Հայաստանի նախագահի մամուլի քարտուղար Արմեն Արզումանյանը  հայտարարել  է,թե ընթացք է տրվելու ՀԱԿ-ի հետ իշխանությունների երկխոսության ուղղությամբ հետագա քայերին:

« Հունիսի 17-ի անդրադարձում Հանրապետության նախագահը հստակ նշել էր, որ եթե մեկ կոնկրետ հարցի շուրջ բանակցությունների փոխարեն Հայ ազգային կոնգրեսն իրապես պատրաստ է շարունակել երկխոսությունը մեր երկրի զարգացման ուղեգծին, արտաքին ու ներքին քաղաքականությանն առնչվող կարեւորագույն հարցերի լայն շրջանակում եւ ցանկություն ունի դա իրականացնել միայն հատուկ նշանակված մարդկանց միջոցով, ապա կոալիցիոն կուսակցությունների ներկայացուցիչները կարող են նստել քննարկումների սեղանի շուրջ: Հունիսի 30-ի իր ելույթում Լեւոն Տեր-Պետրոսյանը,  ըստ էության, դրական պատասխանեց այս առաջարկին` նշելով. «Երկխոսություն՝  այո´, բայց ոչ թե երկրորդական, այլ առաջին հերթին հիմնական հարցերի շուրջ»: Ողջունելով նման արձագանքը` Կոալիցիոն կուսակցությունները ձեւավորել են համապատասխան աշխատանքային խումբ, որի կազմում ընդգրկվել են երկուական ներկայացուցիչ յուրաքանչյուր կուսակցությունից: Առաջիկա օրերին կհրապարակվի խմբի անդամների ցանկը, եւ առաջին աշխատանքային քննարկումը հնարավոր կլինի կազմակերպել արդեն գալիք տասնօրյակում»:

Սերժ Սարգսյանի և Իլհամ Ալիևի կազանյան բանակցությունները ձախողվել են Ադրբեջանի մեղքով: Դրա մասին ասվել է շատ անգամներ, ասվեց նաև այսօր: Հայաստանի արտգործնախարար Էդվարդ Նալբանդյանը նույնն ասել է այսօր` Ռուսաստանի իր գործընկեր Սերգեյ Լավրովի հետ հանդիպման ժամանակ:

Բայց միջազգային հանրությունը զերծ է մնում մեղավորներ և պատասխանատուներ փնտրելուց, և, դատելով վերջին օրերի զարգացումներից, փորձում է ապահովել նախագահների նոր հանդիպում և համաձայնություն կարգավորման հիմնարար սկզբունքների շուրջ:

Եվրամիության արտաքին քաղաքականության հանձնակատար Էշթոնը երկու օր առաջ հույս հայտնեց, որ մինչև տարեվերջ Հայաստանը և Ադրբեջանը համաձայնության կգան հիմնարար սկզբունքների շուրջ: Ընդ որում, տիկին Էշթոնը հասկացրեց, որ դա կհանգեցնի նաև հայ-թուրքական սահմանի բացմանը:

Երեկ Սերժ Սարգսյանի հետ հեռախոսազրույց է ունեցել նաև ԱՄՆ պետքարտուղար Հիլարի Քլինթոնը, ու դարձյալ քննարկվել է ԼՂ կարգավորման գործընթացը:

Սակայն միջնորդներից ամենաակտիվը դարձյալ Ռուսաստանն է, ինչն էլ ենթադրել է տալիս, որ հակամարտող կողմերի բարձր մակարդակով հերթական հանդիպումը դարձյալ Մոսկվան է կազմակերպելու:

Երեկ և այսօր Ռուսաստանի արտգործնախարարը Երևանում և Բաքվում է ու հակամարտող կողմերին է ներկայացնում նախագահ Դմիտրի Մեդվեդևի նոր առաջարկները: Երկու մայրաքաղաքում էլ խոստանում են ուշադիր ուսումնասիրել Մոսկվայի առաջարկությունները և սեղմ ժամկետներում պատասխանել դրանց:

Մի խոսքով, միջազգային ակտիվության պակաս չկա, և ակնհայտորեն նախապատրաստվում է Սարգսյան-Ալիև նոր հանդիպում:

Տեսանելի է նաև միջնորդ երկրների կոնսոլիդացված, համաձայնեցված գործողությունների հանգամանքը: Ենթադրելի է, որ Երևանի և Բաքվի նկատմամբ կկիրառվեն դիվանագիտական նոր ճնշումներ:

Սակայն կարգավորման գործընթացում դժվար է բեկում ակնկալելը:

Կողմերի դիրքորոշումները տրամագծորեն տարբեր են մնում: Այսօր Էդվարդ Նալբանդյանը հայտարարեց, որ բանակցություններում առաջընթաց կլինի, եթե Ադրբեջանը հրաժարվի Կազանում իր առաջ քաշած 10 նոր առաջարկից: Ասել է թե` Հայաստանը չի պատրաստվում բանակցել կարգավորման նոր տարբերակի շուրջ: Բաքուն, իր հերթին, չի ցանկանում լսել որևէ տարբերակի մասին, որը կարող է հանգեցնել Ղարաբաղի անկախությանը:

Եվ վերջապես, Հայաստանում և Ադրբեջանում մոտենում են ընտրությունները, որոնք անբարենպաստ միջավայր են ստեղծում բանակցային գործընթացում:

Ռոստովում  այսօր աշխատանքներն է սկսել Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովը։ Նախքան  13-րդ նիստի բացումը տեղի է ունեցել հանձնաժողովի համանախագահներ` ՀՀ վարչապետ Տիգրան Սարգսյանի և ՌԴ տրանսպորտի նախարար Իգոր Լևիտինի առանձնազրույցը։

Ողջունելով նիստի մասնակիցներին` ՀՀ վարչապետը շնորհակալություն է հայտնել ռուսական կողմին` ցուցաբերած ջերմ ընդունելության համար: Տիգրան Սարգսյանը, մասնավորապես, նշել է. «Հանձնաժողովի նախորդ` 12-րդ նիստից հետո ընկած ժամանակահատվածում մեր երկրների միջև առևտրատնտեսական համագործակցության շոշափելի աճ է արձանագրվել: Այսպես, Հայաստանի և Ռուսաստանի միջև առևտրաշրջանառությունը 2010 թվականին աճել է ավելի քան 10 տոկոսով և հասել գրեթե 1 միլիարդ դոլարի: Իսկ ընթացիկ տարվա առաջին չորս ամիսների ընթացքում նախորդ տարվա նույն ժամանակահատվածի համեմատ առևտրաշրջանառությունը մեր երկրների միջև ավելացել է 13 տոկոսով: Մեծ ուշադրության է արժանի հայկական ապրանքների արտահանման տեմպերի աճը ռուսական շուկա, որը 2010 թվականին աճել է ավելի քան 40 տոկոսով. ընթացիկ տարվա առաջին չորս ամիսների ընթացքում արձանագրվել է այս ցուցանիշի աճ` 27 տոկոսով»:

Վարչապետը վստահություն է հայտնել, որ երկկողմ տնտեսական ներուժը մեծ է, և լավ հնարավորություններ կան խորացնելու համագործակցությունը, ինչպես արդյունաբերության մի շարք ճյուղերի, այնպես էլ գյուղատնտեսության, տուրիզմի և տնտեսության այլ ոլորտներում. «Մեր երկրների հետագա համագործակցության խորացման նպատակով ներկայում անհրաժեշտ է ամրապնդել փոխադարձ կապերը և կարգավորել երկկողմ հետաքրքրություն ներկայացնող նոր ներդրումային ծրագրերի իրականացումը»: Այս համատեքստում կառավարության ղեկավարը կարևորել է «Հայ-ռուսական դաշնակցային հարաբերություններում միջտարածաշրջանային համագործակցության նոր նվաճումներին ընդառաջ» թեմայով հայ-ռուսական միջտարածաշրջանային առաջին համաժողովի հաջող անցկացման փաստը: «Անհրաժեշտ է նաև ընդգծել, որ հայ-ռուսական տնտեսական համագործակցության շրջանակում առկա է փոխադարձ հետաքրքրվածություն բոլոր ոլորտներում` ինչպես մեր երկրների ղեկավարությունների, հասարակությունների, այնպես էլ բիզնես ոլորտի ներկայացուցիչների կողմից, ինչը խթան է հանդիսանում մեր երկրների միջև բիզնես կապերի զարգացման համար», — նշել է վարչապետ Սարգսյանը:

Նիստի մասնակիցները քննարկել և որոշումներ են ընդունել տնտեսական համագործակցության հայ-ռուսական միջկառավարական հանձնաժողովի` 2010 թ. հոկտեմբերի 23-ին կայացած 12-րդ նիստի արձանագրության կատարման ընթացքի, երկկողմ իրավապայմանագրային դաշտի և առևտրատնտեսական հարաբերությունների ներկա վիճակի ու զարգացման հեռանկարների, վառելիքաէներգետիկ համակարգի, տրանսպորտի, կապի և տեղեկատվական տեխնոլոգիաների, գյուղատնտեսության, հումանիտար ոլորտներում ծավալված համագործակցության մասին:

Նիստին հաջորդել է հանձնաժողովի համանախագահների մամուլի համատեղ ասուլիսը, որի ընթացքում հանձնաժողովի համանախագահները գոհունակություն են հայտնել կատարված աշխատանքների կապակցությամբ: Հանձնաժողովի ռուսական կողմի համանախագահ Իգոր Լևիտինը նշել է. «Ստորագրման է նախապատրաստվում երկկողմ 10 համաձայնագիր ու հուշագիր: Կուզենայի շնորհակալություն հայտնել հայկական կողմին Ազատ տնտեսական գոտու ստեղծման համար: Կարծում եմ` դա կարագացնի այն ձեռնարկությունների աշխատանքը, որոնք փոխանցվել էին ռուսական կողմին: Ցանկանում եմ նշել, որ Ռուսաստանի Դաշնությունն աջակցում է ԵվրԱզԷՍ-ի հակաճգնաժամային հիմնադրամից «Նաիրիտ» ձեռնարկության արդիականացման համար միջոցների տրամադրմանը: Կարող ենք փաստել, որ տնտեսության արդիականացումը, Հայաստանի հետ առևտրատնտեսական կապերի խորացումը կօժանդակեն մեր հարաբերությունների զարգացմանը և նոր աշխատատեղերի ստեղծմանը` ինչպես  Հայաստանում, այնպես էլ Ռուսաստանում»:

«Ժառանգություն» կուսակցության վարչության նախագահ Րաֆֆի Հովհաննիսյանը և խորհրդարանական համանուն խմբակցության անդամներ Անահիտ Բախշյանը, Զարուհի Փոստանջյանը և Արմեն Մարտիրոսյանը հուլիսի 8-ին Աշտարակ քաղաքում հանդիպել են Արագածոտնի մարզի քաղաքացիների հետ:

Ըստ «Ժառանգություն» կուսակցության մամուլի ծառայության, հանդիպման ժամանակ իր ելույթում Րաֆֆի Հովհաննիսյանն անդրադարձել է երկրում տիրող սոցիալ-տնտեսական ծանր իրավիճակին, արտաքին քաղաքականության մեջ նկատելի բացթողումներին: Նա հանդիպման մասնակիցներին հորդորել է հանդես գալ առաջարկություններով, պատվիրաններով, հուզող հարցերով, որոնք շարունակաբար կլինեն «Ժառանգություն » կուսակցության գործունեության ուշադրության կենտրոնում: Ր. Հովհաննիսյանը կոչ է արել «բողոքի ճիչերը մեկտեղել և միասնական ձայնով դուրս գալ՚` հաղթահարելու երկրի պետականության հիմքերը սասանող և վտանգավոր չափերի հասնող երևույթները»:

Հարցուպատասխանի ժամանակ պատգամավորները ներկաներին տեղեկացրել են տարածաշրջանից իրենց ուղղված դիմումներին տրված ընթացքի մասին:

ՀՀ Սերժ Սարգսյանն ընդունել է Ռուսաստանի Դաշնության արտաքին գործերի նախարար Սերգեյ Լավրովին, ով հուլիսի 8-ին Հայաստան է ժամանել ԼՂ հակամարտության կարգավորման վերաբերյալ ՀՀ նախագահին ՌԴ նախագահ Դմիտրի Մեդվեդեւի ուղերձը փոխանցելու նպատակով:

Սերժ Սարգսյանը բարձր է գնահատել ԵԱՀԿ Մինսկի խմբի համանախագահ երկրների` ՌԴ-ի, ԱՄՆ-ի, Ֆրանսիայի նախագահների ջանքերը` Լեռնային Ղարաբաղի հիմնախնդրի լուծման եւ տարածաշրջանում խաղաղության ու կայունության հաստատման ուղղությամբ: Նա շնորհակալություն է հայտնել Ռուսաստանի նախագահի շարունակական աջակցության համար եւ վերահաստատել է Լեռնային Ղարաբաղի հիմնախնդրի կարգավորման ուղղությամբ շուտափույթ առաջխաղացման հասնելու շահագրգռվածությունը: Նախագահը նշել է, որ հայկական կողմն ուշադրությամբ կուսումնասիրի Դմիտրի Մեդվեդեւի առաջարկություններն ու մոտ ժամանակներում կներկայացնի իր պատասխանը: ՙՄենք ցանկանում ենք, որպեսզի խնդիրը լուծվի եւ լուծվի այնպես, որպեսզի մեր տարածաշրջանում, իսկապես, հաստատվի վերջնական խաղաղություն եւ կայունություն՚,- ՌԴ արտգործնախարարի հետ հանդիպմանն ասել է Ս.Սարգսյանը:

Ըստ ՀՀ նախագահի Մամլո գրասենյակի, Ս.Լավրովը նշել է, որ ՌԴ նախագահն անկեղծորեն շահագրգռված է, որպեսզի այս գործընթացը հաջողությամբ պսակվի եւ վստահ է, որ համաձայնության գալու բոլոր պայմաններն առկա են:

Այսօր «Ընտրություն» մամուլի ակումբում լրագրողների հյուրը քաղաքագետ Երվանդ Բոզոյանն էր: Նա անդրադարձավ Կազանի հանդիպումից հետո ԼՂ կարգավորման գործընթացին. «Կազանից սպասումներն արհեստականորեն ուռճացված էին: Խնդիրն այն է, որ համանախագահները միշտ հանդես են գալիս կոնսոլիդացված հայտարարությամբ: Հայկական կողմը երբեք չի պատկերացնում, որ ԼՂՀ-ն կլինի ՀՀ-ից դուրս, Ադրբեջանն էլ երբևիցե չի մտածում, որ հնարավոր է` ԼՂՀ-ն լինի Ադրբեջանից դուրս: Այդ խնդիրը բավականին դժվար խնդիր է, դժվար է այստեղ որոշակի համաձայնությունների հասնել»:

Քաղաքագետի կանխատեսմամբ՝ Ադրբեջանը փորձելու է ժամանակ ձգձգել և կոշտացնել դիրքորոշումը՝ երկու նպատակի հասնելու համար. կամ` խնդրի կարգավորման ակտիվ միջնորդությունն անցնի Միացյալ Նահանգներին, կամ՝ ԼՂ խնդրի համար առաջարկվի այնպիսի ճանապարհային քարտեզ, որտեղ հստակ նշված չլինեն ԼՂ-ի կարգավիճակի, հանրաքվեի հարցերը, սակայն հստակ նշվեն այն զիջումները, որոնք պետք է անի Հայաստանը: «Կարծում եմ, ՀՀ-ն այստեղ զիջումների կարիք չունի: Գնդակը գտնվում է Բաքվի դաշտում, նրանք պետք է որոշում կայացնեն` պատրա՞ստ են զիջումների, թե` ոչ: Կարծում եմ, որ պաշտոնական Երևանը չի գնա այնպիսի մի լուծման, մի փաստաթղթի ստորագրման, որով կվտանգվի ԼՂՀ-ի անվտանգությունը»,- ասաց  քաղաքագետը: Ըստ Բոզոյանի, Մոսկվան համոզված էր, որ իրեն կհաջողվի ինչ-որ բան ստորագրել տալ Կազանում. «Այստեղ կար նաև որոշակի շահագրգռվածություն, որ եթե այստեղ առաջընթաց չլինի, ապա ԱՄՆ-ն կակտիվանա: Մոսկվան ամեն ինչ կանի, որպեսզի իր առաքելությունը բնականոն առաջընթաց ունենա: Եթե Մոսկվայի ջանքերը չպսակվեն հաջողությամբ, ապա ԱՄՆ-ն հույս ունի` եթե ոչ հիմնարար սկզբունքների չընդունումը, ապա` գոնե ինչ-որ բան կորզել: Ադրբեջանցիները հույս ունեն, որ այսպիսի ճնշումներով իրենց կառաջարկվի ճանապարհային մի քարտեզ»:

Ազատագրված տարածքների վերաբնակեցման առնչությամբ «Ժառանգության» երեկվա կոչը Բոզոյանը ողջունում է և վստահ է, որ ազատագրված տարածքների չվերաբնակեցումը Հայաստանի իշխանությունների խոշորագույն բացթողումն է: «Երբ խոսում ենք ԼՂ կարգավորման մասին, և մենք կոնկրետ առարկայական վերաբնակեցման քաղաքականություն չենք վարում, դա անհասկանալի է»,- եզրափակեց քաղաքագետը:

Վրաց ուղղափառ եկեղեցու Մեծ Բրիտանիայի եւ Իռլանդիայի եպիսկոպոսարանների առաջնորդ Մեուփե Զենոնը` վրացական «Մաեստրո» հեռուստաընկերությանը տված հարցազրույցում ասել է, որ Թեեւ Ամենայն հայոց կաթողիկոս Գարեգին Բ-ն Վրաստան կատարած այցի ժամանակ չհասավ իր նպատակին, սակայն վերջում հայերն իրենց նպատակն իրագործեցին Վրաստանի ղեկավարության միջոցով:

«Ի վերջո, ղեկավարության շնորհիվ Գարեգին Երկրորդը հաղթեց: Սակայն պետք է ասեմ, որ վրացական եկեղեցին երբեք չի պարտվի ոչ Վրաստանում եւ ոչ էլ այլ տեղ: Ղեկավարությունը թող լավ հիշի, թե ինչպես է ձգտում սփյուռքահայությունը Բրիտանիայում, Ֆրանսիայում, ԱՄՆ-ում եւ այլ պետություններում ցածրացնել վրացական մշակույթը»,- հայտարարել է նա, դժգոհելով թե կրոնական միավորումներին կարգավիճակ տալու որոշման հետ կապված ուղղափառ եկեղեցին լիովին չի տեղեկացվել:

Ըստ ուղղափառ առաջնորդի Գարեգին Բ-ի այցելությունից հետո Թբիլիսի ժամանած Հայաստանի Արտգործնախարարը, որի  նպատակը հայոց կաթողիկոսի սկսած գործն ավարտելն էր:

Ազգային անվտանգության նախարարի նախկին տեղակալ, Հայ ազգային կոնգրեսի ներկայացուցիչ Գուրգեն Եղիազարյանի և  ՀՀԿ պատգամավոր Համլետ Հարությունյանի այսօրվա բանավեճը կրում էր եղբայրական, սեքսուալ,սադիստական շատ հետաքրքիր տարրեր:

Նախ խոսվեց այսօրվա ամենաակտուալ թեմայի` արտահերթ ընտրությունների պահանջի մասին:«Արտահերթ ընտրություն են պահանջում, շատ էլ ճիշտ են անում, բա ի՞նչ լոզունգով էդ մարդիկ իրենց գոյությունն ապացուցեն: Նրանք պետք է ամեն ինչ անեն, որ իրենց քաղաքական կշիռը ապահովեն, դա օբյեկտիվ պահվածք է: Ընդդիմությունն ինքը կամավոր ընտրել է պայքարի քաղաքակիրթ մեթոդը, դու իմ լավագույն ընկերն ես, Գուրգեն ջան, բայց քո հռետորաբանությունը անցյալի շեշտադրումներ է կրում »,- ասաց Համլետ Հարությունյանը:

Իշխանությունը չի ընդառաջում ընդդիմության պահանջին,այս մասով Հարությունյանի արձագանքը հետաքրքիր էր. «Հենց ընդառաջում ենք, ասում են՝ ՀԱԿ-ը իշխանությունների տակ պառկել է», ասել կուզի քաղաքակիրթ մոտեցում միմյանց հանդեպ չի կարող լինել:

Ըստ Հարությունյանի՝ շատ բնական են ՀԱԿ-ի կեցվածքն ու պահանջները: Նա շեշտեց, որ Կոնգրեսի «գործողությունը լավ բեմադրություն է»՝ նկատելով, որ Լևոն Տեր-Պետրոսյանը մի ելույթ է ունենում, Նիկոլ Փաշինյանը՝ այլ, և տպավորություն է ստեղծվում, որ նրանք իրար հետ կապ չունեն: «Եթե ծայրահեղ քայլ անի, Նիկոլը պետք է անի, հո Լևոնը չի՞ անի»,- եզրափակեց նա:

«Այնպես մի արեք, Համլետ ջան, որ սեպտեմբերին ծայրահեղ քայլեր անենք, այնպես արեք, որ ժողովուրդը լավ ապրի»,- հակադարձեց Եղիազարյանը:

«Ձեզ մի հատ վատ լուր եմ ուզում հայտնել. երեկ չէ առաջին օրը Մադագասկարի նախագահը լքեց երկիրն անհայտ ուղղությամբ»,- ասաց Եղիազարյանը, չպարզաբանելով, թե ինչու է Մադագասկարի նախագահի փախուստը վատ լուր հայաստանցիներիս համար:Հետո, ինչ որ տարօրինակ մեկնաբանություն տվեց. Մադագասկարի նախագահը պաշտոնը լքեց ոչ թե այն պատճառով, որ իր երկիրը «Ֆորբս» ամսագրի ցուցակում ամենավատ տնտեսությունն էր, այլ որ իշխանության էր եկել «բացարձակ մեծամասնության ձայներով»:

Հետո զուգահեռ անցկացրեց Հայաստանի հետ. «Խնդիրը նա է, որ մենք ամեն օր ավելի վատ ենք ապրում: Համլետ Հարությունյանը, ում հետ ես այստեղ նստած եմ, իշխանության միակ ղարաբաղցիներից է, որը «Բենթլի» չունի և ազնվագույն մարդ է»:

ՀԱԿ ներկայացուցիչը Հայաստանի՝ «Ֆորբսի» վատագույն տնտեսությունների ցուցակի 2-րդ հորիզոնականում հանգրվանելու համար մեղադրեց կառավարությանը. «Առաջարկում եմ, որ մեր վարչապետը՝ Տիգրան Սարգսյանը գնա-իրան կախի, որ իմ երկիրը 176-րդ տեղում է: Ու եթե նամուս ունենա, էլ ընդհանրապես չի երևա, տնից դուրս չի գա, կթողնի, կգնա, կջհանդամվի չգիտեմ որտեղ… Իսպանիա: Կգնա, կպրծնենք, մենք էլ կպրծնենք, հանրապետականներն էլ կպրծնեն իրանց ապրանքից»:

Հարությունյանը փորձեց մեղմել իրավիճակը`թե ինքը չի հավատում շատ հեղինակավոր կազմակերպությունների, երբ տեսնում է նրանց վերաբերմունքը ղարաբաղյան խնդրի կարգավորման գործընթացի նկատմամբ: «Չենք ժխտում, որ ունենք լրջագույն տնտեսական խնդիրներ, որ ուզում ենք՝ մեր ժողովուրդը լավ ապրի»:

Շուշան Գալստյան

«Մենք շնորհակալ ենք Դմիտրի Անատոլիի Մեդվեդեւին՝ իր ջանքերի համար, որոնք ուղղված են կողմերի միջեւ Լեռնային Ղարաբաղի հիմնախնդրի կարգավորման հիմնարար սկզբունքների համաձայնեցմանը: Մենք հենց այդ մտադրությամբ՝ դրական տրամադրվածությամբ, մեկնեցինք Կազան: Իսկ, թե որքան է մոտ ապագայում հնարավոր նման համաձայնեցումը, ես կարծում եմ, եթե Ադրբեջանը հետ վերցնի իր փոփոխությունները` այն տաս փոփոխությունները, որոնք նա առաջ քաշեց Կազանում, ապա նման առաջընթացը հնարավոր կլինի»,‑պատասխանել է  ՀՀ արտգործնախարար Էդվարդ Նալբանդյանը Սերգեյ Լավրովի այն հարցին, թե արդյոք հնարավո՞ր է համարում մոտ ապագայում առաջընթաց` Լեռնային Ղարաբաղի կարգավորմանն ուղղված հիմնարար սկզբունքների համաձայնեցման գործում:

Վարչապետ Սարգսյանը թերթերից մեկում տված հարցազրույցում ասել  էր` «Բա ի՞նչ անենք, չթողնե՞նք, որ կրիտիկական զանգվածը փախչի։ Թողնենք, որ մնան Հայաստանում ու հեղափոխություն անե՞ն»: Հետո էլ, երբ գլխի էր ընկել թե ինչ էր ասել, սկսել էր հերքել, թե կատակ է արել:

Սակայն օրեր առաջ, նա, Սևան կատարած այցի ժամանակ,նկատելով Սփյուռքի նախարարության գովազդային «Արի տուն» պաստառը, շրջվել է դեպի Հրանուշ Հակոբյանն ու գուցե դարձյալ կատակով կշտամբել. «որ տենց կանչում ես տուն, ո՞նց ենք էդքանին պահելու»:

Այսքան կատակասեր վարչապետ միայն մենք`հայերս կարող ենք ունենալ: Բայց կարելի է կասկածել, թե իրեն ուղեկցողների ներկայությամբ նման անպատասխանատու կատակներ անող վարչապետը, եթե նույնիսկ կատակում է`ապա դա շատ լուրջ ու դաժան  կատակ է: Զորօրինակ, նրա մարզպետ Լիսկան այդ կատակները շատ լուրջ է ընդունել և արդեն օրենքի խախտումով ռուսական գիմնազիա է բացում Կապանում, որպեսզի Ռուսաստան արտագաղթել պատրաստվողները գլխանց լավ ռուսերեն իմանան: Համ էլ մարդը գլխանց չի թաքցրել իր էությունը. ստեղծելով «պետության վախճանի» տեսությունը, նա բոլորին բացեիբաց հայտնել է, որ հակապետական մտածողության տեր ինտելեկտուալ է: Հո Տիգրան Սարգսյանը չի մեղավոր, որ պետության ազգային անվտանգության պատասխանատուները չգիտեն, որ այդպիսինին նույնիսկ գյուղապետի պաշտոնին մոտիկ թողնելը անթույլատրելի ճոխություն է: Մարդը կամավոր հիմունքներով զգուշացրել է, բայց բանի տեղ չդրին, քանզի մանկապիղծ խորհրդական ունեցող այդ կերպարի նշանակման տակ միլիարդավոր դոլարների վարկ տվող կա: Իսկ թե ով է հետո փակելու այդ «գարու գինը»` բոլորը թքած ունեն: Ապրենք այսօր լավ ու շատ լավ, իսկ մեր թոռների ողբերգությունը չենք էլ տեսնի, զի արդեն ննջելու ենք «թանգանոց» գերեզմանաքարի տակ: