ՀՀ ԱԺ-ն ձայների մեծամասնությամբ, 2-րդ ընթերցմամբ ընդունեց Հայաստանի Հանրապետության քաղաքացիական դատավարության օրենսգիրքը, որով մասնավորապես նախատեսվում է դատական նիստերի ժամանակ փաստաբաններին մինչեւ 100 հազար դրամով տուգանելու դրույթը: Մինչ օրենքը կընդունվեր, ՀՀ փաստաբանների պալատը հանդես եկավ բողոքի ակցիաներով, ընդհուպ մինչև փաստաբանների մի ամբողջ օր գործադուլի դիմելը: Բայց «Ձայն բարբառո հանապատի»: Ոչ մի օգուտ: ՀՀԿ-ն ուզում է, ՀՀԿ-ն անում է իր գործը:

Փաստաբանների պարտության թերևս ամենակարևոր պատճառ կարելի է համարել նրանց միջև առկա խնդիրներն ու անառողջ մթնոլորտը: Տևական ժամանակ է՝ փաստաբանական համայնքում կան լուրջ խմորումներ, որոնք հասել են նաև ծեծկռտուքների:

Իշխող հանրապետականը հասկացավ, որ փաստաբաններն արդյունավետ պայքար չեն կարող մղել, քանի որ նրանք մասնատված են, նրանց մեջ միասնություն չկա:

Այս օրերին ՀՀ փաստաբանների պալատի նախագահի ծառայողական մեքենան նկատվել էր ՀՀԿ կենտրոնական գրասենյակի մոտ: Թե ինչ էր քննարկել Արա Զոհրաբյանը ՀՀԿ-ում, պարզ չէ, որովհետև այդպես էլ որևէ բացատրություն չհնչեց:

Փորձագետները համարում են, որ տուգանելով՝ փորձ է արվում ըմբոստ փաստաբաններին լռեցնել: Ընդունենք իքս պաշտպանը ըմբոստություն ցուցաբերելու համար լքում է նիստերի դահլիճը: Դատավորը դա համարում է անհարգալից վերաբերմունք և նրան տուգանում 100 հազար դրամով:

Ինչ-խոսք, Հայաստանի պայմաններում, սա կարող է ծառայել որպես փաստաբանին լռեցնելու փորձ: Այս վարկածը անտեսել չի կարելի: Ինչպես Փաստաբանները, նույն կերպ և դատախազները կարող են տուգանվել, բայց դատախազները ծայրահեղ քայլերի չեն դիմել ու չեն դիմի: Այս մասին հայտարարեց ՀՀ Գլխավոր դատախազ Արթուր Դավթյանը: Իհարկե, դատախազությունը բացասական կարծիք է հայտնել, սակայն օրենքն ընդունվել է:

Հարց է առաջանում, եթե դատախազությունը դեմ է, ինչո՞ւ չի բողոքում: Այստեղ թաքնված է շան գլուխը: Բանն այն է, որ դատախազները գրեթե երբեք չեն ըմբոստանում, գրեթե երբեք չեն զայրանում ու չեն լքում նիստերի դահլիճը … Էլ ինչու բողոքեն: Նրանք գալիս են, անկաշկանդ կարդում իրենց մեղադրանքը, հանգիստ ասում իրենց ասելիքն ու գնում: Հասարակությունը հաճախ դատախազներին նույնացնում է դատարանների հետ: Ինչ մեղադրանք բերում են, դատարանը հիմնականում դակում է և հաստատում: Այ հենց սա է պատճառը, որ դատախազները մտահոգվելու լուրջ առիթ չունեն: Մտահոգվելու առիթ չունեն, որովհետև նախորդ տարի նվազել են արդարացման դատավճիռները: Այս մասին հայտարարեց երկրի թիվ 1 գլխավոր մեղադրողը՝ համարելով, որ դատախազությունը մոտենում է անսխալականության:

Իհարկե, եթե ըստ գլխավոր դատախազի, քիչ արդարացումներն իրենց հաղթանակն են, հասարակության մոտ կրկին արմատավորվում է այն համոզմունքը, որ դատարանները արդարադատություն իրականացնելու փոխարեն դարձել են դատախազության կարծիքին կնիք դնող մարմին:

Ի դեպ, վերը նշված աղմկահարույց օրենքին անդրադառնալով նկատենք, որ ընդդիմադիր ԵԼՔ խմբակցության պատգամավոր, իրավապաշտպան Արտակ Զեյլանյանը փաստաբաններին կոչ արեց դիմել Մարդու իրավունքների եվրոպական դատարան:

Թե ինչ արդյունք կլինի հետագայում, կամ կլինի արդյոք, միայն ժամանակը ցույց կտա:

Մկրտիչ Հարությունյան