Արգենտինական «Independente» հայտնի ֆուտբոլային ակումբի ծագումով հայ փոխնախագահ, «Դեպորտիվո Արմենիո»ֆուտբոլային ակումբի նախագահ Նորայր Նակիսի ձերբակալությանը Արգենտինայի հայ համայնքում անտարբեր են և չեն պատրաստվում բողոքի ակցիաներ կազմակերպել, Aysor.am-ին փոխանցել են արգենտինահայ համայնքից:

Համայնքի բարձրաստիճան ներկայացուցիչներից մեկը, որը չցանկացավ ներկայանալ, Aysor.am-ի թղթակցի հետ զրույցում ասաց, որ ինչ-որ տեղ ձերբակալությունն իրենց համար սպասելի էր, քանի որ իրենք տեղյակ են ֆուտբոլային խաղերի տոմսերի վաճառքի ու թանկ գնով վերավաճառքի, ինչպես նաև խուլիգանության դեպքերին, որոնք կապվում են Նակիսի անվան հետ: Նրա խոսքով, նույնիսկ եղել են դեպքեր, երբ խաղի տոմսերը այլ ակումբների ներկայացուցիչներին անվճար բաժանելու կամ նվիրելու փոխարեն, դրանք իր կողմից վաճառվել են: «Չենք կարող ասել, թե հրեշտակ է, բայց շատ-շատ գործեր արած է, որ նորմալ չէ: Համայնքը չի ցանկանում խառնվել այդտեսակ գործերին», — նշեց նա:

Հայ համայնքում, մեր զրուցակցի փոխանցմամբ, նույնիսկ որոշ հակակրանք կա Նորայր Նակիսի նկատմամբ, քանի որ, նրա խոսքով, վերջինը «թուրքամետ է և Թուրքիայի ներկայիս նախագահ Էրդողանի նկատմամբ անթաքույց համակրանք է ունեցել»:

«Հիշում ենք, որ երբ արգենտինահայ համայնքը, հատկապես երիտասարդները, Էրդողանի այցի ժամանակ բողոքի ակցիա էր կազմակերպել այն շենքի դիմաց, որտեղ գտնվում էր Թուրքիայի բարձրաստիճան պաշտոնյան: Այդ շենքից դուրս էին գալիս լրագրողները, բոլորը հետաքրքրվում, թե մենք ի՞նչ ենք ուզում, հետաքրքրվում էին, թե ինչու՞ ենք բողոքի ակցիա կազմակերպել: Բայց Նակիսը բացարձակապես չհետաքրքրվեց, և հետո մենք լուսանկարներ տեսանք, թե ինչպես է նա Էրդողանի հետ ողջագուրվում», — պատմեց Aysor.am-ի զրուցակիցը:

Ավելի ուշ, երբ համայնքում տարակուսել են Նակիսի այս վարքից, նա բացատրել է, որ ինքը Էրդողանին խնդրել է պոլսահայ համայնքին «լավ նայել»: «Բայց մենք չենք հավատացել այդ խոսքերին», — փոխանցեց մեր արգենտինահայ զրուցակիցը:

Նորայր Նակիսը բացի ֆուտբոլային գործունեությունից, նաև բիզնեսմեն է և, մեր զրուցակցի խոսքով, ոսկեղենի խանութներ ունի:

Ինչ վերաբերում է Նակիսի ձերբակալությանը, ապա մեր զրուցակցի խոսքով, ֆուտբոլային արգենտինահայ մենեջերի ձերբակալության պահին նրա հետ եղել է հայ երգիչ Թաթա Սիմոնյանը. այդ ժամանակ Նակիսը դիմավորելիս է եղել համերգ տալու համար Արգենտինա ժամանած երգչին:

«Հայ համայնքի անվան համար Նակիսի ձերբակալությունը լավ չէր, որովհետև շատերը մեզ ասում են՝ դուք ֆուտբոլի մաֆիա ունեք, այսպիսի խուլիգանություններ եք անում, այս եք անում, այն եք անում», — նշեց նա: