«Նախօրեին ԱԺ պետաիրավական հարցերի հանձնաժողովում ծագած Դավիթ Հարությունյան-Գեւորգ Կոստանյան վեճը դուրս է եկել ԱԺ տարածքից։ Կոստանյանի քավոր, հոր հետ ջերմ հարաբերություններ ունեցող Դավիթ Հարությունյանը դժգոհել է «վերեւում», թե սա չտեսնված-չլսված վերաբերմունք է իր նկատմամբ, սակայն նրան հասկացրել են, որ նորմալ է։

Ըստ ամենայնի, Դ․ Հարությունյանը կհրաժարվի վեճի առարկա ձեւակերպումից եւ կընդունի Կոստանյանի տարբերակը։ Այն է՝ մարդուն, որի արարքի համար 1 տարուց պակաս ազատազրկում է սահմանված, չի կարելի կալանավորել միայն այն պատճառով, որ քննիչի կանչով չի ներկայացել նախաքննական մարմնին։

Հարությունյանը կողմ է կալանավորմանը, Կոստանյանի մոտեցումն ավելի հումանիստական է եւ կոնվենցիաներին համահունչ։ Ի դեպ, այս վեճը ՀՀԿ-ականները քննարկել են, Կոստանյանը պնդել է, որ ինքն աշխատելու է կոշտ մեթոդներով»:

«Հրապարակ»

Առավել մանրամասն՝ թերթի այսօրվա համարում

«Հայաստանում ԱՄՆ արտակարգ եւ լիազոր դեսպան Ռիչարդ Միլսը «Ժամանակ»-ի հետ զրույցում նշել է, որ Հայաստանի հետ անելիք դեռեւս շատ կա:

«Թե՛ մենք եւ թե՛ Հայաստանի կառավարությունը դեռեւս անելու շատ բան ունենք, որպեսզի մեր հարաբերությունները առեւտրային, տնտեսական ոլորտներում առավել խորանան: Կոռուպցիայի այն տեսակը, որն առավել մտահոգիչ է, եւ որը հետ է պահում ամերիկյան ներդրողներին, այն կոռուպցիան է, որի հետեւանքով փակվում են շուկաները, ձեւավորվում է անարդար մրցակցություն: Դա այն է, երբ տնտեսական, քաղաքական կապեր ունեցող ազդեցիկ մարդիկ ծառայեցնում են իրենց հնարավորություններն ու լծակները իրենց շահերին, եւ արդյունքում ստեղծվում է անարդար միջավայր, չեն հաստատվում խաղի հավասար պայմաններ:

Կարծում եմ՝ կոռուպցիայի այս դրսեւորումն ու իշխանության այս տեսակ չարաշահումը շարունակում են մնալ Հայաստանի ամենամեծ մարտահրավերը եւ ամենամեծ խոչընդոտը բացելու երկիրը առեւտրի եւ ներդրումների համար»,- ասաց ԱՄՆ դեսպանը»:

«Ժամանակ»

Առավել մանրամասն՝ թերթի այսօրվա համարում

«Հայկական ժամանակ»-ի լրագրող Նարեկ Կիրակոսյանը ուշագրավ մանրամասներ է պեղել Սահմանադրական դատարանի անդամ, Սահմանադրական դատարանի ապագա նախագահ Հրայր Թովմասյանի կենսագրությունից:

Դեռ անցյալ շաբաթ, երբ Ազգային ժողովում տեղի էր ունենում ՍԴ անդամի ընտրություն, ԱԺ ԵԼՔ խմբակցության ղեկավար Նիկոլ Փաշինյանը հայտարարեց, թե Թովմասյանից հետաքրքրվել է՝ վերջինս եղե՞լ է ընդդիմադիր Ժառանգություն կուսակցության հիմնադիր ու վարչության անդամ, բայց ստացել է բացասական պատասխան:

Պարզվում է՝ Թովմասյանը ճիշտ չի ներկայացրել իրականությունը:

Իրականում Հրայր Թովմասյանը ոչ միայն եղել է Ժառանգություն ընդդիմադիր կուսակցության անդամ, այլ նաեւ 2005 թվականին կուսակցության երրորդ համագումարի ժամանակ ընտրվել է վարչության անդամ:

2007-2012 թվականներին Ժառանգություն կուսակցության անդամ Ստյոպա Սաֆարյանը շատ հետաքրքիր մանրամասներ է ներկայացրել Թովմասյանի այդ շրջանի կենսագրությունից, նաեւ հայտնել, թե ինչ բուռն ընդդիմադիր գործունեություն էր ծավալում Թովմասյանը Ժառանգությունում, հետո ինչպես հայտնվեց իշխանական թեւում եւ ինչ հակասություններ առաջացան Ժառանգության եւ Հրայր Թովմասյանի միջեւ:

Նյութը կարող եք կարդալ «Հայկական ժամանակ» օրաթերթի այսօրվա համարում:

«Կոտայքի մարզի Պռոշյան գյուղում՝ սալորի ծառի տակ լքված երեխային որդեգրել են, եւ նա արդեն նոր ընտանիքում է:

Այս մասին մեզ հայտնեց ՀՀ աշխատանքի եւ սոցիալական հարցերի  նախարարության երեխաների հիմնահարցերի բաժնի պետ Լենա Հայրապետյանը: Նա  նշեց, որ երեխայի մայրը ցանկություն չի հայտնել վերադարձնել փոքրիկին:

Ավելի վաղ անդրադարձել էինք, որ առկա է  աղջկան որդեգրման հանձնելու վերաբերյալ դատարանի որոշում, բայց մինչեւ այն  ուժի մեջ մտնելը հայտնաբերվել էր նորածնին լքած մայրը, որն այդ ընթացքում  հնարավորություն է ունեցել դիմել եւ հետ վերցնել նրան:

Ի դեպ, ավելի վաղ նաեւ հայտնի էր դարձել, որ թե՛ երեխայի  կենսաբանական մայրը եւ թե՛ որդեգրողը, ուսուցչուհիներ են, երկուսն էլ  ապրում են Կոտայքի մարզում: Ու տպավորություն էր ստեղծվում, թե նրանք կարող են միեւնույն անձը լինել: Լենա Հայրապետյանը նկատեց, որ համընկնումները  պատահական են:

Նորածինը Պռոշյան գյուղի տներից մեկի հարակից այգում  հայտնաբերվել էր նախորդ 2017 թվականի օգոստոսին: Նա տեղափոխվել էր  հիվանդանոց, այնուհետեւ՝ մանկատուն»:

Առավել մանրամասն՝ «Հայկական  ժամանակ»  թերթի այսօրվա համարում

«Աշխարհում այսօր մնացել են շուրջ 500 «օրենքով գողեր», որոնք ապրիլին Հայաստանում խորհրդարանական կառավարման վերջնական անցումից հետո պատրաստվում են հավաքվել Երևանում:

Մեր տեղեկություններով՝ հավաքը Հայաստանում կազմակերպելու են իշխանության մաս կազմող, քրեական աշխարհի հետ սերտորեն կապված օլիգարխները:

Նրանցից շատերը Ռուսաստանի, Վրաստանի և Ուկրաինայի իրավապահներին կողմից հետախուզման մեջ են:

Մեր տեղեկություններով՝կազմակերպիչ օրիլգարխները սպասում են, որպեսզի ապրիլին Սերժ Սարգսյանի վարչապետի պաշտոնում ընտրվելուց հետո նրանից անհրաժեշտ համաձայնություն ստանան և նշանակեն «սխոդկայի» ամսաթիվը»:

«Ժամանակ»

Մանրամասները՝ թերթի այսօրվա համարում

«Նախագահի թեկնածու Արմեն Սարգսյանը նախագահ չընտրված՝ պլանավորում է իր առաջին արտասահմանյան այցը: «Ժամանակ»-ի տեղեկություններով՝ նա պատրաստվում է մարտի 5-ին մեկնել ԱՄՆ, մասնավորապես Լոս Անջելես, որտեղ հանդիպում կունենա տեղի հայ համայնքի հետ:

Հավանաբար Սարգսյանը ցանկանում է իրականացնել համայն հայերի նախագահ լինելու իր հռչակած նպատակը: Սակայն Սարգսյանին ԱՄՆ-ում տհաճ անակնկալ է սպասվում, որովհետեւ լոսանջելեսահայերը նրանից պահանջելու են օգտագործել իր սահմանադրական իրավունքը եւ ներում շնորհել «Սասնա ծռերին»:

Սարգսյանը, իհարկե, կարող է ասել, որ ինքը դա չի կարող անել առանց Սերժ Սարգսյանի, եւ ներման իրավունքը պատկանում է վարչապետին: Բայց ամեն դեպքում, անհասկանալի է, թե նա ընդհանրապես ինչու է նման հանդիպումներ կազմակերպում, երբ բոլոր հարցերը ի սկզբանե իրենից կախված չեն, եւ ինքը չունի լիազորություններ, պատասխանը հայտնի է. «Ես ոչինչ որոշող չեմ»:

Ամբողջությամբ կարող եք կարդալ թերթի այսօրվա համարում:

«Նախագահի թեկնածու Արմեն Սարգսյանի ԱԺ ելույթը մոնոտոն էր, ոչ ծրագրային, հայեցակարգային թեզիսներ չկային, չնայած ասացին, որ 27 էջանոց ելույթը գրված՝ իր կողքը դրված էր․

«Ինքը չի սիրում գրված տեքստեր, սիրում է բանավոր խոսել»: ՀՀԿ-ականների մի մասն իրենց թեկնածուի մոնոտոնությունը բացատրեց նրանով, որ Արմեն Սարգսյանը քաղաքական գործիչ չէ, այդ պատճառով «դրայվ» չկար:

Ընդ որում՝ նրա ելույթը 20-րդ րոպեից ընթացավ կիսադատարկ դահլիճում. գեներալները դուրս եկան՝ իրենց հետ տանելով ՀՀԿ օլիգարխիկ թեւին։ Մինչեւ վերջ մնաց Աշոտ Արսենյանը, իսկ հարցուպատասխանի ժամանակ ՀՀԿ քաղաքական մասն էլ դահլիճում չէր, ԲՀԿ-ն՝ նույնպես:

ՀՀԿ ջահելներն էլ դահլիճ վերադարձան օրվա երկրորդ կեսին, որովհետեւ սկսվելու էր Հրայր Թովմասյանի ՍԴ անդամության քննարկումը՝ «համայնքը» պետք է կանգներ ՍԴ նախագահ գնացող ընկերոջ թասիբին:

Սաբոտա՞ժ եք անում Արմեն Սարգսյանին՝ հարցրինք Էդուարդ Շարմազանովին։ «Ոչ մի դեպքում ու երբեք. միայն լրագրողներիդ մտքով կարող են նման բաներ անցնել»:

Այդ դեպքում ինչո՞ւ էր դահլիճը դատարկ՝ հարցրինք Վահրամ Բաղդասարյանին։ «Ձեր աչքին է դատարկ, դահլիճը նորմալ վիճակում է»: Դուք ինքներդ առավոտյան վերցրիք ներկա-բացակաների ցուցակը եւ մի լավ տնտղեցիք: «Երկրորդում եմ` դահլիճում նորմալ թվով մարդիկ են նստած, մնացածն էլ իրենց սենյակներում ելույթի են պատրաստվում»»:

«Հրապարակ»

Ամբողջությամբ կարող եք կարդալ թերթի այսօրվա համարում:

«Լոռու մարզի Վանաձոր քաղաքի բնակիչներից ահազանգել են «ՀԺ»-ի խմբագություն՝ նշելով, որ պոլիկլինիկաներում չկան պետպատվերով բուժման ուղեգրի ձեւաթղթեր, եւ իրենք ստիպված են անորոշ ժամանակով սպասել, մինչեւ որ հնարավորություն ստանան անհրաժեշտ բուժօգնության համար հիվանդանոց դիմելու:

Ավելի ուշ տեղեկացանք, որ խնդիրն առկա է նաեւ Տավուշի մարզում, եւ մարդիկ, չնայած իրավունք ունեն բուժվել պետպատվերով ու անվճար, ստիպված դիմում են վճարովի բժշկական օգնություն ստանալու համար:

ՀՀ առողջապահության նախարարության լրատվական ծառայությունից նշեցին, որ խնդիրը տեխնիակական է եւ կապված է տարեսկիզբ լինելու հետ: Հավաստիացրին, սակայն, որ դա չի նշանակում, թե արդեն երկու ամիս պոլիկլինիկաները պետպատվերով բուժօգնության ուղեգիր չեն ունեցել, եւ երկու ամիս հիվանդները սպասում են:

Նախարարությունից մանրամասնեցին, որ ամեն տարի, համաձայն «Գնումների մասին» օրենքի, իրականացվում է ուղեգրերի տպման գործընթաց: Մարզերում նախորդ տարվանից ունեցած ձեւաթղթերը վերջացել են»:

«Հայկական ժամանակ»

Առավել մանրամասն՝ թերթի այսօրվա համարում

«Ժամանակ»-ի տեղեկություններով՝ Տարոն Մարգարյանը որոշել է ավագանու «Երկիր Ծիրանի» խմբակցության՝ Վազգեն Սարգսյանի անվան փողոցը վերանվանելու նախագիծն ընդգրկել ավագանու առաջիկա նիստի օրակարգ:

Հիշեցնենք, որ դեռեւս փետրվարի 1-ին Երեւանի ավագանու «Երկիր Ծիրանի» խմբակցությունը հանդես էր եկել ԱՄՆ 28-րդ նախագահ Վուդրո Վիլսոնի անվամբ փողոց անվանակոչելու եւ հուշարձանը տեղադրելու մասին իրավական ակտ ընդունելու նախաձեռնությամբ, ըստ որի՝ առաջարկվում է Կենտրոն վարչական շրջանի Վազգեն Սարգսյանի անվան փողոցի՝ Հանրապետության հրապարակի Հակոբ Պարոնյանի անվան երեժշտական կոմեդիայի պետական թատրոնից դեպի ՀՀ արտաքին գործերի եւ ՀՀ արդարադատության նախարարություններ տանող հատվածը վերանվանել Վուդրո Վիլսոնի անվամբ»:

«Ժամանակ»

Առավել մանրամասն՝ թերթի այսօրվա համարում

Սյունիքի մարզպետ Սուրիկ Խաչատրյանից՝ Լիսկայից ոչ պակաս «էկզոտիկ» մարզպետի՝ Վահե Հակոբյանի պատճառով նախկին մարզպետ, նրա անվանակից Վահե Հակոբյանը հեռացել է Հայաստանից եւ ընտանիքով հիմնավորվել Ավստրիայում։ Փորձում է այնտեղ բիզնես-գործունեություն ծավալել: Թեեւ նրա մերձավորները պնդում են, որ ժամանակ անց կվերադառնա:

Հիշեցնենք, որ Վ. Հակոբյանը նեղսրտած է հեռացել Հայաստանից, որովհետեւ հույս ուներ, որ ռեյտինգային կարգով մարզից պատգամավոր կընտրվի:

Ի դեպ, նա շքեղ տուն է կառուցել Հաղթանակի զբոսայգուն հարակից թանկ թաղամասում, բայց այսօր տան դռները փակ են, ոչ ոք այնտեղ չի ապրում: Հայաստանում է ապրում եւ աշխատում նրա հայրը՝ Քաջարանի կոմբինատի նախկին տնօրեն Մաքսիմ Հակոբյանը, ով այժմ Ախթալայի կոմբինատի տնօրենն ու սեփականատերն է։

«Հրապարակ»

Ավելի մանրամասն՝ թերթի այսօրվա համարում: