Այսօր՝ մայիսի 28-ին, լրագրողների հետ զրույցում ՀՀ ԱԺ փոխխոսնակ Ալեն Սիմոնյանը, պատասխանելով հարցին, թե ինչու իշխանությունները դատական բարեփոխումների մասին սկսեց խոսել միայն Ռոբերտ Քոչարյանի խափանման միջոցի փոփոխությունից հետո, հայտարարեց, որ իրենք ԱԺ-ում իշխանություն են վերջին 5 ամսում, հանձնաժողովներն իրենց բնականոն աշխատանքը դեռ նոր է սկսել. «Դուք օրինակ եք բերում Քոչարյանի դեպքը, նրան մի անգամ էլ էին բաց թողել, ինչո՞ւ այն ժամանակ չսկսեցինք, եթե դա նրա հետ կապ ունի»:

Տեսակետին, թե իշխանությունները փորձում են նախկին իշխանության խամաճիկ դատավորներին փոխարինել իրենց խամաճիկ դատավորներով, Սիմոնյանը նշեց, թե պետք լիներ այն դատավորներ, որոնք նախկինների համար խամաճիկ են եղել, իրենց համար էլ մեծ հաճույքով խամաճիկ կլինեին:

 Պատասխանելով այն պնդմանը, որ երբ Հայաստանում խոսվում է դավադիր պատերազմի մասին, ադրբեջանական կողմն էլ կարող է հարձակում սկսելիս Հայաստանի վրա բարդել մեղքը, նա ասացշՀայաստանը, ի տարբերություն Ադրբեջանի, ազատ և ժողովրդավարական պետություն է, և այստեղ կարող է քննվել ամեն թեմա։

 Ինչ վերաբերում է նրան, որ Ապրիլյան պատերազմը քննող խորհրդարանական հանձնաժողովը կարող է ՀՀԿ ղեկավարած իշխանության պաշտոնյաներին հետապնդելու, դատելու, քաղաքական հաշվեհարդար տեսնելու հիմքեր ստեղծել, Սիմոնյանն ասում է, որ իրենք նման նպատակ չունեն։

«Եթե քաղաքական հաշվեհարդար ունենալու լինեինք, շատ շուտվանից կանեինք։ Այսօր մեր համաքաղաքացիները մեզ մեղադրում են նրա մեջ, որ մենք չափից ավելի փափուկ ենք։ Ուստի էդ դիսկուրսը հանելու համար ես ձեզ ասեմ, որ մենք գործում ենք զուտ օրենքի շրջանակում, նույնիսկ այն պարագայում, որ քաղաքական առումով վնաս ենք կրում, և այստեղ կանգնած մեր քաղաքացիները մեզ մեղադրում են, ասում են՝ էդ թավիշը քչացրեք»,- ասաց Սիմոնյանը։