որով կտրամադրվի 5080629.52 եվրո արտոնյալ վարկ պրոտոնային արագացուցչի ձեռքբերման համար։ ՀՀ էկոնոմիկայի նախարար Ներսես Երիցյանը պարզաբանել է, որ վարկը տրվել է տասնմեկ տարի ժամկետով, երեք տարին` արտոնյալ ժամանակով` 0 տոկոս տոկոսադրույքով:

Այս փաստաթղթերի ստորագրմամբ էլ մեկնարկելու է ՀՀ առողջապահության և էկոնոմիկայի նախարարությունների ու Հայաստանի ազգային մրցունակության հիմնադրամի համատեղ իրականացվող ծրագրի` Ուռուցքաբանության գերազանցության հայկական կենտրոնի աշխատանքների առաջին փուլը` Հայաստանում ռադիոիզոտոպների արտադրության կենտրոնի հիմնումը։ Ծրագրով նախատեսվում է Երևանում հիմնել ռադիոիզոտոպների արտադրության համալիրից, պոզիտրոնային էմիսիոն տոմոգրաֆներով համալրված ախտորոշիչ կենտրոնից և ուռուցքաբանական կլինիկայից բաղկացած ուռուցքաբանության գերազանցության կենտրոն։

Եթե գոնե այս մի «գերազանցության կենտրոնը» իրականություն դառնա, շատ լավ կլինի, իհարկե: Եթե գոնե այս մի արտոնյալ վարկը լիարժեք ծառայի իր նպատակին, նույնպես շատ լավ կլինի, իհարկե: Բայց, իհարկե, եթե… Իսկ մինչ Տիգրան Սարգսյանի «գերազանցության կենտրոնների» իրականություն դառնալը, Հայաստանը դեռ պետք է դիմանա, հայ հիվանդները դեռ պետք է տառապեն, քանի որ նույն ուռուցքաբանության ինստիտուտում միակ սարքը, որով հիվանդներին ճառագայթային բուժում է տրվում, նորմալ չի գործում և մեկ րոպե ճառագայթ ստանալու համար հիվանդները ստիպված են անհարմար դիրքում պառկել մեկ ժամ շարունակ: Մենք այս խնդրին անդրադարձել էինք արդեն, մեր հարցմանն ի պատասխան Առողջապահության նախարարությունից հայտնել էին, թե սարքը աշխատում է, սակայն հիվանդները հակառակն են պնդում: Մնում է հուսալ, որ ուռուցքաբանության ապագա «գերազանցության կենտրոնը» նման ձևով չի աշխատի ու դրա անվան դիմաց կդրվի ոչ թե «անբավարար», այլ իրոք «գերազանց» ու կարդարացնի «Տիգրան Սարգսյանի Ուռուցքաբանության գերազանցության հայկական կենտրոն» տիտղոսը։

ԼՈՒՍԻՆԵ ՔԵՍԱՅԱՆ