Կառավարության շենքի մոտ այսօր առավոտյան բողոքի ակցիա էին անում «Նաիրիտ» գործարանի աշխատողները: «4 ամիս է` աշխատավարձ չենք ստացել», ասում է 28 տարի «Նաիրիտ» գործարանի կաուչուկի լաբորատորիայում աշխատած Գայանե Արշակյանը: Նաիրիտցիներին կառավարության նիստից առաջ մի քանի րոպե հատկացրեց ՀՀ Էներգետիկայի և բնական պաշարների նախարար Արմեն Մովսիսյանը:

«Բանվորն իր ստորագրությամբ ինչի՞ պիտի նստի տանը: Մարդիկ կան, որ փող չունեն տրանսպորտով աշխատանքի գնալու։ Իրենք հարկադիր պարապուրդի անունը կարգադրություն են դրել և իրավաբանորեն են ժողովրդին տանը նստեցնում», — նախարարին իրենց բողոքներն էին ներկայացնում աշխատողները:

«Երբ մենք դիմում գրեցինք կառավարության հարգելի նախագահին, կառավարության հարգելի նախագահը գրել էր` զավոդը ունի 350 մլն եվրո պարտք: Գազի, լույսի, ինչի՞ց ա գոյացել», — հարցրեց աշխատողներից մեկը:

«Մարդը մահանում ա, փող չեն տալիս, երեք ամսվա աշխատավարձը պարտք էին, ասում էր մի ամսվանը տվեք, չտվեցին, մարդը մահացավ, պարոն Մովսիսյա´ն, ապրելու հնարավորություն չկա»:

«Երեքշաբթի օրը ես ձեզ բոլոր թվերը կներկայացնեմ: Ինձ գոնե երկու աշխատանքային օր պետք է»,- իրեն ուղղված տարաբնույթ պահանջներին հակադարձեց նախարարը:

Նախարարի` երկօրյա ժամկետում խնդրին ծանոթանալու և լուծելու պատրաստակամությունից կարելի է ենթադրել, թե Արմեն Մովսիսյանը միայն այսօր լսեց «Նաիրիտի» խնդիրների մասին, և եթե չլիներ նաիրիտցիների ակցիան, նախարարը չէր էլ իմանա, որ Հայաստանի քիմիական արդյունաբերության հսկայում նման բաներ են կատարվում:

«Նաիրիտը» դարձել է Հայաստանի ամենահանելուկային ձեռնարկություններից մեկը, անդադար խոսվում է այստեղ տեղի ունեցող տարաբնույթ գործընթացների մասին, բայց այդպես էլ որևէ քայլ չի ձեռնարկվում պետության համար ռազմավարական նշանակություն ունեցող գործարանը վերակենդանացնելու ուղղությամբ:

Խոսակցություններ կան, թե «Նաիրիտի» իրական սեփականատերը վարչապետ Տիգրան Սարգսյանն է, ում անձով էլ պայմանավորված է «Նաիրիտի» անձեռնմխելի կեցությունը` չնայած պրոբլեմներին, պետությունն այդպես էլ չի միջամտում սրա գործերին: Իսկ արդեն հարկադիր պարապուրդով գործարանն անտերության մատնելու վերջին զարգացումները բանվորների շրջանում խոսակցությունների մի նոր շարք են սկսել, թե վարչապետը հատուկ է այդպես անում` Հայաստանում դադարեցնելու համար «Նաիրիտի» գոյությունն ընդհանրապես. ասում են, թե Տիգրան Սարգսյանը հատուկ հենց այդ նպատաով Չինաստանում ՀՀ արտակարգ և լիազոր դեսպան նշանակել տվեց իր եղբորը` Արմեն Սարգսյանին, «Նաիրիտի» հոսքագծերը տեղափոխեց Չինաստան, այնտեղ սկսեցին բուռն տեմպերով զարգացնել կաուչուկի արտադրությունը, որի հիմնական սպառողը ռուսական շուկան է և հիմա վարչապետը համաձայնության է եկել չինացիների հետ և պայմանավորվել, որ իրեն որոշակի մասնաբաժին տալու պայմանով պատրաստ է Հայաստանում վարի տալ «Նաիրիտը» և ռուսական շուկան զիջել չինացիներին:

Եվ հիմա նման պայմաններում գտնվող գործարանի հարցերը Արմեն Մովսիսյանը ցանկանում է լուծել «երկու աշխատանքային օրում»: Մեր հարցմանն ի պատասխան` կապված «Նաիրիտի» ճակատագրում վարչապետի անձի վերաբերյալ շրջանառվող խոսակցությունների հետ, նախարարը պատասխանեց. «Գիտե՞ք ոնց ա, հիմա բոլորի անունն էլ կարող ա շրջանառվի, դա ի՞նչ կապ ունի: Վարչապետի համար կամ «Նաիրիտ», կամ մյուսները… Նույն վիճակը երկու տարի առաջ հանքարդյունաբերությունում էր` միտինգներ, բաներ, բայց դե, արագ վերականգնվեց ոլորտը, էս ոլորտը ամենածանր ոլորտն ա և հեշտ չի վերականգնել»:

Այսօր բողոքի ակցիա է տեղի ունենում նաև Հայաստանի քիմիական արդյունաբերության մյուս հսկայում` Վանաձորի «Քիմպրոմում»` դարձյալ աշխատավարձ չստանալու պատճառով: Ո՞րն է պատճառը, որ քիմիական արդյունաբերության հսկաներն այս վիճակում են հարցին` նախարար Մովսիսյանը պատասխանում է. «Ճգնաժամից հետո քիմիական ոլորտն այս վիճակում է հայտնվել, հիմա փորձում ենք միջոցառումների պլան մշակել, տեսնենք ինչով կարող ենք օգնել, որպեսզի էս վիճակից դուրս գանք»:

Եթե իսկապես «Նաիրիտի» սեփականատերը վարչապետն է, կկարողանա՞ նախարարը դեմ դուրս գալ իր ղեկավարին և թույլ չտալ սեփական հայեցողությամբ անտերության մատնել Հայաստանի մեռած տնտեսությունն առողջացնելու մեծ պոտենցիալ պարունակող գործարանը: Եթե վարչապետը կապ չունի, ապա այդ դեպքում ինչպես է, որ ինչ-որ մի սեփականատեր տարիներ շարունակ Հայաստանի քիմիական արդյունաբերության` ժամանակին մեծ հռչակ վայելող հսկան անտերության է մատնել: Ստացվում է` որ կողմից էլ նայենք, մեղավորը մեկն է և բոլոր ճանապարհները տանում են դեպի ՀՀ վարչապետ Տիգրան Սարգսյանը: