Ինչպես հայտնում է INTERFAX.RU-ն, Երևանում բարձրաստիճան աղբյուրը, մեկնաբանելով Մոսկվայում բարձրաստիճան դիվանագիտական աղբյուրիհայտարարությունն այն մասին, որ ՀԱՊԿ Գլխավոր քարտուղարի փոփոխության գործընթացը սկսելու վերաբերյալ Երևանի հայտարարությունը ոչ պրոֆեսիոնալ է, բավական հետաքրքիր հայտարարությամբ է հանդես եկել:

«Մենք համարում ենք անարդյունավետ հանրային քննարկումները և պարզաբանումները կանոնադրության, գործընթացի կանոնակարգի և ՀԱՊԿ այլ փաստաթղթերի վերաբերյալ, որոնք մեզ լավ հայտնի են և խիստ համապատասխան, որոնցով Հայաստանը կառուցում է իր համագործակցությունը կազմակերպության շրջանակներում: Մեր ռուս գործընկերների հետ ունենք կառուցողական և բովանդակալից երկխոսություն բոլոր ոլորտներում երկկողմ և բազմակողմ օրակարգի, որն իրականացվում է հայ-ռուսական դաշնակցային հարաբերությունների ոգով և լավ սահմանված կապի հուսալի ուղիներով»,-«Ինտերֆաքս»-ի հետ զրույցում  հայտարարել է բարձրաստիճան աղբյուրը:

Երևանի ոչ պաշտոնական ռեակցիան ռուսական կողմից հնչած հայտնի հայտարարություններին, ոչ միայն համաչափ է ստացվել, այլև ակնհայտորեն իր տողատակում շատ կոնկրետ ուղերձ է պարունակում՝ ուղղված Հյուսիս. երևանյան բարձրաստիճան աղբյուրը, որը, սակայն, դեռևս պաշտոնական Երևանը չէ (այս հանգամանքը շատ կարևոր է, քանի որ տեղ է թողնում պաշտոնական Երևանին հարկ եղած դեպքում մանևրելու), մի կողմից՝ իր մտահոգությունն ու վրդովմունքն  է  հայտնում՝ «լուն ուղտ դարձնելու» համար, մյուս կողմից՝  երաշխավորում հայ-ռուսական բարեկամական, դաշնակցային հարաբերությունների  շարունակականությունը՝ համապատասխան միջազգային հարաբերությունների պրակտիկայում ընդունված բոլոր կարգերի ու նորմերի:

Երկրում տեղի ունեցած հայտնի իրադարձություններից հետո, բոլորովին գաղտնիք չէ, Երևանն ամեն ինչ անում է` միջազգային հարթակում բարձրացնելու սեփական արժեքն ու կշիռը կամ սուբյեկտայնությունը: Ակնհայտ է, որ Երևանից հնչած այս ոչ պաշտոնական պարզաբանումը կամ արձագանքը պետք է գնահատել որպես երկրի սուբյեկտայնության բարձրացմանն ուղղված քայլ:  Ճիշտ է՝ միանշանակորեն դժվար է պնդել, թե Խաչատուրովի շուրջ ստեղծված իրավիճակի վերաբերյալ ՌԴ համապատասխան արձագանքը Հայաստանում բացառապես ընկալվել է՝ երկրի ինքնիշխանության ոտնահարում, սակայն ակնհայտ է նաև, որ այս  ոչ պաշտոնական արձագանքը կրում է նաև որոշակի պրոֆիլակտիկ բնույթ՝ կանխելու Հայաստանի ներքին գործերին դրսից հնարավոր միջամտության փորձերը՝ անկախ այդ դրսի աշխարհագրական տեղանքից:

Թե ինչ հունով կզարգանան հետագա իրադարձությունները ՀԱՊԿ ներկայիս Գլխավոր քարտուղարի շուրջ, թերևս, պարզ կդառնա ժամանակի հետ միայն, միանշանակ է, սակայն, որ պետք է անել ամեն ինչ, որպեսզի տեղի ունեցածը որևիցե բացասական ազդեցություն չունենա ՀԱՊԿ-ում Հայաստանի դիրքերի վրա. սեղանին դրված է Հայաստանի ազգային անվտանգության հարցը:

Norlur.am