ՀՀ երրորդ նախագահ Սերժ Սարգսյանը Գեղարքունիքում կայացած հանդիպման ժամանակ հրապարակել է երեկ խոստացած ձայնագրությունը Փաշինյանի մասին։ 

Հիշեցնենք՝ Սերժ Սարգսյանը երեկ  Նիկոլ Փաշինյանին 24 ժամ էր տվել՝ ապացույցներ ներկայացնելու, որ ինքը կազինոներում պարտվել է  բանակից հափշտակած գումարները՝ նախազգուշացնելով, որ հակառակ պարագայում ինքը կհրապարակի սկանդալային փաստեր։

Փաշինյանը Հայաստանի երրորդ նախագահին ուղղված մեղադրանքների մասով ապացույց չհրապարակեց: Հավատարիմ մնալով խոստմանը՝ Սարգսյանը հրապարակել է ձայնագրություն, որից պարզ է դառնում, որ Փաշինյանը դիտավորյալ տապալել է բանակցային պրոցեսը։

Ըստ Սարգսյանի՝ ձայնագրությունը վերջերս իրեն ուղարկել են բարի մարդիկ, որը լսելով ամբողջությամբ կարծիք կկազմեն կապիտուլյանտի մասին.

Ըստ ձայնագրության՝ 2018 թվականի մայիսի 12-ին, երբ Փաշինյանը Սոչիում էր, հանդիպել է Վլադիմիր Պուտինին, Նազարբաևին և Լուկաշենկոյին, ովքեր հայտնել են, թե  Փաշինյանը մեծ ժողովրդական վստահություն ունի և պատմական շանս է, որպեսզի Ղարաբաղի հարցը լուծի։ Փաշինյանը հայտնում է, որ խոսքը գնում է նույն «Լավրովի պլանի մասին» և բարձրացնում նաև ԼՂ կարգավիճակի մասին։

Սերժ Սարգսյանը՝ ձայնագրությունից հետո մեջբերում է Փաշինյանին, որն ասել է, թե ամեն ինչ անելու է, որ նախկին բանակցային փաստաթղթերը զրոյանան «ես ինձ գժի տեղ եմ դնելու»։

Սարգսյանը նշեց, որ եզրակացություն  այն է, որ Փաշինյանը գիժ չէ, պարզապես գժի տեղ է դնում, գժություններ անում, որը անթույլատրելի է երկրի ղեկավարի համար։

Հիշեցնենք, որ Նիկոլ Փաշինյանը մեղադրում էր Սերժ Սարգսյանին զինվորների գումարները Մոնտե Կառլոյում «կրվելու» համար։ Սարգսյանն էլ հայտնել էր, որ 24 ժամ է տալիս, որով Փաշինյանը կամ պետք է մի փաստ ներկայացնի, կամ ինքը փաստեր  կհրապարակի Փաշինյանի, նրա ընտանիքի մասին, որ հասարակությունը «կթքի նրա վրա»։

Կից ձայնագրության սղագրությունն ամբողջությամբ.

Երբ որ ես 2018 թվականի մայիսի 12-ին գնում եմ Սոչի և էնտեղ հանդիպումներ եմ ունենում, այսինքն՝ մեր առաջին ծանոթությունը տեղի ա ունենում: Էդտեղ՝ սուրճի սեղանի տեղ կա, որտեղ նիստերից առաջ և հետո հավաքվում են, սուրճ են խմում և այլն, էդտեղ գալիս են Պուտինը, Նազարբաևը և բանը՝ Լուկաշենկոն, և ինձ ասում են հետևյալը՝ դու հիմա այդպիսի մեծ ժողովրդական վստահություն ունես և այլն, և այլն և պատմական շանս է սա քեզ համար, որպեսզի Ղարաբաղի հարցը լուծես:

Ասում եմ՝ օքեյ, հասկանում եմ, որ պատմական շանս ա, հիմա ասենք՝ ինչ ա նշանակում լուծել: Ու իրանք նորից պատմում են ինձ էն, ինչ որ գրված է «Լավրովի պլանի» մեջ՝ զորքերը հետ քաշվի և այլն, մենք կգանք, կկանգնենք, ճանճ չի տզզա և այլն, և այլն:

Ես ասում եմ էն, ինչ-որ ասացի հիմա, որ առանց կարգավիճակի ճշգրտման, ընդ որում շատ կոնկրետ ճշգրտման, դա ընդհանրապես թեմա չէ, որը կարելի է քննարկել և այլն:
Նույնիսկ ես այս տարբերակի հետ համաձայն չեմ, հիմա դուք ինձ լրիվ ուրիշ բան եք ասում: Ու այդտեղ Պուտինն ասում է, Պուտինն էլ, Նազարբաևն էլ, Լուկաշենկոն էլ ասում են, որ Ալիևը հասկանում է, որ Ղարաբաղն այլևս երբեք Ադրբեջանի կազմում չի լինի:

Ասում եմ՝ հոյակապ բան եք ասում: Եկեք գրենք թղթի վրա, և դա կլինի մի թեմա, որն արդեն կլինի հետաքրքիր, որը ես սենց դնեմ թևիս տակ, գնում եմ ժողովրդին ասում եմ՝ ժողովուրդ ջան, մենք սենց առաջարկ ունենք, սա մեզ հետաքրքիր ա՞, թե չէ:

Չէ, բայց ասում ա, երկրորդ նյուանսն ա ասում՝ պարզապես ինքն ասում է, եթե ես սա հիմա որևէ ձևով ցույց տամ, ես կդառնամ ազգի դավաճան: Ես էլ էդտեղ իրանց ասացի՝ փաստորեն հասկացա, ձեր հազար տարվա ընկերն ա, չեք ուզում, որ ազգի դավաճան դառնա, ուզում եք ես դառնամ ազգի դավաճան: Ես ասացի, չի լինի, դա չի լինի:

Ու այս ամեն ինչի արդյունքում ա, ես բազմաթիվ բանով ասել եմ՝ ես հասկացա, որ իրանք ինձ ուզում են դնեն էն նույն կանվեյերի վրա, որի վերջում խոսալով, ժպտալով, խմելով, բան, որի վերջում Ապրիլյան պատերազմ էր:

Ինձ համար պարզ էր, ինձ էդտեղ իմ խնդիրը հստակ ձևակերպվեց, որ ինչ ձևով էլ ուզում է լինի պետք է էս կանվեյերի վրայից թռնել, թռնել ուրիշ տեղ հայտնվել, հաստատ դրա վրա չլնել: Դա կլինի, կներեք արտահայտությանս համար, կլինի մի քիչ գժի տեղ դնելով, դա կլինի մի քիչ նեադեկվատ թվալով, դա կլինի մի քիչ բան լինելով, բայց դա կլինի, բայց այդ կոնվեյերից պետք ա դուրս պրծնել։ Ու այդ ժամանակ իրավիճակը շատ ռիսկային էր։ Շատ, չափազանց ռիսկային էր: