Այսօր Ամերիկայի միջին վիճակագրական բնակիչը տարեկան մոտ 7 կգ յոգուրտ է ուտում, սակայն քչերը գիտեն այն մասին, որ Միացյալ Նահանգներում յոգուրտ առաջինը սկսել է արտադրել հայ ամուսինների զույգը:
Սարգիս Կոլոմբոսյանն ու Ռոզա Կրիկորյան-Կոլոմբոսյանը` «Colombo» հայտնի յոգուրտի հեղինակները, առաջիններից էին, որոնց հաջողվեց լիարժեք կյանքի կոչել ամերիկյան երազանքը և զարմանալի հաջողության պատմություն ստեղծել: Sputnik Արմենիան բացառիկ հարցազրույց է ներկայացնում Սարգսի և Ռոզայի որդի Ռոբերտ (Բոբ) Կոլոմբոսյանի հետ, որին վիճակված էր դառնալ ընտանեկան բիզնեսի ժառանգորդը: Զրուցել է Լիլիթ Հարությունյանը:

Արևմտյան Հայաստանից Ամերիկա գաղթած Սարգիս Կոլոմբոսյանն ու Ռոզա Կրիկորյանը 1990-ականների սկզբին ծանոթացան Մասաչուսեթսում և որոշեցին ամուսնանալ: Սարգիսը միրգ ու բանջարեղեն էր վաճառում, իսկ նրա կինն աշխատում էր բրդի արտադրության գործարանում: Երբ ընտանիքում 4 երեխա հայտնվեց, Ռոզան որոշեց օգնել ամուսնուն, հին հայկական բաղադրատոմսով նա սկսեց յոգուրտներ պատրաստել, որոնք քիչ ավելի ուշ ստացան «Colombo» անվանումը:
Շուտով նոր արտադրանքը, որը հայտնի էր միայն Արևելքից գաղթածներին, մեծ պահանջարկ սկսեց վայելել շրջակայքում: Կամաց-կամաց բիզնեսը սկսեց զարգանալ, գործին միացան նաև երեխաները: Այդպես անցյալ դարի 30-ականների վերջին Մասաչուսեթս նահանգի Անդովեր քաղաքում հիմնադրվեց «Colombo & Sons Creamery» ընկերությունը:

1960 թվականին ձեռնարկության վաճառքը կտրուկ աճեց, երբ հեղինակավոր ամերիկյան պարբերականներից մեկում հոդված հայտնվեց յոգուրտի օգտակար հատկությունների մասին: Մոտ տասը տարի անց Բոբ Կոլոմբսոյանը գլխավորեց ընկերության նախագահի պաշտոնը և կառավարում էր բիզնեսը եղբոր` Ջոնի հետ: Արդեն 1975 թվականին «Colombo»-ն ԱՄՆ-ի ամենավաճառվող յոգուրտը դարձավ:
1993 թվականին ապրանքանիշը գնեց «General Mills» ընկերությունը, իսկ 2010 թվականին ընկերությունը դադարեցրեց «Colombo»-ի արտադրությունը՝ կենտրոնանալով իր «Yoplait» ապրանքի վրա: Բոբ Կոլոմբոսյանը, որն այդ ժամանակ 84 տարեկան էր, ընկերության որոշումը հետևյալ կերպ մեկնաբանեց. «ԱՄՆ-ի հնագույն ապրանքանիշից հրաժարվելն ամենավատ բանն էր, ինչ կարող էր անել ընկերությունը»:

-Արևմտյան Հայաստանի ո՞ր քաղաքից են ձեր ծնողները ԱՄՆ տեղափոխվել:

— Հայրս Չնկուշ գյուղից է (ժամանակակից Դիարբեքիրի շրջան — խմբ.), մայրս` Քիլիսից: Սարգիսը Չիկագո է տեղափոխվել 1910 թվականին՝ օգնելու համար եղբորը, որն այն ժամանակ հոթ-դոգ էր վաճառում: Ռոզան Ամերիկա էր տեղափոխվել 1922 թվականին երկու եղբայրների, քրոջ և նրա ամուսնու հետ, ընդ որում՝ նրանք որոշակի ժամանակ Մարսելում մնացին: Արդյունքում նա բնակություն հաստատեց Մասաչուսեթս նահանգի Լորենս քաղաքում, որտեղ աշխատում էր գործարանում: Հենց այդտեղ էլ նա հանդիպեց իր ապագա ամուսնուն:

-Արդյո՞ք հայկական մածուն համտեսել եք:

— Իհարկե, ես կերել եմ մածուն: Դրա պատրաստման տեխնոլոգիան մայրս «բերել էր» Հայաստանից, և հենց դա էլ ընկած էր մեր արտադրանքի հիմքում:

-Ձեր ընտանիքը երբևէ չի զղջացե՞լ է, որ վաճառեց ապրանքանիշը General Mills ընկերությանը:

— Զղջացել է, քանի որ մի քանի տարի առաջ նրանք արտադրությունից հանեցին «Colombo»-ն և իրենց ուշադրությունը կենտրոնացրեցին Yoplait-ի վրա, այն դեպքում, երբ «Colombo»-ն ԱՄՆ-ում 75 տարվա ընթացքում առաջատար բրենդ էր համարվում:

-Ձեր արտադրանքին նվիրված հոդվածների տակ ընթերցողները հաճախ են մեկնաբանություններ թողնում, որոնց իմաստն այն է, թե «Colombo»-ն լավագույնն է եղել: Դուք կամ ձեր ընտանիքի անդամներից որևէ մեկը մտածե՞լ է վերսկսել հին բաղադրատոմսով յոգուրտի արտադրությունը:

— Այո: Ըստ էության, ես դեռ պատրաստում եմ այն հին արտադրանքը, որը մայրս էր պատրաստում հեռավոր 30-ականներին, և բաժանում եմ այն ընտանիքի անդամներին ու ընկերներին:

Այսօր ես 92 տարեկան եմ: Եթե ես գոնե 10 տարով երիտասարդ լինեի, անպայման արտադրանքը շուկա կվերադարձնեի:

Մեր ընտանիքի անդամներից շատերը հետաքրքրություն են ցուցաբերում այս թեմայի վերաբերյալ, բայց այդ հետաքրքրությունը բավական համեստ է: Այսօր շուկայում մրցակցությունը մեծ է, հունական յոգուրտների մեծ տեսականի կա, սակայն «Colombo», անկասկած, լավագույնն էր:

businessnews.am